අන්තර් විශ්වවිද්යාලීය ශිෂ්ය බලමන්ඩලය ඇතුළු බහු ජන සිවිධාන විසින් දියත් කළ විරෝධතා පාගමනට සෞන්දර්ය හා රංග කලා විශ්වවිද්යාලය ඉදිරිපිට දී ජල හා කඳුළු ගෑස් ප්රහාරයක් එල්ල කර පලවා හැරීමට රජය කටයුතු කළේය.
පුරා දින 150ක් තිස්සේ අත්තනෝමතිකව ත්රස්තවාදය වැළැක්වීමේ පනත යටතේ රඳවාගෙන සිරගත කර සිටින වසන්ත මුදලිගේ නිදහස් කරගැනීම එහි මූලික අභිලාෂය විය.
වසන්ත මුදලිගේ අත්තනෝමතික ලෙස රඳවා තබා ගැනීම ශ්රී ලංකා රජය වහාම අවසන් කළයුතු බව ජාත්යන්තර මානව හිමිකම් සංවිධාන 7ක් අද (16) අවධාරණය කර තිබිණි.
ඇම්නෙස්ටි ඉන්ටර්නැෂනල්, මානව හිමිකම් සහ සංවර්ධනය සඳහා වූ ආසියානු සංසදය (FORUM-ASIA), CIVICUS, පෙරටුගාමී ආරක්ෂකයින් (Frontline Defenders), හියුමන් රයිට්ස් වොච්, ශ්රී ලංකාව පිළිබඳ ජාත්යන්තර ක්රියාකාරී කණ්ඩායම, සාමය සහ යුක්තිය සඳහා වූ ශ්රී ලංකා ව්යාපාරය යන සංවිධාන ඒ අතර විය.
අදාළ ජාත්යන්තර මානව හිමිකම් සංවිධාන 07 ඒකාබද්ධ ප්රකාශයක් නිකුත් කරමින්, පෙන්වා දී තිබුනේ අවිහිංසාවාදී විරෝධතාවලට සම්බන්ධ ශිෂ්ය ක්රියාකාරිකයෙකු අත්තනෝමතික මෙලෙස රඳවා තබා ගැනීම සඳහා ත්රස්ත මර්දන නීති අනිසි ලෙස භාවිතා කිරීම ප්රකාශනයේ නිදහස, ඇසුරු කිරීම සහ සාමකාමී රැස්වීම යන අයිතිවාසිකම් කෙරෙහි දැඩි බලපෑමක් ඇති කරන බවය.
රජයට එරෙහි විරෝධතාකරුවන් “ත්රස්තවාදීන්” සහ “ෆැසිස්ට්වාදීන්” බවටත්, පවතින ආර්ථික අර්බුදය මධ්යයේ යළි විරෝධතා මතුවුවහොත් හදිසි නීතිය සහ හමුදාව යළි යොදවන බවටත් ජනාධිපතිවරයා තර්ජනය කර ඇතැයිද අදාළ සංවිධාන විසින් පෙන්වා දී ඇති බව බීබීසිය වාර්තා කළේය.
මේ ජනතා උද්ඝෝෂණය සංවිධානය කළ අන්තර් විශ්වවිද්යාල ශිෂ්ය බල මණ්ඩලය සහ මහජන ක්රියාකාරිකයින් ගේ අභිලාෂයන් අතර අතර බඩු මිල බදු බර අඩු කරගැනීම, පාසල් උපකරණවල මිල පහත හෙළා ගැනීම, සමාජ ක්රියාකාරීන් මර්ධනයට එරෙහිවීම, ශිෂ්ය නායකයින් දඩයම නවත්වා අත්අඩංගුවට ගත් සියලුම ක්රියාකාරීන් නිදහස් කරගැනීම ද විය.
කෙසේ වෙතත් කොළඹ මාර්ග අවහිරකර උද්ඝෝෂණ පැවැත්වීම වළක්වමින් අධිකරණ නියෝග ලබා ගැනීමට පොලිසිය කටයුතු කර තිබිණි.
පොලිස් මාධ්ය ප්රකාශක ජ්යෙෂ්ඨ පොලිස් අධිකාරී නීතිඥ නිහාල් තල්දූව බීබීසී සිංහල සේවය සමග කියා තිබුණේ කොම්පඤ්ඤ වීදිය හා මරදාන පොලිස් ස්ථාන මගින් එම අධිකරණ නියෝග ලබා ගෙන ඇති බවය.
ඒ අනුව යුනියන් පෙදෙස දෙසින් ගාලුමුවදොරට ඇතුලුවීම තහනම් කරමින් කොම්පඤ්ඤ වීදීය පොලිසිය අධිකරණ නියෝගයක් ලබා ගෙන තිබිණි.
කොළඹ රෝහල් චතුරශ්රය හා අවට රෝහල්වලට බාධාවක් වන පරිදි ඩීන්ස් පාර – සීමන් හංදිය දක්වා මාර්ග සහ පදික වේදිකා භාවිත කළ නොහැකි පරිදි අවහිර කරමින් පවත්වන උද්ඝෝෂණ හා පෙළපාලි තහනම් කරමින් මරදාන පොලිසිය විසින් ද අධිකරණ නියෝගයක් ලබා ගෙන ඇති බව පොලිස් මාධ්ය ප්රකාශකවරයා කීවේය.
විරෝධතාවය කුළුගැන්වෙමින් තිබිය දී දැවැන්ත පොලිස් ප්රහාරක බලකායක් සහ කැරළි මර්ධන ඒකකයේ පිරිසක් යොදවා මෙම විරෝධතා ව්යාපාරයට පහර දී විසිරුවා හරිනු ලැබුවේය.
