මනම්පිටිය නිමල් ජයරත්න –
කුඩා ඩිමෝ බට්ටා ලොරි රථයකින් පොළොන්නරුව – හබරණ ප්රධාන මාර්ගය ඔස්සේ දඹුල්ල ආර්ථික මධ්යස්ථානයට කෙසෙල් හා කොස් රැගෙන යමින් සිටි පුද්ගලයෙක් පොළොන්නරුව, හබරණ ප්රධාන මාර්ගයේ හබරණ 7 කණුව දේවාලය ආසන්නයේදී අද උදෑසන 6ට පමණ හබරණ කැලේ වන අලියෙකුගේ ප්රහාරයට ලක් වීමෙන් මිය ගොස් තිබේ.
මින්නේරිය පොලිසිය පවසන්නේ මෙම වන අලි පහරදීමෙන් මියගොස් ඇත්තේ වෙළඳාම ජීවන වෘත්තිය කරගත් පොලොන්නරුව 4 ඇල ප්රදේශයේ පදිංචිව සිටි අහිංසක පුද්ගලයෙක් බවය.
එම කුඩා ලොරි රථය මින්නේරිය දෙස සිට දඹුල්ල දෙසට ධාවනය වී ඇති අවස්ථාවේ එක්වර වන අලියෙකු ලොරි රථය ඉදිරිපිටට පැමිණ ඇති අතර එම අවස්ථාවේ ලොරි රථයේ රියදුරු කලබලවීම හේතුවෙන් මාර්ගයේ ලොරි රථය එකවර නතර වී ඇත.
ඉන් අනතුරුව ඔහු ලොරි රථයෙන් පැනගොස් බේරී ඇති අතර පසුව වන අලියා විසින් ලොරි රථය ඒ අසල පිහිටි හබරණ රක්ෂිතයේ බෑවුමකට පෙරලා තිබේ.
ඉන් අනතුරුව වන අලියා විසින් ලොරි රථයේ ගමන් කල පුද්ගලයාට පහර දී ඝාතනය කර ඇති බව පොලිසිය කියයි.
වන අලියා පහරදීමෙන් ලොරි රථය හබරණ රක්ෂිතයේ බෑවුමකට පෙරලීගොස් තිබූ අතර එහි රැගෙන යමින් තිබූ කොස් කෙසෙල් රක්ෂිතය පුරා විසීරී ගොස් තිබිනි.
වන අලි පහරදීමෙන් මියගිය පුද්ගලයාගේ මෘත ශරීරය හිඟුරක්ගොඩ මූලික රෝහලේ තබා ඇති අතර මේ පිලිබඳ වැඩිදුර පරීක්ෂණ කටයුතු මින්නේරිය පොලීසිය විසින් සිදු කරයි.
