ඊයේ සෝමාලියානු මුහුදු කොල්ලකරුවන් විසින් පැහැර ගන්නා ලද ශ්රී ලංකා බහුදින ධීවර යාත්රාවක් වන ‘ලොරෙන්සෝ පුතා 4’ යාත්රාවෙන් කුමණ අවස්ථාවක හෝ තොරතුරක් එනු ඇතැයි අපෙක්ෂාවෙන් ධීවර හා ජලස සම්පත් දෙපාර්තමේන්තුවේ සන්නිවේදන පද්ධතිය පැය 24ම සීරුවෙන් තබා දැඩි අවධානයකින් යුතුව නිරික්ෂණය කරන බව ධීවර හා ජලජ සම්පත් දෙපාර්තමේන්තුවේ අධ්යක්ෂ ජනරාල් සුසන්ත කහවත්ත පවසයි.
මෙම ධීවරයින් නිදහස් කිරීමට විදේශ අමාත්යාංශයේ සහ ශ්රී ලංකා නාවික හමුදාවේ සහාය ඇතිව විශේෂ පියවර ගනිමින් ඇතැයි පැවසූ අධ්යක්ෂ ජනරාල්වරයා පවසා සිටින්නේ බහුදින යාත්රාව පැහැරගත් සෝමාලියානු මුහුදු කොල්ලකරුවන් ධීවර දෙපාර්තමේන්තුව හෝ වෙනත් වගකිවයුතු රාජ්ය ආයතනයක් සමඟ මේ වනතුරුත් කිසිදු සන්නිවේදනයක් සිදුකර නොමැති බවය.
එබැවින් බහුදින ධීවර යාත්රාව පැහැර ගැනීමට ඔවුන් කරන ඉල්ලීම සහ ඉලක්කය පිළිබඳව තවමත් කිසිවක් නොදන්නා බව ඔහු පෙන්වා දුන්නේය.
“සෝමාලියානු මුහුදු කොල්ලකරුවන් හෝ ධීවර කාර්ය මණ්ඩලයට ඔවුන්ගේ සන්නිවේදන පද්ධතිය හෝ ගුවන්විදුලි පද්ධතිය යථා තත්ත්වයට පත් කිරීමෙන් පසු ඉක්මනින් රට සම්බන්ධ කරගනු ඇතැයි අප බලාපොරොත්තු වෙනවා. ඔවුන්ට ඕනෑම වේලාවක අපගේ දෙපාර්තමේන්තුව හා සම්බන්ධ විය හැකියි. ඒ වගේම ඔවුන් ඕනෑම වේලාවක අප හා සම්බන්ධ වනු ඇතැයි අපි බලාපොරොත්තු සහගතව සිටිනවා. ධීවර දෙපාර්තමේන්තුවේ සියලුම සන්නිවේදන පද්ධති දවසේ පැය 24 පුරා සීරුවෙන් තබාගෙන ඉන්නේ.
මෙම ට්රෝලර් යාත්රාව අඩි 50ක් දිග නවීන උපකරණ සහිත අලුත්ම යාත්රාවක්. එය අරාබි මුහුදේ යාත්රා කරන විට කාර්ය මණ්ඩලය ඇතුලු 06 දෙනෙක් හිටියා. එම යාත්රාව ගිය මංගල ගමන තමයි පසුගිය දා දික්ඕවිට වරායෙන් පිටත් වුනේ. මෙය බහුදින ධීවර යාත්රාවක් බැවින් එහි ප්රමාණවත් තරම් ආහාර, ජලය වැනි පහසුකම් විශාල ප්රමාණයක් තිබූණා. මේ වටිනාකම නිසා ඔවුන් යාත්රාව පැහැරග ගන්න ඇතැයි අපි විශ්වාස කරනවා. අප විශ්වාස කරනවා කාර්ය මණ්ඩලය නිරුපද්රිතව ඇති කියලා. ට්රෝලර් යාත්රාව සහ එහි කාර්ය මණ්ඩලය බේරා ගැනීමට අපි විදේශ අමාත්යාංශයට සහ ශ්රී ලංකා නාවික හමුදාව එක්ක සාකච්ඡා කරමින් ඉක්මන් වැඩපිළිවෙළක් හදනවා….” අධ්යක්ෂ ජනරාල්වරයා සහතික වුනේය.
දැනට ලැබෙන තොරතුරු අනුව ආයුධ සන්නද්ධ පුද්ගලයන් කිහිප දෙනෙකු යාත්රාවට ගොඩවී අහසට වෙඩි තබා යාත්රාව පාලනය කර ගැනීමට කටයුතු ඇත.
‘ලොරෙන්සෝ පුතා 04’ ට්රෝලර් යාත්රාව ජනවාරි 12 වැනිදා දික්ඕවිට ධීවර වරායෙන් පිටත් වූ අතර, පැහැර ගැනීම සිදුව ඇත්තේ ශ්රී ලංකා වෙරළට නාවික සැතපුම් 1,160ක් පමණ ඔබ්බෙනි.
