ජල සම්පාදන අමාත්ය ජීවන් තොණ්ඩමන් විසින් පසුගියදා ජල ගාස්තු ඉහළ නැංවීම සම්බන්ධයෙන් මතුව ඇති ගැටළු සහ චෝදනා සම්බන්ධයෙන් කරුණු දැක්වීම සඳහා පැහැදිලි කිරීමක් අද (4) ට්විටර් සටහනකින් තබා ඇත.
අපගේ සමාජයේ වඩාත්ම අවදානමට ලක්විය හැකි සමෘද්ධි සහ කුලී ගෙවතු පාරිභෝගිකයන් සඳහා ගාස්තු වැඩි කිරීමක් සිදු නොවන අතර විදුලි ගාස්තු, අමුද්රව්ය, මුදල් අවප්රමාණය සහ ඉහළ පොලී අනුපාත ඇතුළුව ඉහළ යන පිරිවැය හේතුවෙන් ජල ඒකකයක් (ලීටර් 1000) සැපයීමේ පිරිවැය රු. 130 ක් වන අතර, එම නිසා ජල සම්පාදන මණ්ඩලයේ පාරිභෝගිකයින්ට පෙර ගාස්තු යටතේ පිරිසිදු හා ආරක්ෂිත නල ජලය සැපයීමට තවදුරටත් නොහැකි වූ බව අමාත්යවරයා පැහැදිලි කළේය.
ගාස්තු ඉහළ නැංවීම යටතේ මසකට ජල ඒකක 20කට වඩා (ලීටර් 20,000) භාවිත කරන පාරිභෝගිකයින් පමණක් සැබෑ ඒකක පිරිවැය සහ ඊට වැඩි මුදලක් අය කර ගැනීඹට පටන් ගන්නා බවත් ජල සම්පාදන මණ්ඩලයේ පාරිභෝගිකයින්ගෙන් 70%ක් පමණ මෙම සීමාවෙන් පහළට වැටෙන බවත් අමාත්ය තොණ්ඩමන් පෙන්වා දුන්නේය.
ජල ගාස්තු ව්යුහයේ විනිවිදභාවය සහ වගවීම ඉහළ නංවන නව තීරුබදු මාර්ගෝපදේශයක් සහ සූත්රයක් මේ වසර අවසන් වන විට අමාත්යාංශය විසින් හඳුන්වා දෙන බව ජීවන් තොණ්ඩමන් අමාත්යවරයාගේ ඉදිරි ක්රියාමාර්ග පිළිබඳව සඳහන් කළේය.
