පැවති පාර්ලිමේන්තුව අපරාධකරුවන්ගේ මධ්‍යස්ථානයක් බවට පත්ව තිබුණ බැවින් මේ මහ මැතිවරණයෙන් පසු රැස්වන අලුත් පාර්ලිමේන්තුවට අපරාධකරුවන් එවීමෙන් වලකින ලෙස ශ්‍රී ලංකාවේ ජනතාවගෙන් විවෘත ඉල්ලීමක් කර සිටින බව ජනතා විමුක්ති පෙරමුණේ නායක අනුර කුමාර දිසානායක පැවසුවේය. ඔහු මේ බව ප්‍රකාශ කළේ අනාගත පාර්ලිමේන්තුව හා රටේ වත්මන් තත්වය පිළිබඳව කොළඹ දී පැවති මාධ්‍ය හමුවකට එක්වෙමිනි.
කිසිදු දැනුමක් අවබෝධයක්, හැකියාවක් නැති කුඩු කාරයින්, ගංජාකාරයින්, එතනෝල් කාරයින්, ස්ත්‍රී දූෂකයින්, වැනි අපරාධ කරුවන් නැවත වරක් පාර්ලිමේන්තුව නියෝජනය කිරීම සඳහා එවීමෙන් ජනතා අපේක්ෂාවන් කිසිවක් අලුත් පාර්ලිමේන්තුවෙන් ද ඉටු නොවනු ඇතැයි ඔහු පෙන්වා දුන්නේය.
මහින්ද රාජපක්ෂ හා රනිල් වික්‍රමසිංහ පාලන සමයන්හි චෝදනා ලැබූ කිසිවෙක් මේ මැතිවරණයේ දී ඉවත්කර නැති බවත් මෙවර ඒ සියලු දෙනාටම නාම යෝජනා ලැබී ඇති බවත් පවසන ජනතා විමුක්ති පෙරමුණු නායකයා නැවත එවැනි අය පත්කර ගනිමින් රට විනාශයකට ඇද දමනවාද, එසේත් නොමැති නම් උගත්, බුද්ධිමත්, පිරිසිදු කණ්ඩායමක් අලුත් පාර්ලිමේන්තුවට පත්කරගෙන වැටී ඇති රට ගොඩ නගනවාද යන්න මෙරට ජනතාව තීරණය කළ යුතු බවය.
පාර්ලිමේන්තුව කෙරෙහි ජනතාව තුළ පැවති විශ්වාසය අද වනවිට මුලුමනින්ම බිඳවැටී තිබෙන බව ජනතා ක්‍රියාකාරකම් වලින් සනාථ වන බවත්, එය කොතෙක් ද කියනවා නම් රටේ යම් ව්‍යසනයක් සිදු වුවහොත් ඒ ව්‍යසනය පාර්ලිමේන්තුවට සිදු විය යුතු බවට ප්‍රාර්ථනා කරන මනෝභාවයක් වෙත ජනතාව ඇද දමා ඇති බවත් ඔහු පැවසීය.
අලුත් පාර්ලිමේන්තුව ප්‍රතිපත්ති ගරුක අයගෙන් පිරවීම යුගයේ අවශ්‍යතාවය වී තිබෙන අතර මෙතෙක් පාර්ලිමේන්තුට පැමිණි පුද්ගලයන් අති බහුතරයක මේ ප්‍රතිපත්ති ගරුක ස්වරූපය නොමැති වීම නිසා රට මේ ඛේදනීය තත්වයට පත් වී ඇති බවත් අනුර කුමාර දිසානායක පෙන්වාදුන්නේය. අලුත් පාර්ලිමේන්තුව ප්‍රතිපත්ති ගරුක, රටට වැඩදායි අයගෙන් පිරවිමට නම් මේ මැතිවරණයේ දී ජාතික ජනබලවේගය ශක්තිමත් කළ යුතු බවට ඔහු යෝජනා කළේය.
“ පහුගිය තීරණාත්මක ඡන්ද විමසීම් සිදුවන අවස්ථාවේ දී අපි දැක්කා මුදට විකිණෙමින් හතර අතට පනින මන්ත්‍රීවරු. එය හරියට කොටස් වෙළෙඳපල වැනි තත්වයක්. අද වනවිට අශිෂ්ඨත්වයේ කේන්ද්‍රය බවට පත් වී ඇති පාර්ලිමේන්තුව ශිෂ්ඨත්වයේ කේන්ද්‍රය බවට පත් කළ යුතුයි. එසේ කිරීමට නම් පැවති පාර්ලිමේන්තුවේ සිටි හොර තක්කඩි අපරාධකරුවන් එවීමෙන් වැලකී සිටීමේ වගකීම ජනතාවට තියනවා. “
ජනතා විමුක්ති පෙරමුණේ නායක අනුර කුමාර දිසානායක පැවසීය.
Discussion about this post