නවක ශිෂ්ය භික්ෂූන් වහන්සේලාහට නවක වදය ලබා දීමේ චෝදනාව මත දස නමකට වසර එක හමාරේ සිට වසර දෙකක් දක්වා කාල සීමාවකට පනවා ඇති පන්ති තහනම ඉවත් කර ගැනීම ඇතුළු ඉල්ලීම් කීපයකට විසදුම් නොදී සිටින ශ්රී ලංකා භික්ෂු විශ්වවිද්යාලයේ උප කුලපති ජ්යෙෂ්ඨ මහාචාර්ය පූජ්ය කනත්තෙගොඩ සද්ධා රතන නාහිමියන් සිය ධූරයෙන් ඉල්ලා අස්වන තෙක් එම විශ්ව විද්යාලයේ ශිෂ්ය භික්ෂුන් වහන්සේලා විසින් ඊයේ (07) රාත්රියේ සිට අනුරාධපුර නව පුත්තලම් පාරේ පිහිටි එම විශ්වවිද්යාලයීය නව පරිශ්රය ඉදිරිපිටදී අඛණ්ඩ සත්යග්රහයක් ආරම්භ කොට ඇත.
උපකුලපති ස්වාමින් වහන්සේ විසින් ක්රියාත්මක කරනු ලබන බව කියන අත්තනෝමතික පරිපාලනය හේතුවෙන් අධ්යාපනය ලබන ස්වාමීන් වහන්සේලා දැඩිසේ පීඩාවට පත්ව සිටින බවත් එම විශ්ව විද්යාලයේ අධ්යාපනය ලබන ස්වාමීන් වහන්සේලා දස නමකට පදනම් විරහිතව පන්ති තහනමක් පනවා ඇති බවත් එම විශ්වවිද්යාලයේ ශිෂ්ය භික්ෂු සංගමයේ ලේකම් පූජ්ය කරගම්පියේ සිරිසුමන හිමියෝ පැවසූහ.
තම ඉල්ලීම් සහ ශිෂ්ය හිමිවරුන් මුහුණ පා ඇති ගැටළු පිළිබඳව විශ්වවිද්යාල පරිපාලනය සමඟ සාකච්ඡා කොට විසඳා ගැනීමට අවස්ථා කිහිපයකදී උත්සාහ කළද ඉන් කිසිදු විසදුමක් නොලැබුණ බවත් ඒ අනුව ඊයේ (07) පස්වරුවේ සිදුකළ සාකච්ඡාවද අසාර්ථක වීම හේතුවෙන් ඊට එරෙහිව විරෝධතා ක්රියාමාර්ගයකට එළඹීමට සිදුවූ බවත් උන්වහන්සේ පැවසූහ.
මේ අතර උන්වහන්සේ සිය ඉල්ලීම් වලට ඇහුම්කන් නොදෙන උපකුලපති ස්වාමීන් වහන්සේ එම ධූරයෙන් ඉවත්වන තෙක් අඛණ්ඩව මෙම ශිෂ්ය උද්ඝෝෂණය අඛන්ඩව ක්රියාත්මක කරන බවත් උන්වහන්සේ වැඩිදුරටත් පැවසූහ.
