සිංගප්පූරු ධජය යටතේ භාණ්ඩ රැගෙන යාත්ර කරමින් තිබියදී ඉකුත් වසරේ මැයි මස 20 වැනිදා මෙරට මුහුදු සීමාවේදී ගිලී ගිය එම්.වී එක්ස්ප්රස් පර්ල් බහාලුම් ප්රවාහන නෞකාව හේතුවෙන් මුහුදු තීරයට හා වෙරළ තීරයට සිදුවූ පරිසර හානිය ගණනය කර සකස්කළ පළමු අතුරු වාර්තාව නෞකා අනතුරු වන්දි ලබාගැනීම පිළිබඳ විශේෂඥතාවයක් සහිත ඕස්ට්රේලියානු නීතිඥ ආයතනය වෙත යවා තිබෙන බව සමුද්රීය පරිසර ආරක්ෂණ අධිකාරියේ සභාපතිනී නීතීඥ දර්ශනී ලහදපුර පැවසුවාය.
එම ආයතනයෙන් උපදෙස් ලැබුණු පසු නීතිපති දෙපාර්තමේන්තුව සමඟ එක්ව ඉදිරි නීතිමය පියවර ගන්නා බවද ඇය සඳහන් කළාය.
මෙම නෞකාව ගිලී යෑමෙන් නිකුත්වූ ප්ලාස්ටික් හා අපද්රව්ය ඉවත්කොට වෙරළ තීරය පිරිසිදු කිරීමේ කටයුතු වෙනුවෙන් නෞකාවේ රක්ෂණ සමාගමෙන් රුපියල් බිලියන 1.3 ක මුදලක් මහා භාණ්ඩාගාරයට ලැබී ඇතැයි ද ඇය කීවාය.
එම මුදලින් අදාල ගෙවීම් කටයුතු පියවීම සදහා රුපියල් 903,857,293 ක මුදලක් මහාභාණ්ඩාගාරයෙන් ඉල්ලමින් ඉදිරිපත් කරන ලද කැබිනට් පත්රිකාවට මේ වන විට අනුමැතිය ලබා දී ඇති බවද ඇය කීවාය.
එමෙන්ම මුහුදු පත්ලේ ගිලී ඇති එක්ස්ප්රස් පර්ල් නෞකාව ගොඩ ගැනීමේ කටයුතු නැව අයිති සමාගම විසින් චීන සමාගමක් වෙත පවරා තිබෙන බව කී සමුද්රීය පරිසර ආරක්ෂණ අධිකාරියේ සභාපතිනිය එම චීන සමාගම පසුගිය කාලයේදී මෙරටට පැමිණ නැව ගොඩ ගැනීමේ මූලික කටයුතු ආරම්භ කළ බවද කීවාය.
එහෙත් වාරකන් කාලයේදී මුහුද රළුවීම හේතුවෙන් නැව ගොඩගැනීමේ කටයුතු මේ වන විට තාවකාලිකව නතර කර තිබෙන බවත් මෙම වසරේ නොවැම්බර් මාසයේදී එම කටයුතු නැවත ආරම්භ කරනු ඇති බවත් ඇය සඳහන් කළාය.
සිංගප්පූරු ධජය යටතේ භාණ්ඩ රැගෙන යාත්ර කරමින් තිබූ එම්.වී එක්ස්ප්රස් පර්ල් බහාලුම් ප්රවාහන නෞකාව කොළඹ වරායට නාවික සැතපුම් 9ක් දුරින් නැංඟුරම් ලා තිබියදී ඉකුත් වසරේ මැයි මස 20 වැනිදාය ගිනි ගැනීමකට ලක්වූ අතර ජුනි මස 02 වැනිදා මුහුදුබත් විය.
නෞකාවේ ගබඩාකර තිබූ නයිට්ර්ක් අම්ල හේතුවෙන් මෙම ගිනි ගැනීම සිදුවූ අතර නැව මුහුදු බත්වීමට පෙර ඇතිවූ පිපිරීමක් හේතුවෙන් එහි තිබූ බහාලුම් 1486 න් යම් ප්රමාණයක් මුහුදට වැටුණි.
මෙම බහාලුම්වල තිබූ රසායනික ද්රව්ය හා ප්ලාස්ටික් පබළු මුහුදු ජලය සමඟ මිශ්ර වීමෙන් මන්නාරම සිට හම්බන්තොට කිරින්ද දක්වා වූ කිලෝමීටර 746 ක මුහුදු කලාපය සම්පූර්ණයෙන්ම දූෂණයට ලක්විය.
එම්.වී එක්ස්ප්රස් පර්ල් නෞකාවෙන් විසිරුණු අපද්රව්ය හේතුවෙන් අපවිත්රවූ වෙරළ තීරය පිරිසිදු කිරීමේ කටයුතු පසුගිය වසරේ මැයි මස 20 වැනිදා සිට මේ දක්වා සිදු කරනු ලබයි.
මේ වනවිට ස්ථාන 2723 කදී එම පිරිසිදු කිරීම් කටයුතු සිදුවන අතර එමඟින් කිලෝමීටර 746 ක දුර ප්රමණයක් ආවරණය කරනු ලබයි.
