ජනාධිපති කාර්යාලය ඉදිරිපිට උපවාසයේ නිරත වන උපාධිධාරීන්ට ජනාධිපතිතුමා විසින් ලබන අඟහරුවාදා සවස හයට සාකච්ඡාවක් ලබා දී තිබේ.
මේ තීරණය අද (30) මහජන සම්බන්ධතා අධ්යක්ෂ ජනරාල් ධර්මසිරි ගමගේ විසින් ඔවුන්ට දැනුම් දී ඇත්තේ උපවාසය අවසන් කරන ලෙස ඉල්ලා සිටිමිනි.
පසුගිය ජනවාරි 26 වනදා සත්යග්රහයක් ලෙස ඇරඹි මෙම විරෝධතාව, බලධාරීන්ගෙන් නිසි ප්රතිචාරයක් නොලැබීම හේතුවෙන් එදිනම පස්වරුවේ මාරාන්තික උපවාසයක් දක්වා දැඩි කෙරිණි. අද (30) එම උපවාසයේ පස්වන දිනය ය.
වසර 07ක කාලයක් ගුරු සේවයේ යෙදුන තමන් කඩිනමින් ගුරු සේවයට අන්තර්ග්රහණය කරන ලෙස බලකරමින් ඔවුහු සිය උපවාසය දියත් කළහ. විශේෂයෙන්ම කොවිඩ් වසංගත සමයේදීත් ගුරු හිඟය පවතින අවස්ථාවලදීත් පාසල් පද්ධතිය තුළ සක්රීයව ඉගැන්වීම් කටයුතු කළ තමන්ට සාධාරණය ඉටු කරන ලෙස ඔවුහු ඉල්ලූහ.
උපවාසය සිවු දෙනෙක් ඇරඹූහ. මින් පෙර කාන්තාවක් සහ ඊයේ පිරිමි අයෙක් උපවාසයේ නිරතව සිටිය දී බරපතල සෞඛ්ය තත්ත්වයන් මත රෝහල් ගත කෙරිනි. අද උදේ අයහපත් සෞඛ්ය තත්ත්වය මත තවත් අයෙක් රෝහල් ගත කළ අතර අද සවස්වන විට සිය ජීවිත අවදානම නොතකා එක් අයෙක් උපවාසය අඛණ්ඩව කරමින් සිටියේය.
