මංජුල හේරත්
කකුලක් බට්ටෙකුට යනවා කියන එක අපේ සමාජයට සාමාන්ය දෙයක් බවට පත් වෙලා තිබුණු කාලයක් තිබුණා… එහෙම කකුලක් නැතිව ආබාධිත වුණේ, බිම්බෝම්බ සහ පැති බෝම්බ නිසා අසරණ වුනේ හමුදා සොල්දාදුවන් පමණක්ම නෙමෙයි … ලෝකය පුරාම ගැහැණු මිනිස්සු, දරුවන් මේ බිම්බෝම්බ සහ පැතිබෝම්බ වලට ගොදුරු වුණා… ලක්ෂ ගානක් මිනිසුන් මේ විඳවන විඳවිල්ලට පිළිතුරක් හොයන්න ගත්ත වෙහෙස මේ සිද්ද වෙන හානිය අවම කරන්න කකුලක් කැඩුණු පුටුවක් තනියම ලෝකේටම පේන්න අවුරුදු 24 ක් කාලයක් තිස්සේම උද්ඝෝෂණයක් කරනවා.
කකුලක් කැඩුණු පුටුවක් ලෝකයේ ඉදිරි පරම්පරාවන් බිම්බෝම්බ සහ පැති බෝම්බවලින් ආබාධිත බවට පත්වීම වලක්වන්නට කරන සංකේතාත්මක ප්රකාශනය පිළිබඳ කතාව මෙසේ පෙළ ගැසෙනවා.
මෙම පුටුවෙන් සංකේතවත් වන්නේ ලොව පුරා සිටින බිම් බෝම්බ නිසා පාද අහිමිවූවන්. එය සියලු දෙනාට සංකේතවත් ගැඹුරු මතක් කිරීමක් ලෙස මිස මෙය සැරසිල්ලක් නම් නොවෙයි.
ස්විස්ටර්ලන්ත නිර්මාණ ශිල්පියකු වූ Daniel Berset ගේ අදහස ට අනුව Louis Geneve විසින් බරින් කිලෝ 5500ක් හා උසින් අඩි 39ක් වූ මේ පුටුව නිර්මාණය කර තිබෙනවා.
කැඩුණු කකුලක් සහිතවම මෙම පුටුව නිර්මාණය කිරීමේ මුල් අදහස ස්විස්ටර්ලන්ත අබාධිත ජාත්යන්තර සංවිධානය පිහිටු වීමෙහිලා පුරෝගාමීව කටයුතු කළ එහි අධ්යක්ෂ වරයා වූ Paul Wermeulen ගේයි. 1997 වර්ෂයේ සම්මත කර ගැනීමට නියමිතව තිබූ බිම් බෝම්බ, පැති බෝම්බ භාවිතය, නිෂ්පාදනය බෙදාහැරීමට එරෙහි ඔටාවා සම්මුතිය සඳහා විශාල ජනතා පෙළඹවීමක්, අවධානයක්, බලකිරීමක් ජාත්යන්තර දේශපාලන නායකයන් වෙත සිදු කිරීමට අවශ්යය වුණා.
ඒ අනුව මුලින්ම 1997.08.18 දින එක්සත් ජාතීන් ගේ ප්රධාන දොරටුව අභිමුව මේ පුටුව ස්ථාපිත කළේ ඔටාවා සම්මුතියේ සංකේතයක් ලෙස මාස තුනක කාලයක් සඳහා පමණයි. එනම් 1997 දෙසැම්බර් එම සම්මුතිය අත්සන් කරන තෙක් පමණයි. ඔටාවා සම්මුතිය රටවල් 40කගේ අත්සනින් යුතුව අනුමත වී 1999 මාර්තු 01 සිට එම සම්මුතිය වලංගු ජාත්යන්තර සම්මුතියක් බවට පත්වුණා. එහෙත් මුල් වටයේදී අත්සන් කරන ලද්දේ රටවල් 40ක් පමණක් නිසා අනෙකුත් රටවල්ද මේ සඳහා අත්සන් කිරීමට එම රටවල නායකයින් පොළඹවා ගන්න අවශ්ය වුණා. එබැවින් අත්සන් නොකරන ලද රටවලට බල කිරීමටත්, මහජන පෙළඹවීමක් ඇති කර ගැනීම සඳහාත් එම පුටුව 2005 වසර තෙක්ම එම ස්ථානයේ තැබුවා.
පසුව කකුල කැඩුණු පුටුව 2005 දි එය එම ස්ථානයෙන් ඉවත් කළා. නැවත 2007 පෙබරවාරි 26 එය එම ස්ථානයේ ම ස්ථාපිත කළා. 2004 වර්ෂය දක්වාම මෙම නිර්මාණයේ අයිතිය නිර්මාණ ශිල්පියා සතු වූ අතර 2004 දී නිර්මාණකරු විසින් ම එය ආබාධිත ජාත්යන්තර සංවිධානය වෙත පරිත්යාග කරනු ලැබුවා.
