සර්ව පාක්ෂික ආණ්ඩුවක් පිහිටුවීම සඳහා ජනාධිපතිවරයා කැඳවා ඇති පක්ෂ නායක රැස්වීමට සහභාගී වීමට ශ්රීලනිප, විමල්, ගම්මන්පිල, කණ්ඩායම ඇතුළත්වන දේශපාලන පක්ෂ 11 සහ ආණ්ඩුවේ සිට ස්වාධීන වූ කණ්ඩායම තීරණය කර ඇත.
ඔවුන් මෙම තීරණය ගනු ලැබුවේ අද (28) සවස පැවති විශේෂ සාකච්ඡාවකින් අනතුරුවය. සර්ව පාක්ෂික රජයක් පිහිටුවීමට මෙම පිරිස ජනපතිවරයා හමුවන්නේ අගමැති කිසිසේත්ම ඉල්ලා අස්නොවන බවට අද කණ්ඩායම් රැස්වීමේ දී එළිපිටම ජනපතිට ප්රකාශ කිරීමෙන් අනතුරුව වීම විශේෂත්වයකි.
අගමැතිවරයා සමග රජය ඉවත් වී නව අන්තර්වාර පාලනයකට ඉඩ ලබා නොදී තමන්ට 113ක බලය පාර්ලිමේන්තුවේ ඇති බව ප්රකාශ කරන අගමැතිවරයාගේ බල රහිත බව පෙන්වීමට විශ්වාසභංග යෝජනාවකට යා යුතු තැනකට ප්රශ්නය තල්ලු වී තිබෙද්දී ජනාධිපතිවරයාට ඍජු තීන්දුවක් නොගන්නා වටපිටාවක මේ හමුවීම සිදුවීමට නියමිතව ඇත.
කෙසේ වෙතත් සර්ව පාක්ෂික ආණ්ඩුවක් පිහිටුවීම සම්බන්ධව ශ්රී ලංකා නිදහස් පක්ෂය ප්රමුඛ දේශපාලන පක්ෂ 11 විසින් කළ යෝජනාව ජනාධිපතිවරයා පිළිගෙන ඇති බැවින් අන්තර්කාලීන ආණ්ඩුවකින් වත්මන් අර්බුදයට පිළිතුරු සෙවීමේ ප්රවේශයට තවමත් ඉඩ කඩ ඇතියි යන විශ්වාසයෙන් යුතුව මෙම සාකච්ඡාවට සහභාගීවන බව එම කණ්ඩායමේ ප්රකාශකයෙක් ලංකාසරට පැවසීය.
කෙසේ නමුත් සර්ව පාක්ෂික ආණ්ඩුවක් පිහිටුවීම සම්බන්ධව ජනාධිපතිවරයා කර තිබෙන ආරාධනය විපක්ෂයේ දේශපාලන පක්ෂ කීපයක් ප්රතික්ෂේප කර තිබේ.
මේ අනුව ශ්රී ලංකා නිදහස් පක්ෂය ප්රමුඛ දේශපාලන පක්ෂ 11 සහ ස්වාධීන වූ කණ්ඩායම සර්ව පාක්ෂික ආණ්ඩුවක් පිහිටුවීමට එකඟතාවය පලකර ඇත්තේ වත්මන් විධායක ජනාධිපතිවරයා එම ධුරයේ කටයුතු කරද්දීය.
