එක්සත් ජනපද ජනාධිපති ඩොනල්ඩ් ට්රම්ප් විසින් පනවන ලද නව අන්යෝන්ය තීරු බදු හේතුවෙන් පැන නැඟිය හැකි ගැටලු පිළිබඳව ගැඹුරින් අධ්යයනය කර රජයට නිර්දේශ ඉදිරිපත් කිරීම සඳහා ජනාධිපති අනුර කුමාර දිසානායක මහතා විසින් කමිටුවක් පත් කර ඇත.
ඒ අනුව මුදල් අමාත්යාංශයේ ලේකම්, මහබැංකු අධිපති, ශ්රී ලංකා ආයෝජන මණ්ඩලයේ සභාපති, ශ්රී ලංකා අපනයන සංවර්ධන මණ්ඩලයේ සභාපති, විදේශ අමාත්යාංශයේ ආර්ථික කටයුතු පිළිබඳ අධ්යක්ෂ ජනරාල් යන නිලධාරීන්ද, ජනාධිපති ජ්යෙෂ්ඨ ආර්ථික උපදේශක දුමින්ද හුලංගමුව , ශ්රී ලංකා වාණිජ මණ්ඩලයේ ප්රධාන ආර්ථික ප්රතිපත්ති උපදේශක ශිරාන් ප්රනාන්දු සහ අෂ්රොෆ් ඔමාර්, ෂෙරාඩ් අමලීන්, සයිෆ් ජැෆර්ජී මෙම කමිටුව සඳහා පත් කරනු ලැබ තිබේ.
අමෙරිකානු ජනාධිපති ඩොනල්ඩ් ට්රම්ප් විසින් ශ්රී ලංකාවෙන් ආනයනය කරන භාණ්ඩ සඳහා සියයට 44ක තීරු බද්දක් පැනවීමට තීරණය කර එය ඊයේ (02) ප්රකාශයට පත්කර ඇති අතර අනිද්දා (05) දිනයේ සිට එම බදු පැනවීම ක්රියාත්මක වීමට නියමිතව තිබේ. එය රටට බරපතල අර්බුදයක් වන්නේ ශ්රී ලංකාවෙන් වැඩිම ඇගලුම් අපනයනයන් සිදුකරනුයේ අමෙරිකාවට වීමය.
නව බදු ප්රතිපත්තියට අනුව සියලුම ආනයන සඳහා සියයට 10ක තීරු බද්දක් ඇතුළත් වන අතර අමෙරිකා එක්සත් ජනපදය සමග වෙළෙඳ අතිරික්තයක් පවත්වාගෙන යන රටවල් සඳහා ඉහළ තීරු බද්දක් ප්රකාශයට පත්කර තිබේ.
ඒ අනුව ශ්රී ලංකාවට පනවා ඇති සියයට 44ක තීරු බද්ද අදාල බදු පැනවීම් කර ඇති ලෝකයේ රටවල් 60කට වැඩි ප්රමාණය තුළ ඉහළම තීරුබදු පැනවූ රටවල් පහ අතරට ඇතුළත්ය. වැඩිම බද්ද වන සියයට 49 පනවා ඇත්තේ කාම්බෝජයටය. වියට් නාමයට සියයට 46කි. ලංකාවට සියයට 44කි. බංගලාදේශයට සියයට 34කි. චීනයට පනවා ඇත්තේ සියයට 36ක තීරු බද්දකි.
