ගම්පහ අපරාධ අංශයේ ස්ථානාධිපති ලෙස කටයුතු කළ ප්රධාන පොලිස් පරීක්ෂක ප්රියංකර රාජපක්ෂ ලක්ෂ දෙකකට වැඩි මුදලක් අල්ලසක් වශයෙන් ලබා ගනිද්දී අද ( 25) අල්ලස් හෝ දූෂණ විමර්ශන කොමිසම විසින් අත් අඩංගුවට ගෙන තිබේ.
මෙම පුද්ගලයා මින් පෙර වත්තල පොලිසියේ ස්ථානාධිපතිවරයා ලෙස කටයුතු කර තිබිණි. ඔහු වත්තල පොලිස් ස්ථානාධිපතිවරයා ලෙස පත් වන්නේ ගෝඨාභය රාජපක්ෂ ආණ්ඩු සමයේ දීය. ගෝඨාභය රාජපක්ෂගේ දේශපාලනයේ සමීපතම චරිතයක් බවට පොලිස් දෙපාර්තමේන්තුව තුළ ප්රකටව සිටි නියෝජ්ය පොලිස්පති රොෂාන් රාජපක්ෂ ගේ සොයුරා ප්රියංකර රාජපක්ෂය.
ප්රියංකර රාජපක්ෂට වත්තල පොලිස් ස්ථානාධිපති තනතුර ලබා දීමේදී ද දේශපාලන මැදිහත්වීම් සිද්ධ වුන බව පොලිස් දෙපාර්තමේන්තුවේ අභ්යන්තර ආරංචි මාර්ග එවකට පැවසුවේය.
වත්තල පොලිස් ස්ථානාධිපතිවරයා ලෙස ප්රියංකර රාජපක්ෂ පත් වීමෙන් අනතුරුව පොලිසිය තුළින් මෙන්ම අවට ප්රජාවගෙන් ඔහුගේ හැසිරීම සම්බන්ධව බරපතල චෝදනා එල්ල වී තිබිණි. අල්ලස් ගැනීම ඔහුට එල්ල වූ ප්රධානම චෝදනාව බව වාර්තා විය. සිය නිල නිවසට අවශ්ය සියලුම භාණ්ඩ අල්ලස් ලෙස ව්යාපාරික ප්රජාවගෙන් සහ පුද්ගලයින්ගෙන් ලබා ගැනීමට මෙම ස්ථානාධිපතිවරයා කටයුතු කළ බවට පොලිසියෙන්ම චෝදනා තිබිණි.
ඔහුට එල්ල වූ බරපතලම චෝදනාව වී තිබුණේ වත්තල ප්රදේශයෙ ඉන්ධන පිරවුම්හල් හිමියෙකුගෙන් රුපියල් ලක්ෂයක මුදලක් ඉල්ලා එය ලබා නොදුන් පසු ඔහුට හිරිහැර කිරීම සම්බන්ධ සිද්ධියකි. අවසානයේ දී එම පුද්ගලයා මෙම සිද්ධිය පිළිබඳ පොලිස් දෙපාර්තමේන්තුවට පැමිණිල්ලක් කළ ද එවකට බස්නාහිර පළාත් ජ්යෙෂ්ඨ නියෝජ්ය පොලිස්පතිවරයාව සිටි දේශබන්දු තෙන්නකොන්ගේ මැදිහත්වීමෙන් එම විමර්ශන වැළකී ගිය බවට පොලිසියේම අභ්යන්තර ආරංචි මාර්ග පැවසුවේය.
වත්තල ව්යාපාරික ප්රජාවට සහ ජනතාවට බරපතල පීඩාවක් බවට පත් වෙමින් සිටි මෙම පොලිස් නිලධාරියා පසුව ගම්පහ පොලිස් ස්ථානය වෙත ස්ථාන මාරුවක් ලබා දී තිබුණු බව අභ්යන්තර ආරංචි මාර්ග හෙළි කළේය. ගම්පහ අපරාධ විමර්ශන කාර්යාංශයේ රාජකාරි සඳහා මාරුකළ එවූ මෙම නිලධාරියා අල්ලසට ගිජු බව දැන දැනම ඔහුව ගම්පහ අපරාධ අංශයේ ස්ථානාධිපති බවට පත් කිරීම සම්බන්ධව විවේචනයක් පොලිසිය තුළම තිබී ඇත.
ඒ අතර දිගින් දිගටම මේ නිලධාරියාගේ අල්ලස් ගැනීම් සම්බන්ධව වාර්තා වී ඇති අතර මේ වනවිට පුද්ගලයෙකුගෙන් රුපියල් පනස් දහසක අල්ලසක් ලබා ගැනීම සම්බන්ධව පැමිණිල්ලක් අල්ලස් හෝ දූෂණ විමර්ශන කොමිසම වෙත ද වාර්තා කර තිබේ.
එසේ තිබිය දී අද දිනයේ පුද්ගලයෙකුගෙන් රුපියල් ලක්ෂ දෙකකට වැඩි මුදලක් අල්ලසක් ලෙස ලබා ගැනීමේ දී ප්රස්තුත ගම්පහ පොලිසියේ අපරාධ අංශයේ ස්ථානාධිපති ප්රධාන පොලිස් පරීක්ෂක ප්රියංකර රාජපක්ෂ අල්ලස් හෝ දූෂණ විමර්ශන කොමිෂන් සභාවේ නිලධාරීන් විසින් අත් අඩංගුවට ගෙන තිබේ.
වැඩිදුර විමර්ශන ක්රියාත්මකය.
