තෙල් අවුලේ ඇත්ත නැත්ත ගම්මන්පිල පාර්ලිමේන්තුවේ දී කියයි!

• ලෝක වෙළෙඳපලේ තෙල් මිල සියයට 38කින් වැඩිවෙලා… ලංකාවෙ අපි තෙල් මිල වැඩි කරන්නෙ නෑ…

• මාසික අපනයන ආදායම ඩොලර් මිලියන 1000යි… තෙල් විදයම ඩොලර් මිලියන 500යි. මේ තත්වය ඇත්තටම  විශාල අර්බුදයක්…

• ඊයේ විශේෂ කැබිනට් රැස්වීම අතර තුර භාණ්ඩාගාර ලේකම්වරයා ලංකා බැංකුවට උපදෙස් දීලා විදේශ විනිමය නිකුත් කර ඩීසල් නැව නිදහස් කරගත්තා… දැන් ඩීසල් ගොඩබානවා…

• මුහුදෙ තියන පෙට්‍රල් නැවට විදේශ  විනිමය මුදල් ඇමති බැසිල් දෙන්නම් කිව්වා…

ඉන්ධන මිල ඉහළ නොදැමීමට ඊයේ පැවති කැබිනට් මණ්ඩල රැස්වීමේ දී තීරණය කිරීමත් සමග දකුණු ආසියාවේ අඩුම ඉන්ධන මිල වාර්තාවන රට ශ්‍රී ලංකාව බව බලශක්ති ඇමති  උදය ගම්මන්පිල අද පාර්ලිමේන්තුවේ දී පැවසුවේය.

ලෝකයේ තෙල් මිල පෙළ ගැස්වූ විට අඩුම රටවල් 22 අතර ලංකාව සිටින බවත් ලංකාවට ඉහළින් ඇති රටවල් 21ම තෙල් නිශ්පාදනය කරන රටවල් බවත් ඔහු පෙන්වා දුන්නේය.

ඊයේ පැවති විශේෂ අමාත්‍ය මණ්ඩල රැස්වීම අතරතුර  දී  භාණ්ඩාගාර ලේකම්වරයා ලංකා බැංකුවට උපදෙස් දී  මුදල් නිකුත් කිරීමත් සමග මේ වනවිට    ඩීසල් නැවත් ගොඩ බෑම ආරම්භ කර අයුරුත්, පසුගිය  සෙනසුරාදා උදේ බැංකු විවෘත කරගෙන  ණයවර ලිපි නිකුත් කිරීමෙන් පසු සඳුදා උදේ සිට එක පෙට්‍රල් නැවක් ගොඩබෑම ඇරඹුණු බවත් ඇමතිවරයා කීවේය.

දැනට මුහුදේ ඇති ඉතිරි පෙට්‍රල් නැව ගොඩබෑම සඳහා විදේශ විනිමය ලබා දෙන බවට මුදල් ඇමතිවරයා පොරොන්දු වී ඇති නිසා එම නැව ඉදිරි දින කීපය තුළ ගොඩබෑමට හැකිවනු ඇති බවත් බලශක්ති ඇමතිවරයා පෙන්වා දුන්නේය.

ඔහු මෙසේ ද පැවසුවේය.

අද මිල අනුව මාසෙකට ඩොලර් මිලියන 500ක් තෙල්වලට වියදම් වෙනවා. මාසික අපනයන ආදායම ඩොලර් මිලියන 1000යි. අපනයන ආදායෙමන් සියයට 50ක් ඉන්ධන සඳහා වැය කරන්න සිදුවීම මත ඉන්ධන ආනයනය අභියෝගයක් බවට පත් වෙලා තියනවා.

අද රටේ තියන ප්‍රශ්නය ඉන්ධන හිඟයක්, ඖෂධ හිඟයක්, හෝ යකඩ සිමෙන්ති හිඟයක් නොවෙයි. විදේශ විනිමය හිඟය.

මේ මොහොතේ ඩීසල් හිඟයක් රටේ තියනවා. පහුගිය දවස් පහේදිම අපට තිබුණෙ අවසාන නැව නිදහස් කිරීමේ ගැටලුව නිසා සීමිත තොග තමයි නිදහස් කළේ. ඩීසල් හිඟයක් තිබුණා රට පුරා. ඒක ඇත්තක්.

එහෙත් තෙල් මිල වැඩිවීමක් සිදුනොවන බව ඇමතිවරයා පැවසුවේය.

පෙබරවාරි 05  LIOC සමාගමේ මිල වැඩිවීමත්, තෙල් සංස්ථාවෙ සභාපති දැවැන්ත මිල වැඩිවීමක් ප්‍රසිද්ධියෙ ඉල්ලා සිටීමත් නිසා බොහෝ ඉන්ධන පිරවුම්හල් හිමිකරුවන් ඒ දැවැන්ත මිල වැඩිවීම  අපේක්ෂාවෙන් තොග සඟවා තැබීමක් සිදුකරලා තිබුණා. ඒක ඇත්තක්.

අපි අවසාන වතාවට තෙල් මිල වැඩි කළේ දෙසැම්බර් 20. ඒ වනවිට ග්‍රෙන්ට් බොරතෙල් බැරලයක මිල ඩොලර් 72යි. ඊයේ වනවිට   ඩොලර් 99 තෙක් බොර තෙල් බැරලය ඉහළ නැග්ගා. යුක්‍රේන රුසියානු ගැටුමේ තීව්‍රතාවය මත බොහො විට  අද වනවිට ඩොලර් 100 වේවි. අපි ඊයෙ මිල බැලුවොත් දෙසැම්බර් 20 ඉඳලා මේ වෙනකම් සියයට තිස් අටකින් ලෝක වෙළෙඳ පලේ තෙල් මිල ඉහළ ගිහින් තියනවා. .

නමුත් ලංකාවෙ මිල වැඩිවීමක් කළේ නෑ. ඊයේ අමාත්‍ය මණ්ඩල රැස්වීමේ දී දීර්ඝ ලෙස සාකච්ඡා කරලා තෙල් මිල වැඩි නොකර සිටීමේ තීරණයක් ගත්තා.

රටේ ජනතාවගේ දැනගැනිම පිණිස කියන්න ඕන.. මේ මොහොතෙ දකුණු ආසියාවේ අඩුම ඉන්ධන මිල තියෙන්නෙ ලංකාවෙ. ලංකාවට වඩා අඩු ඒක පුද්ගල ආදායමක් සහිත ඉන්දියාවෙ ඩීසල් මිල ලංකාවෙ මිලට වඩා දෙගුණයකට   වැඩියි.

සමස්ථ ලෝකය බැලුවත් ලංකාව 22වැනියට තෙල් මිල අඩුම රට ලෙසයි වාර්තා වෙන්නේ.  ලංකාවෙ උඩින් තියන රටවල් 21ම යහමින් තෙල් නිශ්පාදනය කරන රටවල්.

මේ අවස්ථාවේ දී හිටපු අග්‍රාමාත්‍ය රනිල් වික්‍රමසිංහ ප්‍රශ්නයක් මතුකරමින්  තෙල්  බැරලය ඩොලර් 100ට අද වැඩිවිය හැකි වීම යථාර්ථයක් බවත්  ඊලඟ මාස තුන  සඳහා ඉන්ධන ලබා ගැනීමටට රටට හැකියාවක් තිබේදැයි බලශක්ති ඇමතිවරයාගෙන් විමසා සිටියේය.

එහිදී බලශක්ති ඇමති උදය ගම්මන්පිල කීවේ මෙසේය.

අඛණ්ඩ මිල වැඩිවීමක් බලාපොරොත්තු වෙනවා. මාර්තු මැද වනවිටයි අප බොරතෙල් බැරලයක් ඩොලර් 100 වෙයි කියලා හිතුවේ. ඒ මිල වැඩිවීම පෙබරවාරි මැද දි සිදුවුණා. මාර්තු මැද වනවිට අනිවාර්යයෙන් බොරතෙල් බැරලය  ඩොල් 115 තෙක් වැඩිවේවි.

මේ අභියෝගය නිසාම මාසෙකට ඩොලර් මිලියන 1000ක් උපයලා මිලියන 500ක් තෙල්වලට වියදම් කිරීම අභියෝගයක්. අප රටවල් ගණනාවකින්ම දිගු කාලීන නය පහසුකම් ඉල්ලලා තියනවා. මාර්තු 15 තෙල් නිශ්පාදනය කරන සියලුම රටවල තානාපතිවරුන්ව  කැඳවලා දිගුකාලීන ණය පහසුකම් යටතේ ඉන්ධන ආනයනය සඳහා සාකච්ඡා කරනවා.

මේ මොහොතේ ඇත්තෙන්ම ඉන්ධන සඳහා මුදල් වෙන් කිරීම අභියෝගයක්.