මනම්පිටිය නිමල් ජයරත්න –
පොලොන්නරුව අරලගංවිල 503 කුඩාඔය අමුණේ සිට 503 කුඹුරු යායට ජලය රැගෙන යන බෝක්කුවක් තුළ අද 08 උදෑසන මාස 7ක පමණ අලි පැටවෙකු සිරවීමෙන් මියගොස් ඇති බව වෙහෙරගල වනජීවී නිළධාරීහු පැවැසූහ.
07 වැනිදා උදෑසන එම අලි පැටියා තවත් අලි රෑනක් සමග කුඹුරුයායේ සැරිසරමින් සිට ඇති අතර අලි පැටියා ඇළට වැටීමත් සමග ඇතින්න අලි පැටියා බේරා ගොඩට ගැනීමට උත්සාහ දැරීවුද ජලයේ සැඩපහරට ගසාගෙන ගොස් බෝක්කුවක සිර වූ බව ගොවි මහතෙකු ශ්රී ලංකා මහවැලි අධිකාරියේ විජයබාපුර මහවැලි කොට්ඨාසය කාර්යාලයේ නිලධාරීන්ට දැනුම් දී ඇත.
ඒ අනුව වහා ක්රියාත්මක වූ ශ්රී ලංකා මහවැලි අධිකාරියේ විජයබාහුපුර මහවැලි කොට්ඨාස කාර්යාලයේ නිළධාරීන් කිහිපදෙනෙකු, වනජීවීන් නිලධාරින්ද දැනුවත් කර එම ස්ථානයට ගොස් අලිපැටියා බෝක්කුබටයෙන් ගොඩගැනීමට පැය කිහිපයක් උත්සාහ දැරුවද එයා අසාර්ථක වී ඇත.
පැය කිහිපයකට පමණ පසු අලිපැටියා මියගිය බව මහවැලි අධිකාරියේ නිලධාරියකු සඳහන් කළේය.
වෙහෙරගල අඩවි ආරක්ෂක ඩබ්ලිව්.ජී. වීරසේන සඳහන් කළේ ගිරිතලේ වනජීවී පශු වෛද්ය සමීර කලිඟුආරච්චි මෙම සිද්ධිය පිළිබඳව දැනුවත් කර ඇති බවත් ඔහු පැමිණීමෙන් පසු 8 වෙනිදා දහවල් අලිපැටියා පිළිබඳ පශ්චාත් මරණ පරීක්ෂණයෙන් අනතුරුවව අවසන් කටයුතු කිරීමට සිදු කටයුතු කරන බවත්ය.
