මනම්පිටිය නිමල් ජයරත්න –
මඩකලපුව කාත්තන්කුඩි පූනච්චිමුනේ ගම්මානයේ, නිවාසයක වහලයකට 16 දහවල් එල්ල කර ඇත්තේ ජීව අත් බෝම්බයක් බවට සැකකරන බව කාත්තන්කුඩි පොලිසිය කියයි.
මෙම පිපිරීමෙන් එම නිවසේ වහලයට හානි සිදුවී ඇති අතර ප්රහාරය සිදුවන විට එම නිවසේ මව ඇතුළු දරුවන් තිදෙනෙකු සිට ඇති බවට තොරතුරු අනාවරණය වී ඇති බවද පොලිසිය කියයි.
අත්බෝම්බය වහලය උඩ පිපිරීම හේතුවෙන් ඔවුනට කිසිදු තුවාලයක් සිදුවී නොමැති බවද පොලිසිය කියයි.
පෞද්ගලික ආරවුලක් මත මෙම ජීව අත්බෝම්බය වහලට එල්ල කර ඇති බවට සැකකරන අතර නිශ්චිත වශයෙන් ඊට හේතුව කිව නොහැකි බවද, ඒ පිළිබඳ පරීක්ෂණ සිදුකරන කාත්තන්කුඩි පොලිසියේ නිලධාරියකු අප කළ විමසීමකදී පැවසීය.
අත් බෝම්බයන් පුපුරන අවස්ථාවේ නිවසේ පියා ධීවර කටයුතු සඳහා ගොස් ඇති අතර මෙම අත්බෝම්බ ප්රහාරය එල්ල කළ පුද්ගලයා අත්අඩංගුවට ගැනීම සඳහා ආරක්ෂිත කැමරා පරික්ෂා කරමින් සිටින බවත්, එම පුද්ගලයා ඉතා කඩිනමින් අත්අඩංගුවට ගැනීමට හැකියාව පවතින බවත් කාත්තන්කුඩි පොලිසිය පවසයි.
මෙම අත්බෝම්බ ප්රහාරය පිළිබඳව වැඩිදුර පරීක්ෂණ කාත්තන්කුඩි පොලිසිය විසින් සිදු කරයි.
