රටට, ජාතියට, ජනතාවට අවංකවම ආදරය කරන පුද්ගලයෙක් රටේ පාලනයට අවශ්ය බව රටේ ජනතාවගේ මූලික ඉල්ලීමක් වී ඇති බවත්, පොරොන්දු දී පොරොන්දු කඩකරන මේ බහුතර දේශපාලකයින්ගෙන් එවැන්නෙක් සොයා ගැනීම අසීරු බවත් මල්වතු පාර්ශ්වයේ මහානායක අති පූජ්ය තිබ්බටුවාවේ සුමංගල නා හිමියෝ පවසති.
සිවිල් සංවිධාන ක්රියාකාරීන් පිරිසක් 28 දින මල්වතු විහාරයේදී උන්වහන්සේ බැහැදුටු අවස්ථාවේ නාහිමියෝ ඉහත අදහස් පළ කළහ.
මෙම සිවිල් ක්රියාකාරීන් පිරිස මල්වතු නාහිමි හමුවේ අවධාරණය කළේ ජනතාව වෙනුවෙන් පෙනී සිටින සිවිල් ක්රියාකාරීන් මර්ධනය හා දඩයම් කිරීම සඳහා මේ වන විට රජය විවිධ ආකාරයෙන් ක්රියාත්මක වන බැවින් මෙම තත්ත්වය අවම කරගැනීම සඳහා මහා නාහිමියන් ඇතුළු මහා සංඝරත්නයේ මැදිහත්වීම අවශ්ය බවය.
ඔවුන් පැවසුවේ දූෂණයට විරෝධය පලකිරීම හේතුවෙන් තමන්ගේ ජීවිතවලට ද තර්ජන එල්ල වී ඇති බවය.
ඉදිරි ජනාධිපතිවරණයේදී වෙනසක් අනිවාර්යයෙන් සිදුවිය යුතු බවත් රටට ,ජාතියට, ජනතාවට ආදරය කරන තැනැත්තෙකු ජනාධිපති විය යුතු බවත් ඔවුහු නාහිමි හමුවේ පැවසූහ.
මෙහිදී සිවිල් ක්රියාකාරීන් හමුවේ අදහස් පල කළ මල්වතු මහා නාහිමි අවධාරණය කොට සිටියේ මේ වන විට සිවිල් ක්රියාකාරීන් පිරිසක් රටේ වෙනසක් පතා මෙන්ම වංචා දූෂණ වලට එරෙහිව කටයුතු කරන ආකාරය පිළිබදව තමන් වහන්සේගේද ආශිර්වාදය හිමිවන බවය.
නමුත් ඔවුන් සඳහන් කරන ආකාරයෙන් රටට ජනතාවට අවංකවම හිතැති දේශපාලඥයන් හෝ පුද්ගලයන් සොයා ගැනීම ඉතා අසීරු කටයුත්තක් බවත්, මේ බහුතරයක් දේශපාලනඥයන් බලයට පැමිණිමට පෙර පැවසූදේ බලයට පැමිණි පසු අමතක කරන බවත් රටට ආදරය කරන කෙනෙක් රටේ පාලනයට අවශ්ය බව රටේ ජනතාවගේ මූලික ඉල්ලීමක් වී ඇති බවත් උන්වහන්සේ පැවසූහ.
මෙහිදී සිවිල් ක්රියාකාරීන් නාහිමි හමුවේ සඳහන් කළේ එවැනි පුද්ගලයකු ජනපතිවරණයට ඉදිරිපත් කිරීම සම්බන්ධයෙන් මේ වන විට සැලසුම් සහගතව වැඩසටහනක් ක්රියාත්මක වෙමින් පවතින බවය.
