කුඩා දරුවන් 20 දෙනෙක් සහිත ශ්රී ලාංකික සංක්රමණිකයන් 303 දෙනෙක් සහිත බෝට්ටුවක් වියට්නාම මහුදු තීරයේ දී අනතුරට ලක් වූ පසු බේරා ගත් බව වියට්නාම බලධාරීහු අද (08) ප්රකාශ කළහ.
මියන්මාරයේ ධජය සහිත Lady 3 නැමැති මෙම ධීවර යාත්රාව වියට්නාමයේ දකුණු වෙරළ තීරයේ Vung Tau වරායේ සිට නාවික සැතපුම් 250 ක් පමණ දුරින් මෙම අනතුරට මුහුණ දී තිබිණු බව AFP පුවත් සේවය වාර්තා කරයි.
වියට්නාමයේ සමුද්රීය සෙවීම් සහ ගලවා ගැනීමේ සම්බන්ධීකරණ මධ්යස්ථානය මාධ්යයට ප්රකාශ කළේ බෝට්ටුව නාවික සැතපුම් 6,000 ක් පමණ ඔබ්බෙන් පිහිටි කැනඩාව දෙසට ගමන් කරමින් සිටින්නට ඇතැයි විශ්වාස කරන බවය.
” යාත්රාවෙ ප්රශ්නයක් ඇතිවෙලා තියනවා. එන්ජින් කාමරයට ජලය ගලා ඇවිත්. නොවැම්බර් 5 සිට ඔවුන්ට එය නිවැරදි කිරීමට නොහැකි වූ බව තමයි අනාවරණය වුනේ.” වියට්නාමයේ සමුද්රීය සෙවීම් සහ ගලවා ගැනීමේ සම්බන්ධීකරණ මධ්යස්ථානය කී බව ජාත්යාන්තර මාධ්ය වාර්තා කර තිබිණි.
ඊයේ ( 07) නැවේ කපිතාන්වරයා උදව් ඉල්ලා සිටීමෙන් පසු වියට්නාම බලධාරීන් ඒ අසලින් ගමන් කරමින් සිටි ජපන් ධජය සහිත නෞකාවකින් අනතුරට පත් මෙම ශ්රී ලාංකික පිරිස බේරාගන්න ලෙස ඉල්ලා ඇත.
ගලවා ගැනීමේ අවස්ථාව වන විට යාත්රාව පාවෙමින් තිබී ඇත. තැතිගැන්මට ලක් වූ පුද්ගලයන් රැසක් තට්ටුවේ රැස්ව සිටි බව ගලවා ගැනීමේ මධ්යස්ථානය පවසයි.
ළමුන් 20 දෙනෙකු ඇතුළු 303 දෙනාම ආරක්ෂිතව වියට් නාමයේ Vung Tau වරාය වෙත ගෙන එන ලද බව වියට්නාම් වාර්තා සඳහන් කරයි. .
විදේශ ණය බරින් මිරිකී සිටින ශ්රී ලංකාව, අත්යවශ්ය භාණ්ඩ ආනයනය කිරීම සඳහා විදේශ විනිමය අවසන් වීමෙන් පසු, අධික උද්ධමනය සහ විදුලිය ඇනහිටීම සමඟ ආහාර, ඉන්ධන සහ ඖෂධවල දැඩි හිඟයකට මාස ගණනාවක් සිට දෙන බවත් ඉන් බේරීම සඳහා ශ්රී ලාංකිකයන් රට හැර නීති විරෝධී ලෙස වෙනත් රටවලට සංක්රමණය වන බවත් විදෙස් මාධ්ය වාර්තා කර ඇත.
ශ්රී ලංකා නාවික හමුදාව පවසන්නේ අනතුරට පත් යාත්රාව ලංකාවේ ලියාපදිංචි යාත්රාවක් නොවන බවය. මෙම පිරිස වෙනත් රටකට ගුවන් මගින් ගොස් එතැන සිට මෙම යාත්රාවෙන් වෙනත් ගමනාන්තයක් සඳහා යමින් සිටි බවට සැක කරන්නේ යැයි නාවික හමුදාව කියයි.
විදේශ කටයුතු අමාත්ය ජනාධිපති නීතිඥ අලි සබ්රි මහතාද තහවුරු කළේ, ඔවුන් මෙරටට ගෙන්වාගැනීම සඳහා වියට්නාම බලධාරීන් සමග සාකච්ඡා අරඹා ඇති බවය.
