ලොකු කුමා විසිනි –
හිරේ ඉන්න පොලිස්පති දේශබන්දු තෙන්නකෝන් ගෙන් සීඅයිඩීය කට උත්තර ලබා ගෙන ඇතැයි වාර්තා වේ. අනාවරණය වෙන ආකාරයට ඔහු ලබා දී ඇති කට උත්තරය මරේ මරුය. එය බඩ කොරවන තරමට හිනා යන කට උත්තරයකි. එසේම එම කට උත්තරය ගැන අපට ලැබී ඇති විශ්වාසදායක තොරතුරු අනුව මේ ආකාරයෙන් ගලපා ගන්නට පුළුවන.
“…මා මට අයිති හෝකන්දර ගෙදර හිටියා. මම හිටියේ තනියෙන්. ඒ දවසෙ නෝනාවත් පුතාවත් ගෙදර හිටියෙ නෑ
රෑ මට දැඩි ආතතියක් දැනුනා. මට මොනව වුනාද කියල මට මතක නෑ. මම මගේ මහගෙදර ගියා. ත්රීවිල් එකකින්.
ඒ ගෙදර කවුරුත් හිටියෙ නෑ. ඉස්සරහ ගේට්ටුව වහපු නිසා මම තාප්පයෙන් පැනල ජනේලයකින් ගෙට ඇතුළු වුනා. පස්සෙ මම තනියෙන් එහෙ හිටියා. ටවුමට ගිහිල්ල කෑම ගෙනැල්ල කෑවා. ත්රීවිල් වලින් එහෙට මෙහෙට ගියෙ. පස්සෙ මට ආරංචි වුනා මට වරෙන්තු කරල කියලා. මම මගේ ටයි කෝට් සිලි බෑග් එකක දාගෙන ත්රීවීල් එකක මාතරට ආවා. ඇවිල්ල හෝටලයකට ගිහිල්ලා ඒවා ඇඳගෙන උසාවියට ඇවිල්ලා බංකුවෙ වාඩි වෙලා හිටියා. ආගිය තැන් අහාර ගත් හෝටල් ගමන් බිමන් ගිය ත්රීවිල් මොනවාදයි කියන්නට මට මතක නෑ. මට කීමට ඇත්තේ එපමණය…”
දහ අතේ දිවුරන්නට ඕනෑ නැත.
මේ එම කට උත්තරයේ සංක්ෂිප්තයකි.
මුළු කට උත්තරයේම ඇත්තේ මේ ආකාරයේ විස්තරයකි. හිරේ ඉන්න පොලිස්පති දී ඇති කට උත්තරය ඩේසි ආච්චි ගල්කිස්ස උසාවියේ සාක්ෂි දෙමින් පැවසු මැණික් මල්ලේ කතන්දරයේ දෙවන කොටස බවට සිතා ගන්නට පුළුවන. එසේත් නැතිනම් මේ කට උත්තරය දුමින්ද සිල්වාගේ “මට මොනවත් මතක නෑ” කට උත්තරයේම දිගුවක් විය හැකිය.
කට උත්තර ගත්තේ සීඅයිඩී එකෙනි. හිරේ ඉන්න පොලිස්පතිවරයා පවසන දේ ලියා ගන්නවා හැරෙන්නට හරස් ප්රශ්න අසා ඔහුව වෙහෙසවන්නට සී.අයි.ඩී නිලධාරීන් කැමති නැත. අනෙක් අතට තොරතුරුවල සත්ය අසත්ය බව තහවුරු කරගන්නට අවශ්ය ප්රශ්න කිරීම් කළ හැකි තරමේ කොඳු නාරටියක් තවමත් සීඅයිඩී එකේ නිළධාරීන්ට නැත. ඒ බැරියාවට හේතු දෙක තුනක් තිබේ. තවමත් අපරාධ පරීක්ෂණ දෙපාර්තමේන්තුව පාලනය වන්නේ රාජපක්ෂලාගේ අදෘශ්යමාන හස්තයක් වීම ඉන් එක හේතුවකි. අනෙක් හේතුව වන්නේ NPP ආණ්ඩුවට මේ යන විදියට ආයුෂයක් නැති බව සීඅයිඩී මහත්වරුන්ගේ ඔළුවේ තියෙන නිසා වන්ටත් පුළුවන. ඒ නිසා ආණ්ඩුවට කඩේ ගොස් ඊළඟ ආණ්ඩුවෙන් පරිප්පු කනවාට වඩා තවමත් පොලිස්පති ධූරයෙන් ඉවත් කර නැති දේශබන්දු ලොක්කා පවසන දේ ලියා ගැනීම හොඳ බව පොලිසිය සිතීමත් පිළිගත හැකිය.
මහජන ආරක්ෂක අමාත්යංශයේ ඇමති ඩබලද පොලීසියට කැමති විදියට රාජකාරි කරගන්නට ඉඩ දී ඇති බව අමතක නොකළ යුතුය.
හිටපු පොලිස් ඇමතිගේ සෙවනැල්ල තවමත් පොලිස් කාරයන්ගේ රාජකාරිය බිය වද්දාගෙන සිටින අයුරු පෙනේ. ඔහුට එරෙහිව මේ ආණ්ඩුව කිසිදු ක්රියා මාර්ගයක් නොගන්නා බවට මේ වන විට මුළු රට පුරාම පැල වී ඇති අදහසකි. ඒ නිසාම සීඅයිඩීයේ මහත්වරු පමණක් නොව, පොලීසියේ සුනඛ අංශයේ බල්ලන් පවා හිටපු පොලිස් ඇමතිට විරුද්ධව කටේ කෙල බිඳුවක් බිම දාන්ටත් බය ය. ඔහුගේ ආරක්ෂාවට තවමත් ඡ්යෙෂ්ඨ පොලිස් අධිකාරීවරයකු ඇතුළු දහ අටදෙනෙක් යොදවා ඇති බව අපට කියෙන්නේ පොලිසියේම ඇත්තන්ය.
හිරේ ඉන්න පොලිස්පති දේශබන්දු තෙන්නකෝන් විසින් වැලිගම W 15 හෝටලය වැටලීම සඳහා කොළඹ අපරාධ කොට්ඨාශයේ මිනීමරුවන් කණ්ඩායමක් යවන ලද්දේ කාගේ ඕනෑ කම නිසා බව දැන් මුළු රටම දනී. එහි තවත් හංඟන්නට දෙයක් නැත. එහෙව් අවස්ථාවකත් නිරුපද්රිතව ඉන්නට තරම් බලසම්පන්න දුෂ්චරිත සමග හැප්පෙන්නට තරම් මොළේ අමාරුවක් සීඅයිඩි ඇත්තන්ට නැත. ආණ්ඩුවට අවශ්ය නැති දේ ඔවුන් කරන්නේ අහවල් දෙයකට දැයි අප අපෙන්ම විමසා ගත යුතුය.
පුරවැසියන් ලෙස අපට තිබෙන්නේ සුරංගනා කතා බඳු කටඋත්තර අසා ඉන් වින්දනයක් ලැබීමය.
