සැඟවී සිටින සැකකරුවන් සහ සැකකාරියන් සඳහා සමස්ථ පොලිස් දෙපාර්තමේන්තුව මේ වනවිට රතු නිවේදන 40කට ආසන්න ප්රමාණයක් නිකුත් කර ඇති බවත්, 2025 වසරේ දී පමණක් මේ වනවිට රතු නිවේදන නිකුත් කළ සැකකාර අපරාධකරුවන් 18ක් රට තුළට රැගෙන ඒමට හැකි වී ඇති බවත් පොලිස් මාධ්ය ප්රකාශක එෆ්.යූ.වුට්ලර් මාධ්ය වෙත පැවසුවේය.
ඔහු මේ බව පැවසුවේ අද (14) පොලිස් මූලස්ථානයේ සංවිධානය කළ මාධ්ය හමුවක් සඳහා එක් වෙමිනි. එහිදී පොලිස් මාධ්ය ප්රකාශකවරයා ඉෂාරා සෙව්වන්දි අත් අඩංගුවට ගැනීම සඳහා දියත් කළ රහසිගත මෙහෙයුම ගැන ද කරුණු අනාවරණය කළේය.
ඔහු කීවේ නේපාලයේ දී ඉෂාරා සෙව්වන්දි අත් අඩංගුවට ගැනීම සඳහා දින දෙකකට පෙර විශේෂ පොලිස් කණ්ඩාමක් නේපාලය බලා පිටත්වූ බවය.
ඉෂාරා සෙව්වන්දිට එරෙහිව රතු නිවේදනයක් නිකුත් කර තිබුණු බව කී පොලිස් මාධ්ය ප්රකාශකවරයා මේ අත් අඩංගුවට ගැනීම ඉතාම රහසිතගතව කළ දීර්ඝ සැලසුමක ප්රතිඵලයක් බව කීවේය.
මෙම සැලසුම දියත් කිරිමේ දී නේපාල රජය සහ පොලිස් දෙපාර්තමේන්තුව විසින් ලංකාවට ලබා දුන් විශේෂ සහයෝගය ගැන පොලිස් මාධ්ය ප්රකාශකවරයා කීවේය. ආණ්ඩුවේ ප්රබල රාජ්ය තාන්ත්රික මැදිහත්වීම් සහ පොලිස්පතිවරයාගේ නායකත්වයත් ඔහු විසින් සිහි කළේය.
නේපාලයේ රජයේ සහාය සහිතව ලබා ගත් පරිගණක දත්ත විශ්ලේෂණ සහ භූමියේ ඇති බුද්ධි තොරතුරු මත ක්රියාත්මක වී ශ්රී ලංකා අපරාධ පරීක්ෂණ දෙපාර්තමේන්තුව සහ බුද්ධි අංශ නේපාල පොලිස් දෙපාර්තමේන්තුවේ මූලිකත්වයෙන් මෙම මෙහෙයුම දියත් කළ බව කී මාධ්ය ප්රකාශකවරයා අපරාධ පරීක්ෂණ දෙපාර්තමේන්තුවේ සැලසුම් සහ පොලිස් කණ්ඩායමේ කැපවීම සම්බන්ධව ද ස්තුතිය පල කළේය.
ඉදිරි දින කීපය තුළ ඔවුන් ලංකාවට රැගෙන එන බව කී ඔහු පෙන්වා දුන්නේ සැකකරුවන් ගෙන්වා ගැනීමට හැකි වී ඇත්තේ උදර්පන නීතිය හරහා රටවල් ගිවිසුම්ගතව සිටින තත්ත්වයන් යටතේ බවය.
