ශ්රේෂ්ඨාධිකරණය විසින් ලබා දුන් සංශෝධන 13 සහිතව නමුත් කාරක සභා අවස්ථාවේ දී විපක්ෂය ඉදිරිපත් කළ සංශෝධන 17න් 16ක් ඇතුළත් ප්රතික්ෂේප කර විදුලි බල පනත කාරක සභා අවස්ථාවේ දී සම්මත කරගැනීමට ආණ්ඩුව කටයුතු කළේය. ආණ්ඩුව එකඟ වුන එකම සංශෝධනයටත් එකඟ වන්නේ එම සංශෝධනය මුලින්ම ආණ්ඩු විසින් රැගෙන විත් තිබුණ බැවිනි.
වැදගත්ම කාරණාව වන්නේ විපක්ෂය ඉදිරිපත් කළ සංශෝධනවලින් පොදුවේ සියල්ලම ප්රතික්ෂේප වී තිබිය දීත් තෙවැනි වර කියැවීමට විපක්ෂය ඡන්දයක් ඉල්ලා නොතිබීමය.
කාරක සභා අවස්ථාවෙන් අනතුරුව කථානායකවරයා පාර්ලිමේන්තුවට දැනුම්දුන්නේ ශ්රී ලංකා විදුලිබල පනත් කෙටුම්පත තෙවන වර කියවීම සංශෝධන සහිතව සම්මත වූ බවය.
කාරක සභා අවස්ථාවේ දී විපක්ෂය මතු කළ වැදගත්ම කාරණා කීපයක් විය.
සමගි ජන බලවේගයේ පාර්ලිමේන්තු මන්ත්රී මෙන්ම ආර්ථික විශේෂඥයෙක් වූ ආචාර්ය හර්ෂ ද සිල්වා විසින් ඉදිරිපත් කළ කාරණාවක් විය. ඉන් කියවුනේ පනතින් අඛණ්ඩ විදුලි සැපයුම යන්න හැලී ඇති බවය. විදුලි සැපයුම පවත්වා ගැනීමේ වගකීම නිශ්චිත ලෙස පැවරීම සඳහා අඛණ්ඩ විදුලි බල සැපයුම පිළිබඳ අවධාරණය පැවති විදුලි පනත්වල ලේඛනය වූ ආකාරයත් හර්ෂ ද සිල්වා පෙන්වා දුන්නේය.
ඔහු ඉල්ලා සිටියේ මේ වනවිට විදුලි බල මණ්ඩලයේ වගකීම් ආයතනවලට කඩා පැවරීමට තීරණය වී ඇති බැවින් පනතට අඛණ්ඩ යන පදය එක් කර අඛණ්ඩ විදුලි බල සැපයුම සම්බන්ධව වගකීම තහවුරු කරන ලෙසය. එම වචනය පනතට ඇතුළු කිරීමට ද ඇමති කාංචන විජේසේකර විරුද්ධ විය. ඔ
එහිදී යළි යළිත් හර්ෂ ද සිල්වා පැවසුවේ මේ සිදුව ඇත්තේ මුද්රණ දෝෂයක් යැයි තමන් විශ්වාස කරන බවය. විදුලි බල මණ්ඩලය වෙන වෙන ආයතන ලෙස කඩා එහි කාර්යය සංකීර්ණ කර ඇති අවස්ථාවක අඛණ්ඩ විදුලි සැපයුම සම්බන්ධ වගකීම එම වගන්තිය ඇතුළත් කර එම ආයතන වෙත පවරන ලෙස ඉල්ලා සිටින්නේ දේශපාලන අර්ථයකින් නොවන බව ඔහු පැවසුවේය.
මේ තරම් පැහැදිලිව එය පෙන්වා දෙද්දීත් එම වචනය ඇතුළත් කිරීම ඇමතිවරයා දැඩිව ප්රතික්ෂේප කළේය.
මෙපමණ කාලයක් ජලාශවලින් ජලය මුදා හැරිමේ ප්රමුඛතාවය තිබුණේ පානීය ජල සැපයුම සහ කෘෂිකර්මාන්තය සඳහා ජලය සැපයුමටය. කෘෂි කර්මාන්තය යනු ගොවියා විසින් පුද්ගලිකව ආයෝජනය කර සිදුකරන රටේ ප්රධානම ආර්ථික ව්යාපාරය ය. ඒ සඳහා ජලය සැපයීමේ වගකීම රජයට පැවති අතර රටේ වාරි ශිෂ්ඨාචාරයේ පදනම වූයේ ද එම කෘෂි ජල සැපයුමය. මේ තත්ත්වය තුළ විදුලි ජනනය සඳහා ජලය නිකුත් කිරීම තුන්වන ප්රමුඛතාවය වූයේය.
එහෙත් ඒ ප්රමුඛතා විධිය බිඳ දමමින් විදුලි ජනනය කරන සමාගමට අදාල ජලාශවල කළමනාකරණය ද පැවරී තිබිණි. කෘෂි කර්මාන්තයේ ප්රමුඛතාවයෙන් මුදා ජලාශ සමාගම්වලට පැවරීම වැනි සංවේදී සංස්කෘතික කාරණා සම්බන්ධ ප්රමාණවත් සංවාදයක් නොකර ජලාශ විදුලි ජනන සමාගම් වෙත පැවරීම වැරදි බවත් එම ඓතිහාසික වරද නොකරන ලෙසත් බැගෑපත්ව ඉල්ලන බවත් නීතිඥ චන්දිම වීරක්කොඩි ඉල්ලා සිටියේය. එම ඉල්ලීම ද කාරක සභා අවස්ථාවේ දී ප්රතික්ෂේප විය.
කාරක සභා අවස්ථාව පුරා ප්රකට වූයේ විදුලි බල හා බල ශක්ති ඇමති කාංචන විජේසේකරගේ උද්දච්ඡ නිග්රහශීලී හැසිරීමය.
අදාල සැලසුම් අවුරුද්දක් තුළ ක්රියාත්මක කළ නොහැකි වීමේ අවදානම සලකා බලා එවැනි අවස්ථාවක කැබිනට් අනුමැතිය සහිතව තවත් කාලයක් දීර්ඝ කරගැනීමට දයාසිරි ජයසේකර කළ යෝජනාවත් ඇමති ප්රතික්ෂේප කළේය.
අනතුරුව කථානායක වරයා ශ්රි ලංකා විදුලිබල පනත් කෙටුම්පත තෙවන වර කියවීම සංශෝධන සහිතව සම්මත වූ බව පැවසුවේය. විපක්ෂය ඡන්දයක් ඉල්ලුවේ නැත. පනත සම්මත වන්නේ ඡන්දයකින් තොරවය.
