ශ්රියානි විජේසිංහ –
-
අධික උෂ්ණත්වය නිසා සැත්කම්වල යෙදෙන කාර්ය මණ්ඩල නිලධාරීන් ක්ලාන්ත වුන අවස්ථා තිබෙනවා… අධික දහදිය දැමීම සහ දාහය නිසා නිශ්චිත අරමුණක වැඩ කරන්න බැරි වෙලා…
-
බිලියන ගණන් වටිනා වෛද්ය උපකරණත් අනතුරේ… හදිසි අනතුරු අංශයේ අධ්යක්ෂවරයාව අවස්ථා ගණනාවකදීම දැනුවත් කළත් විසදුමක් නෑ… රෝහල් කාර්ය මණ්ඩලය කියයි…
-
මම ඒ ගැන දැනුම්වත් නෑ… හොයලා බලන්නම්… හදිසි අනතුරු අංශයේ අධ්යක්ෂවරයා පවසයි…
කොළඹ ජාතික රෝහලේ හදිසි අනතුරු අංශයේ වායුසමීකරණ පද්ධතිය අක්රීය වීම හේතුවෙන් රෝගීන්ගේ ජීවිත දැඩි අනතුරකට පත්ව ඇති බව වාර්තාවේ.
හදිසි අනතුරු අංශය තුළ ශල්යාගාර සංකීර්ණ දෙකක් , දැඩිසත්කාර ඒකක දෙකක් සහ විකිරණ යන්ත්ර පිහිටි ඒකක දෙකක් පිහිටා ඇති අතර මේවා වායුසමීකරණ පරිසරයන් තුළ පවත්වාගෙන යා යුතු වුවද වායුසමීකරණ පද්ධති තුනෙන් දැනට ක්රියාමත්මකව පවතිනුයේ එක් යන්ත්රයක් පමණක් බව රෝහල් ආරංචි මාර්ග සඳහන් කරයි.
මෙම ශල්යාගාර සංකීර්ණය දෙකෙහි ශල්යාගාර අටක් පවතින අතර පැය 24 පුරාම මෙම ශල්යාගාරයන් තුළ සැත්කම් සිදුවෙමින් පවතින අතර ඔිනෑම හදිසි අවස්ථාවකට මුහුණ දීම සඳහා මෙම ශල්යාගාර සූදානමින් තබා ඇති බවද පැවසේ.
මෙම වායු සමීකරණ පද්ධතිය නිසි පරිදි ක්රියාත්මක නොවීම හේතුවෙන් රෝගීන්ගේ ශල්යකර්ම වලදී මෙන්ම අනෙක් ප්රතිකාර කටයුතු වලදීද ආසාදනයන් පාලනය කිරිම දැඩි අර්බුදකාරී තත්ත්වයකට පත්ව ඇතැයිද වාර්තාවේ.
විකිරණ අංශයේ රුපියල් කෝටි ගණනක් වටිනා යන්ත්ර මෙන්ම දැඩිසත්කාර ඒකකයන් හී ඉහළ වටිනාකමින් යුතු ස්වසන ආධාරක යන්ත්ර ((Patients Ventilators) මෙලෙස දැඩි තර්ජනයන්ට ලක්ව ඇති බවද පැවසේ.
ශල්යාගාරයන් තුළ ශල්යකර්ම සිදුකිරීමේදී සෞඛ්ය කාර්ය මණ්ඩලය විශේෂිත ඇදුම් කට්ටලයකින් සැරසිය යුතු අතර ශල්යාගාරයන් තුළ පවතින දැඩි රස්නය හේතුවෙන් ඔවුන් ක්ලාන්ත වූ අවස්ථාවන් ගණනාවක්ම වාර්තා වී ඇතැයි පැවසේ.
ශල්යකර්මය සිදුකරන අවස්ථාවන් තුළදී එයට සහභාගි වන කාර්ය මන්ඩලය සාමාජිකයින්ට අධික දහඩිය දැමීම සැත්කමට ලක්කරන රෝගීයාගේ ජිවිතයට දැඩි අනතුරුදායක තත්තවයන් නිර්මාණය විය හැකි බවද ශල්යාගාරයේ පවිත්රතාව පවත්වා ගැනීමට අර්බුදකාරී තත්ත්වයකට පත්ව ඇති බවද රෝහල් කාර්ය මණ්ඩලය චෝදනා කරයි.
සැත්කම් සිදුකරන අතරතුරදී පරිසරයේ පවතින අධික උෂ්ණත්ව පාලනය කර ගැනීම සඳහා විදුලිපංකාවන් භාවිතා කිරීමට සිදුවන බවද එයින් රෝගීන්ගේ ජීවිත දැඩි තර්ජනයන් ලක්විය හැකි බවද රෝහල් ආරංචි මාර්ග කියයි.
මෙම තත්තවය වසරකට ආසන්න කාලයක සිට පවතින අතර හදිසි අනතුරු අංශයේ අධ්යක්ෂවරයාව අවස්ථා ගණනාවකදීම දැනුවත් කළද එයට නිසි විසදුමක් ලැබී නොමැති බවද පැවසේ.
වායුසමීකරණ පද්ධතිය අක්රියවීම සම්බන්ධයෙන් අප හදිසි අනතුරු අංශයේ අධ්යක්ෂ වෛද්ය ඉන්දික ජාගොඩගෙන් විමසු විට ඔහු සඳහන් කළේ තමාව ඒ පිලිබඳව දැනුවත් කර නොමැති නමුත් ඒ පිලිබඳව සොයා බලා වායුසමීකරණ යන්ත්රවල නඩත්තුකටයුතු ආරම්භ කරන බවය.
