ජාතික ජන බලවේගයේ නායක අනුර දිසානායක යාපනයේදී සිදු කළ ප්රකාශය ජාතිවාදී ප්රකාශයක් නොවන බවත් අනුර කුමාර දිසානායක සමග එක්ව මුළු රටම බලාපොරොත්තුවන වෙනස කිරීමට තමන් ද සූදානම් බවත් තමිල් අරුසු කච්චි පක්ෂයේ පාර්ලිමේන්තු මන්ත්රී එම්.ඒ සුමන්තිරන් ප්රකාශ කරයි.
ඔහු මේ බව පැවසූවේ පසුගිය 05 වනදා වව්නියාව, කිලිනොච්චිය සහ යාපනයේදී පැවති ජාතික ජන බලවේගයේ රැලිවලදී ජනාධිපති ධුර අපේක්ෂක අනුර කුමාර දිසානායක සිදු කළ ප්රකාශයකට ප්රතිචාර දක්වමින් ජනාධිපති රනිල් වික්රමසිංහ සිදු කළ කතාව ගැන පැහැදිලි කිරීමක් කරමිනි.
ඊයේ ජනාධිපති රනිල් වික්රමසිංහ යාපනයේ දී ජනතාව අමතමින් අනුර දිසානායක යාපනයට පැමිණ තමන්ට ඡන්දය නුදුනොත් බලගන්නවා යැයි පවසමින් උතුරේ ජනතාවට තර්ජනය කළ බවත් සිංහල ජනතාවගේ නම කැත කළ එම තර්ජනයට අනුර දිසානායක උතුරේ සහ දකුණේ ජනතාවගෙන් සමාව ගත යුතු බවත් ප්රකාශ කළේය.
මෙම ප්රකාශය සම්බන්ධව සිය මතය පල කරමින් පාර්ලිමේන්තු මන්ත්රී එම්.ඒ සුමන්තිරන් මෙසේ පැවසුවේය.
“අපි බලාපොරොත්තු වන වෙනස, ජනතා විමුක්ති පෙරමුණත් එක්ක එකතු වෙලා අපි බලාපොරොත්තු වන වෙනස කොහොමත් එනවා කියලා. අනුර කුමාර දිසානායක සහෝදරයා දින්නොත් අපි ඒ වෙනසට කොටස් කරුවෙකු ලෙස අපි ඉන්නවා. අපි ඒකෙන් ඈත් වෙලා ඉන්නේ නෑ. “
“එතුමා කීව දේ ජාතිවාදී ලෙස සලකන්න එපා. මං එයාව හොඳටම දන්නවා. එතුමා ඒ අදහසින් කීවේ නෑ කියලත් මම විශ්වාස කරනවා. නමුත් මැතිවරණ කාලයේ දී මේවා වෙන්න පුළුවන්. නමුත් ඒ වෙනස වංචාවක් නැතිව, අල්ලස් නැතිව තියන රටක්, ඒ වගේම හැම ජනතාවම ආණ්ඩු කිරීමට අත දාලා ක්රියාත්මක කරන්න පුළුවන් වෙනස කරන්නට අපි නිතරම බැඳිලා ඉන්නවා. අපි එතුමාත් එක්ක එතුමාගේ පක්ෂයත් එක්ක කොයි ආකාරයෙනුත් එකතු වෙලා කටයුතු කරන්න අපි සූදානම්.”
එම්.ඒ සුමන්තිරන් මන්ත්රීවරයා පැවසුවේය.
