ඇල්ප්ස් කඳු මත මියුරු කිරි රස උපදවන ස්විස් ගොවියන් දුටුවෙමි.

සුනේත්‍රා ඇතුගල්පුර-

ජායාරූප – ශෂි සුබ්‍රමනියම් –

ස්විට්සර්ලන්තය කියූ සැණින් අප මනසේ රැඳෙන චිත්‍රය වන්නේ තාක්ෂණය අතින් ඉතා දියුණු, නවීන ගොඩනැගිලි හා සුපිරි තාක්ෂණික සම්පත් වගේම සොබා දහමේ දායදයක් සේ ලත් මනරම් කඳු ශිඛරසහිත රටකි .එරට කොතරම් ආර්ථික හා තාක්ෂණික අතින් දියුණු වූවත් සැලකිය යුතු ස්විස් ජාතිකයෝ පිරිසක් තවමත් ගැමියන් ලෙස ජීවත් වෙති.  ඒ බව ඔබ නොදන්නවා නිසැකය. කිරි ගොවීන්වන ඔවුන් වැඩි පිරිසක් ජීවත් වන්නේ ඇල්ප්ස් කඳු වැටි ආශ්‍රිතවය. ඇල්ප්ස් කඳු ආශ්‍රිත ස්විස් ගැමියන්ගේ මනරම් දිවි පෙවෙත   අද සිට ලිපි පෙළක් සේ ඔබ වෙත ඉදිරිපත් කිරීමට අපි බලාපොරොත්තු වෙමු.

මාටින් සහ රෙබෙකා…

මාර්ටින් සහ රෙබෙකා යුවලට බොහෝ කිරි ගොවීන්ට මෙන්ම අඩුම තරමින් නිවාස දෙකක් තිබේ. ගිම්හාන ඍතුව ආරම්භයත් සමඟ උදාවන ඇල්ප්ස් සමය ගත කිරීම සඳහා ඔවුහු සිය දරු දෙදෙනා සමඟ ජූනි මැද සතියෙ ලහිලහියේ සූදානම් වෙති. ඔවුන් දැනට පදිංචිව සිටින්නේ ග්ලාරුස් පළාතේ ලින්තාල් ගම්මානයේය .

සියයකට ආසන්න එළදෙනුන් හා ගවයින් ද, දහයකට ආසන්න ඌරන්ද ඊට  අමතරව බූරුවන් දෙදෙනක් ද මේ දෙපලට සිටී. තවද එක් සුනඛයකු වේ.  කුකුළන් හා කිකිළියන් රැසක් වේ. රෙබෙකා හා මාටින් මේ සියලු සතුන් පෝර්ඩෙය දුර්ප් නක්තාල් කඳු වැටිය වෙත රැගෙන යායුතුය..

ඇල්ප්ස් කඳු වැටිය ආශ්‍රිත මාර්ගය අනාරක්ෂිත වීම නිසා හෙලිකොප්ටරයක් ආධාරයෙන් ගවයන් තිස් දෙදෙනෙකු ප්‍රවාහනය කිරීම පිළිබඳව මීට පෙර අපි ඔබට කීවෙමු . එහෙත් මේ දෙපළට එවැනි අසීරුතාවයකට මුහුණ පෑමට සිදුවන්නේ නැත. ඒ එම කඳු වැටිය දක්වා ගමන් කිරීමට මාර්ගයක් ඇති නිසාය.

ජුනි මාසය ස්විට්සර්ලන්තයට ග්‍රීස්ම සෘතුවේ (ගිම්හාන සෘතුව ) පළමු මාසය වුවත් කල්ගතවන තුරු මේ වකවානුවේ   කාලගුණය හැම විටම උෂ්ණාධික වන්නේ  නැත. බොහෝ විට වැසි වසියි. කඳු පාමුල සිටින අපට වැසි වසින විට කඳු මුදුනට ස්වාභාවිකවම ලැබෙන්නේ හිම හිමපතනයකි.   ඇත්තෙන්ම ඒ දේශගුණය සීත සෘතුවට නොදෙවෙනිය. මේ තත්වය ඇත්තෙන්ම ඇල්ප්ස් ගොවීන් මුහුණදෙන විශාල අභියෝගයකි .

සතුන් ප්‍රවාහනය

මේ සොඳුරු ස්විස් ගැමියන් ඇල්ප්ස් කඳුමත ගෙවන සොඳුරු දිවිය දකින්නට අවස්ථාව උදා කර ගතිමු. ඒ මාටින් හා දරුපවුල සමග ඔවුන්ගේ ගමනට එක් වීමෙනි.

ඇල්ප්ස් කඳු පාමුල සිට ඉහළට ගවයින් හා එළදෙනුන් ප්‍රවාහනය සඳහා මාර්ටින් විසින් රථ දෙකක් සූදානම් කොට තිබිණි.  ගවයින් සියලු දෙනා එක්වර මෙම රථ දෙකෙන් ඉහළට රැගෙන යා නොහැකිය. ඒ සඳහා වාර කිහිපයක් ඉහළට හා පහළට ගමන් කළ යුතුය. මාර්ටින් සිය බිරිය, දරු දෙදෙනා හා බල්ලා සමග මුලින්ම ඔවුන්ගේ දෙවන නවාතැන් පොළ වෙත ළඟා වූයේය. අනතුරුව ඔවුන්ගේ කාර්යය වන්නේ ප්‍රවාහනය කරන ගවයින් ඒ ඒ බිම් කඩ වලට ගාල් කිරීමය.

හිරු එළියෙන් නැහැවෙන ඇල්ප්ස් කඳුවැටිය මනරම්ය. ඒ කිරි ගොවීන්ට පමණක් නොව සතා සිවුපාවට පවා දැනෙන සුවයකි. ඇතැම් ගවයින් ඇල්ෆ් කඳු මුදුනේ ජීවිතයට කෙතරම් කැමැත්තක් දක්වන්නේද යන්න, උන් උඩට ප්‍රවාහනය කළ රථයෙන් එළියට පැන දුවන ආකාරයෙන් පෙනී යයි .

ඇල්ප්ස් කඳු මුදුනේ වැවෙන තෘණ විශේෂිතය. ඒ  නැවුම් තෘණ මේ සතුන්ට අතිශයින්ම ප්‍රියය. තණකොල සමග ස්වභාවිකම වැවී ඇති ඖෂධීය පැළෑටි ආහාරයට ගැනීමට, ගවයින් වැඩි කැමැත්තක් දක්වන බව ඇල්ප්ස් වාසී ගොවීහු අපට කියා දුන්හ.

මේ තෘණ ආහාරයට ගැනීම නිසා  කිරි එළදෙනුන් උපදවන කිරි ද ඉහළ ප්‍රමිතයෙන් යුතුය. නැවුම් ප්‍රනීත රසයකින් යුතුය. ඇල්ප්ස් ගොවීන්ගේ කිරි අස්වැන්න වැඩි ඉල්ලුමක් සහිත විශේෂිත එකක් සේ සැලකෙන්නේ ඒ නිසාය.

මීළඟට කිරි දෙවීම හා චීස් නිෂ්පාදනය පිළිබඳ තොරතුරු බලාපොරොත්තුවන්න..