අයර්ලන්තයත් එක්ක දිනුම්ය. ඕමානය එක්ක හොඳටම දිනුම්ය. ඒත් තවම ලෝක කුසලානයේ හරි තරගයක් පටන් ගත්තේ නැත. ඒ නිසා මේ ගහන ගැහිල්ල ගැන සතුටක් තිබුණත් ඉදිරියේ ඇති තරග අතර මහ දෙයක් කරනු ඇතැයි යන්න පිළිබඳව පොදුවේ රටට ලොකු විශ්වාසයක් නැත. මේ සටහන තබන්නේ ඒ ඇත්ත අවංකවම ලියා තබලාය.
පල්ලෙකැලේ ක්රීඩාංගණයේදී අද පැවති කණ්ඩායම් මට්ටමේ තරගයක දී ඕමානය ලකුණු 105කින් පරදා විශාල ජයක් වාර්තා කිරීමට ශ්රී ලංකා කණ්ඩායම සමත් විය. පිත්තෙන් මෙන්ම පන්දුවෙන් ද සාර්ථක වූ ශ්රී ලංකා ක්රීඩකයෝ මෙවර තරගාවලියේ මෙතෙක් වාර්තා වූ ඉහළම ලකුණු සංඛ්යාව ද තමන් සතු කරගත්හ.
කාසියේ වාසිය දිනූ ඕමාන කණ්ඩායම පන්දු රැකීම තේරුවේය. පන්දුවට පහර දුන් ශ්රී ලංකා පිල නියමිත පන්දු වාර 20 අවසානයේ කඩුලු 05ක් දැවී ලකුණු 225ක දැවැන්ත ලකුණු පුවරුවක් නිර්මාණය කළහ. මෙය ශ්රී ලංකාව විස්සයි-20 ලෝක කුසලාන ඉතිහාසයේ වාර්තා කළ දෙවන ඉහළම ලකුණු සංඛ්යාව ද වේ.
පැතුම් නිශ්ශංක ලකුණු 13කට සහ කමිල් මිෂාර ලකුණු 08කට දැවී ගොස් ලකුණු පුවරුව ලකුණු 42ට කඩුළු 2ක් ලෙස සටහන් වී තිබෙද්දී කුසල් මෙන්ඩිස් හ පවන් රත්නායක ශ්රී ලංකා කණ්ඩායම ඉහළ ස්ථාවරයක තැබීමට සමත් විය. කුසල් මෙන්ඩිස් පන්දු 48කදී ලකුණු 61ක් රැස් කළ අතර, මැදපෙළ පිතිකරු පවන් රත්නායක පන්දු 28කදී වේගවත් ලකුණු 60ක් ලබා ගත්තේය. තුනවන කඩුල්ල වෙනුවෙන් ඔවුන් දෙදනා අතර ගොඩනැගුන සම්බන්ධතාවය ලකුණු 94කි.
මෙම ඉනිමෙහි කැපී පෙනෙනම පිතිහරඹය දියත් කළේ නායක දසුන් ශානකය. ඔහු පන්දු 19කදී සිය අර්ධ ශතකය සම්පූර්ණ කරමින් ශ්රී ලංකා ක්රීඩකයෙකු විස්සයි-20 ජාත්යන්තර තරගයකදී රැස් කළ වේගවත්ම අර්ධ ශතකයේ වාර්තාව අලුත් කළේය. මින් පෙර එම වාර්තාව තිබුණේත් දසුන් ශානකගේ නමටය. ශානක සහ කුසල් මෙන්ඩිස් එක්ව ඉනිමේ අවසන් පන්දු වාර 5 තුළදී ලකුණු 66ක් උදුරා ගැනීමට සමත් වූහ.
පන්දු යැවීමේ දී ඕමානය වෙනුවෙන් ජිතෙන් රාමනන්දි කඩුළු 02ක්, සුෆියාන් මහ්මුද් සහ ජායි ඔඩෙඩ්රා කඩුල්ලක් බැගින් ලැබූහ.
ලකුණු 226ක දැවැන්ත ඉලක්කයක් හඹා ගිය ඕමාන කණ්ඩායමට පන්දුවාර 20 අවසානයේ රැස් කරගත හැකි වූයේ කඩුලු 7කට ලකුණු 120ක් පමණි. ආරම්භක පන්දු යැවූ දුෂ්මන්ත චමීර සිය ප්රථම ඕවරයේ දීම කඩුල්ලක් දවාගනිමින් ඕමාන පසුබැස්ම ආරම්භ කළේය.
වනිඳු හසරංගගේ අඩුව මැනවින් පුරවමින් ක්රියාත්මක වූ කණ්ඩායමේ ජ්යෙෂ්ඨ දඟ පන්දු යවන්නා වූ මහීෂ් තීක්ෂණ පන්දු වාර 4ක් යවා ලකුණු 11කට කඩුලු 2ක් දවා ගැනීමට සමත් විය. එය මෙවර ලෝක කුසලානයේ මෙතෙක් පන්දු වාර 4ක් යවා වාර්තා වූ ලකුණු ගණනක් ලබා දුන් පන්දු යැවීම ලෙස සටහන් විය.
ඕමානය වෙනුවෙන් මොහොමඩ් නදීම් ලකුණු 50ක් රැස් කළේය. , ඒ අනුව විස්සයි-20 ලෝක කුසලාන ඉතිහාසයේ අර්ධ ශතකයක් රැස් කළ වයස්ගතම ක්රීඩකයා ලෙස ඔහු වාර්තා අතරට එක් විය. නදීම්ගේ දැන් වයස අවුරුදු 43 යි දින 161කි. ඔහු ලකුණු 53ක් ලැබුවේ නොදැවීය.
පන්දු යැවීමේ දී ශ්රී ලංකාව වෙනුවෙන් දුෂ්මන්ත චමීර, මහීෂ් තීක්ෂණ, කඩුළු 02 බැගින් ද, දුනිත් වෙල්ලාලගේ, දුෂාන් හේමන්ත, කමිඳු මෙන්ඩිස් කඩුල්ල බැගින් ද ලැබූහ. තරගයේ වීරයා බිඳ වැටුන ශ්රී ලංකා ඉනිමට කර ගසා පන්දු 28ක දී ලකුණු 60ක් රැස් කළ පවන් රත්නායකය ය.
යළිත් වරක් ලියා තැබිය යුතුව ඇත. ඕමානයට එරෙහිව නම් ශ්රි ලංකා කණ්ඩායම දැන් දිනුම්ය. මේ ලෝක කුසලානය තුළ ඇෆ්ගනිස්ථානය පමණක් නොව, නේපාලය වැනි රටවල්ද දක්වන සටන්කාමී අත් නොහරින ක්රීඩා විලාශය මවිත කරවන සුලු බව ලියා තැබිය යුතුය. ඇත්ත තරග තවම පටන් ගත්තේ නැති නිසා අප කුල්මත් වීමට ඉක්මන් නොවන බව ලියා තැබිය යුතුය.
