වසරකට ගල් අඟුරු නැව් 32ක් අවශ්ය බවත්, එම නැව්වල ගල් අඟුරු ගොඩබා ගැනීම අප්රේල් මස 15න් පෙර ගොඩබෑම සිදුකළ යුතු නමුත් දැනට රට තුළට පැමිණ ඇත්තේ ගල් අඟුරු නැව් 05ක් පමණක් බව මහජන උපයෝගීතා කොමිසමේ සභාපති ජනක රත්නායක මාධ්යය අමතා පැවසීය.
මේ තත්ත්වය තුළ ඉදිරි මාස හතර තුළ දින 05කට වරක් නැවක් ගෙන්වා ගත්ත ද රටතුළට ඇතුළු කරගත හැක්කේ නැව් 20ක් පමණක් බව පෙන්වාදෙන සභාපතිවරයා මේ තත්ත්වය තුළ මේ වසරේ ජනවාරියේ තිබුණාක් බඳු විදුලි කප්පාදුවක් ඇතිවීම නොවැලැක්විය හැකි බව පෙන්වා දුන්නේය.
ඉදිරි විදුලි කප්පාදුව සහ විදුලි බිල ඉහළ දැමීම සම්බන්ධයෙන් සිවිල් සංවිධාන සමග පැවැති සාකච්ඡාවකින් පසු මාධ්ය වෙත අදහස් දක්වමින් ජනක රත්නායක මෙසේ ද පැවසීය.
“ගල්අඟුරු අගෝස්තු මාසයේ සිට අද දක්වා අපිට ඇවිල්ලා තියෙන්නේ ගල්අඟුරු නැව් 5යි. තව එකක් එන්නට තියෙනව තව සුමාන දෙකක් ඇතුළත. ඒ නිසා තමයි අපි නිර්දේශයක් නිකුත් කළේ, ලංකා විදුලි බලමණ්ඩලයට නොරොච්චෝලයේ බලාගාර 3ම පාවිච්චි නොකර දෙකක් පමණක් පාවිච්චි කරලා ඊළඟ නැව එනතුරු මේ කළමනාකරණය කරගෙන යන්න ඕනේ කියලා. “
“දැන් ප්රශ්නය තියෙන්නේ ඉතිරි නැව් 32ක. අපිට අවුරුද්දකට නැවු 38ක් ඕනේ. දැනට 6ක් ඇවිල්ලා තියෙනවා. ඉතිරි 30ක් හරි 31ක් හරි ගෙන්න ගන්නවානම් එහෙම අපිට තියෙන ප්රශ්නය තමයි ජනවාරි මාසයේ සිට අප්රේල් මාසයේ 15 වනදා වෙනතුරු විතරයි අපිට ගෙන්න ගන්න පුළුවන්. අපිට දවස් 5කට සැරයක් නැවක් ගෙන්න ගත්තොත් අපිට නැවු 20කට වඩා ගෙන්න ගන්න බැහැ. මොකද අපිට තියෙන කාලය මාස 4කට සීමා වෙලා තියෙන්නේ. “
“ඒ අනුව ලබන අවුරුද්දේ අනිවාර්යෙන්ම ගල්අඟුරු අවශ්ය සංචිත ප්රමාණය නැතිවීමේ අවදානමකට අපි ලක්වෙලා තියෙනවා. ඒ අවදානම නිසා තමයි ගල් අඟුරු නැති වුණොත් එහෙම නැවතත් මේ අවුරුද්දේ අර ජනවාරි මාසයේ තිබුණා වගේ දිර්ඝ කාලීන විදුලි කප්පාදුවකට යනවා කියන එකේ පදනමක් තියෙනවා.”
