එක වැහි පොදක් වැස්සේ නැත. කැට දමා කියන්නාක් සේ ප්රකාශිත කාලගුණ අනාවැකි පරදා කෝටි ගණන් ක්රීඩා ලෝලීන්ගේ ප්රාර්ථනා මල් පල ගැන්වීමට සොබා දහම කටයුතු කර තිබිනි. අමතර බාධාවකින් තොරව ඉන්දීය – පකිස්ථාන තරගය කොළඹ ආර්. ප්රේමදාස ක්රීඩාංගනයේ දී නිමා විය.
පෙර පැවති විවිධ මතභේද සහ වර්ජන තර්ජන මධ්යයේ අවසානයේ අචද (15) පිටියට පිවිසි පාකිස්ථාන කණ්ඩායමට, 2026 T20 ලෝක කුසලානයේ ‘A’ කාණ්ඩයේ මූලික වටයේ තරගයකදී ඉන්දියාව හමුවේ දරුණු පරාජයකට මුහුණ දීමට සිදු වීම කාලගුණයෙන් ලද ආශීර්වාදයේ රිදෙන සුළු ප්රතිඵලය වූයේය. කොළඹ ආර්. ප්රේමදාස ක්රීඩාංගණයේ දඟපන්දු යවන්නන්ට හිතකර තත්ත්වය ප්රයෝජනයට ගැනීමට පාකිස්ථානය උත්සාහ කළද, ඉෂාන් කිෂාන්ගේ ප්රහාරාත්මක පිතිකරණය හමුවේ ඔවුන්ගේ සියලු සැලසුම් සුනුවිසුනු වී ගියේය.
ඉෂාන් කිෂාන්ගෙන් ප්රවේගකාරී ඉනිමක්
කාසියේ වාසිය දිනා පළමුව පන්දුවට පහර දුන් ඉන්දීය කණ්ඩායමේ පළමු ඕවරය නිමා වන විට ලකුණු පුවරුව දිස් වූයේ ලකුණු 1කට එක් කඩුල්ලක් ලෙසිනි. ප්රබල පිතිකරු අභිෂේක් ෂර්මා ලකුණු නොලබා දැවී යාම ඉන්දියාවට දැඩි පීඩනයක් එල්ල කළේය.
කෙසේ වෙතත්, ඉෂාන් කිෂාන් එම පීඩනය තමන් වෙත නතු කර ගනිමින් අගනා ඉනිමක් දියත් කළේය. ඔහු පන්දු 40කදී හතරේ පහර 10ක් සහ හයේ පහර 3ක් සමඟින් ලකුණු 77ක් රැස් කරමින් ඉන්දීය ඉනිමේ පදනම දැමීය. අනතුරුව සූර්යකුමාර් යාදව් සහ තිලක් වර්මා සාර්ථක සබඳතාවක් ගොඩනැගූ අතර, මැදපෙළ කඩුලු කිහිපයක් ඉක්මනින් දැවී ගියද ශිවම් දූබේ සහ රින්කු සිං ඉනිම නිසි පරිදි අවසන් කළහ. ඒ අනුව ඉන්දියාව නියමිත පන්දුවාර 20 අවසානයේ ලකුණු 175ක් රැස් කළ අතර, එය ඉන්දු-පාකිස්ථාන T20 ලෝක කුසලාන ඉතිහාසයේ වාර්තා වූ ඉහළම ලකුණු සංඛ්යාවයි.
පාකිස්ථාන පිතිකරුවන් අසරණ වෙයි
ලකුණු 176ක ඉලක්කයක් හඹා යාමට පිටියට පිවිසි පාකිස්ථාන ඉනිමේ ආරම්භයම අසාර්ථක විය. හර්දික් පාණ්ඩ්යා යැවූ පළමු ඕවරයම ‘නිලකුණු ඕවරයක්’ (Maiden) වූ අතර එහිදී සාහිබ්සාදා ෆර්හාන් දැවී ගියේය. දෙවන ඕවරය යැවූ ජස්ප්රිත් බුම්රා, සයිම් අයුබ් සහ නායක සල්මන් අලි ආගා යන දෙදෙනාම දවා ගනිමින් පාකිස්ථානය අගාධයකට ඇද දැමීය.
උස්මාන් ඛාන් සටන්කාමී ඉනිමක් ක්රීඩා කරමින් ලකුණු රැස් කළද, අක්සාර් පටෙල්ගේ පන්දුවක් හමුවේ ඉෂාන් කිෂාන් අතින් ස්ටම්ප් කිරීමකට හසුව ඔහු දැවී යාමත් සමඟ පාකිස්ථානයේ බලාපොරොත්තු අත්හැරී ගියේය. අවසානයේ පාකිස්ථාන ඉනිම ලකුණු 114කට සීමා වූ අතර ඉන්දියාවට ලකුණු 61ක විශිෂ්ට ජයක් හිමි විය.
කෙසේ වෙතත් වේදනාවෙන් සටහන් කර තැබිය යුතු කාරණාවක් තිබේ. ක්රිකට් තරගයක වූ මහත්මා ගුණය මේ තරගයේ නොතිබිණි. තරගයට පෙර පැවති දැඩි මතභේදකාරී වාතාවරණය ඉහළ දේශපාලන තලයේ තීරණාත්මක වියවුලක් නිර්මාණය කර තිබුණේය. ඉන්දීය ක්රීඩකයින් මේ ගැටුම ප්රකාශනය කළ රූකඩ පමණක් වූ බව කිව යුතුව ඇත. පකිස්ථාන ක්රීඩකයින්ට අතට අත දීම වර්ජනය කිරීමට ගත් තීන්දුව සූරිය කුමාර් යාදේව් ගේ හෝ ක්රීඩා කණ්ඩායමේ ක්රීඩකයින්ගේ හුදකලා තීන්දුවක් නොව, ඉන්දියානු දේශපාලනයේ ඉහළම තළයෙන් ක්රීඩකයින් වෙත ලැබුණ නියෝගයක ඵලයකි.
ක්රීඩාවේ ආත්මීය ගුණය ආරක්ෂා කරගැනීමට අතට අත දීමට පකිස්ථානය සූදානමින් සිටියේය. එහෙත් ඉන්දීය දේශපාලනයේ ඉහළම තලය විසින් පටවනු ලැබූ තීන්දුව ප්රකාශ කළ ඉන්දීය ක්රිකට් කණ්ඩායම අවසානයේ දි නින්දාසහගත ගෝත්රික ස්වරූපයක් මහත්වරුන්ගේ ක්රීඩාවට එකතු කර තිබුණු බව පමණක් පෙනුනේය. තරගය ආරම්භයට පෙර හෝ අවසානයේ සුපුරුදු පරිදි ක්රීඩකයින් එකිනෙකාට ‘අතට අත නොදීම ක්රීඩා ලෝලීන්ට මහත් කම්පනයක් ගෙන දුන් බව ලියා තැබිය යුතුය.
තරගයේ ජය හෝ පරාජයට වඩා ප්රේක්ෂකයින් කම්පා කළේ මේ ගෝත්රික ප්රකාශනය බව කිව යුතුව ඇත.
