කීර්ති ප්රනාන්දු –
අගරදගුරු මැල්කම් කාදිනල් රන්ජිත් හිමිපාණන් වතිකානුවේ සංචාරයක් සඳහා දිවයිනෙන් පිටත් වී ගොස් තිබේ.
මේ පිළිබඳව කළ විමසීමකදී කොළඹ අගරදගුරු පදවි ජන සන්නිවේදන අධ්යක්ෂ ජූඩ් ක්රිෂාන්ත පියතුමන් පැවසුවේ වාර්ෂිකව පාප්වහන්සේ බැහැ දැකීමේ චාරිත්රය සිදුකිරීම පසුගිය දෙවසර තුළ කොවිඩ් වසංගතයත් සමග සිදුනොවුණු නිසා මේ වසරේ එම අවස්ථාව උන්වහන්සේ විසින් ලබා ගත් බවය.
එහෙත් වතිකානු ගමනට ප්රථම කතෝලික අගරදගුරු සම්මේලනය නිවේදනයක් නිකුත් කරමින් කියා සිටයේ පාස්කු ප්රහාරය සඳහා මේ රට තුළ සත්ය ඉටුවෙතැයි තව දුරටත් විශ්වාසයක් නැති බැවින් ජාත්යාන්තර වශයෙන් කරන මැදිහත්වීමක අවශ්යතාවය කාදිනල් තුමා ඇතුළු ශ්රී ලංකා අගරදගුරු සම්මේලනය නැවතත් දැඩිව අවධාරණය කරන බවය.
සත්ය පමාවීම පමණක් නොව සත්ය වසන් කිරීමටත්, දේශපාලන වාසි සඳහා පාස්කු ඝාතන ප්රයෝජනයට ගැනීමට සහ ප්රශ්නය සංකීර්ණ කිරීමටත් උත්සාහයක් ඇතැයි පෙනෙන්නට තිබෙන බැවින් වින්දිතයන්ට යුක්තිය සහ සාධාරණය ඉටු කිරීම සඳහා ජත්යාන්ත සහය ගැනීම හැර වෙන විකල්පයක් නොදකින්නේ යැයි ද එම විකල්පය ක්රියාත්මක කිරීමට අවධාරණය කරන්නේ යැයි ද එම නිවේදනයේ දක්වා තිබිණි.
මේ ගමනේ මුඛ්ය අරමුණ මෙම ජාත්යාන්තර සහාය ලබාගැනීමදැයි විමසු විට කොළඹ අගරදගුරු පදවි ජන සන්නිවේදන අධ්යක්ෂ ජූඩ් ක්රිෂාන්ත පියතුමන් කීවේ මෙම වාර්ෂික සම්ප්රදායික ගමනක් මිස උක්ත කරුණම මුල් කරගෙන සිදුකළ සංචාරයක් නොවන බවය.
එහෙත් පාස්කු ප්රහාරයේ වින්දිතයන් වෙනුවෙන් පාප්වහන්සේ හමුවී කෙරෙන සාකච්ඡාවේ දී අනිවාර්යයෙන්ම කථිකාවට ලක් කරනු ඇති බව පියතුමා කියා සිටියේය.
