තව දින කීපයක් තුළ වී සදහා සහතික මිල ප්රකාශයට පත්කර වී මිලදී ගැනීම වී අලෙවි මණ්ඩලය හරහා ආරම්භ කරන බව කෘෂිකර්ම නියෝජ්ය අමාත්ය නාමල් කරුණාරත්න ප්රකාශ කළේය.
ඔහු මේ බව ප්රකාශ කරන්නේ රජයේ සහිතක මිල ප්රකාශ නොකිරීමත් සමගම දැඩි ලෙස කඩා වැටුන වී මිල පිළිබඳව දිස්ත්රික් ගණනාවක ගොවි සංවිධාන විසින් චෝදනා එල්ලකරමින් තිබෙද්දීය.
මේ සම්බන්ධව නියෝජ්ය අමාත්යවරයා මාධ්යවෙත පැවසුවේ මෙවැන්නකි.
” දැනට තැන තැන ගොයම් කැපෙන්නේ. පොලොන්නරුවේ තව ගොයම් කපන්න මාසයක් යනවා. උතුරු පලාතේ මාසයක් යනවා. මහා වාරිවල ගොයම් කැපෙන්නේ පෙබරවාරි 15න් පස්සේ. සුළු වාරිවල පොඩ්ඩක් ගොයම් කැපෙනවා.”
“මේ වෙලාවේ ගොවියන්ට වී විකුණා ගන්න බැරි ප්රශ්නයක් ඇතිවෙලා නෑ. මිල පිළිබඳ ප්රශ්නයක් නෑ. අපි මැදිහත් වෙන්නේ ගොවියට වී විකුණා ගන්න බැරි ප්රශ්නයක් එනවා නම් සහ මිල පිළිබඳ ප්රශ්නයක් එනවා නම්. ”
“කොහොමත් මේක අපි කල් අල්ල අල්ල ඉන්නේ නෑ. තව දවස් කීපයක් යනකොට තියන තත්ත්වයන් උඩ රජයේ මිල අපි නියම කරනවා. ”
කෙසේ වෙතත් පොලොන්නරුවේ මේ වනවිට කැපෙමින් ඇති අස්වැන්නෙහි වී කිලෝවක් අලෙවි වන්නේ රුපියල් සියය එකසිය දහය අතර බව අප වාර්තාකරුවෝ පවසති.
අනුරාධපුර සුළු පරිමාණ මෝල් හිමියන් මාධ්යයට ප්රකාශ කරන්නේ තෙත් වී කිලෝව මිලදී ගන්නේ රුපියල් 105කට බවය. වියලි වී කිලෝව රුපියල් 120කට අලෙවි වන බව ඔවුහු කීහ.
“140කට වී මිලදී ගන්නේ නෑ. දැනට සති දෙකකට පෙර එවැනි තත්ත්වයක් තිබුණා. නමුත් දැන් ඉතාම පහළට වැටිලා. ” ඔවුහු කීහ.
කෙසේ වෙතත් වෙළෙඳ ඇමති වසන්ත සමරසිංහ පෙන්වා දෙන්නේ රාජ්ය මැදිහත්වීමෙන් රාජ්ය ගබඩා තුළ රැස්කරගත හැකි වී ප්රමාණය සමස්ථ අස්වැන්නෙන් සියයට 10ක් පමණක් බවය.
