මළ මිනී පසුකර මර හඬ අසමින් රුසියානු හමුදා කියෙව් අගනුවර අසල…

ආක්‍රමණය ඇරඹී දින 17කි. රුසියානු හමුදා යුක්රේනයේ අගනුවර වන කියෙව් තෙ සමීප වෙමිනි. අනෙකුත් ප්‍රධාන නගරවලට ඔවුන්ගේ ප්‍රහාර වේගවත් කර තිබේ.

ඊයේ වනවිට අවම වශයෙන්  සිවිල් යුක්රේන වැසියන් 549 දෙනෙකු ජීවිතක්ෂයට පත්ව ඇති බව එක්සත් ජාතීන්ගේ සංවිධානය කියයි.  ඉන් 41 දෙනෙකු ළමුන්ය. මානව හිමිකම් පිළිබඳ එක්සත් ජාතීන්ගේ මහ කොමසාරිස් කාර්යාලයට අනුව අවම වශයෙන් තවත් සිවිල් වැසියන් 957 දෙනෙකු තුවාල ලබා ඇත. සත්‍ය සංඛ්‍යාලේඛණ මීට වඩා සැලකිය යුතු වැඩි බව කියැවේ. මරියුපොල්හි ළමා රෝහලටක බෝම්බ ප්‍රහාරයක් එල්ල වී තිබිණි. ලක්ෂ විස්සකට ආසන්න යුක්රේන ජාතිකයන් රට හැර ගොස්ය.

බ්‍රිතාන්‍ය ආරක්ෂක නිලධාරීන්ට අනුව රුසියානු ගොඩබිම් හමුදාවන්ගෙන් වැඩි ප්‍රමාණයක් කියෙව් සිට කිලෝ මීටර 25ක් නුදුරෙනි.

රුසියානු මිසයිල සහ ගුවන් ප්‍රහාර සෙනසුරාදා අලුයම  යුක්රේනයේ  උතුරු සහ දකුණු අගනුවර ප්‍රදේශවලට බරපතල හානි සිදුකර තිබිණි.  කාර්කිව්, මරියුපොල්, මිකොලාව්, සමී නගර නිරන්තර දැඩි ප්‍රහාරයකට ලක්වය. එක්සත් ජනපදයේ ආරක්ෂක තොරතුරු අනුව දකුණු කර්සන් නගරය මේ වනවිට රුසියානු හමුදාව අතේය. දකුණු යුක්රේනයේ මිලිටොපොල් නගරයේ නගරාධිපති අයිවන් ෆෙඩෝරොව් දැන් රුසියානු හමුදා අත්අඩංගුවේය. ඔහු අත්අඩංගුවට පත්වන්නේ ඊයේය. ඊට එරෙහිව සිවිල් වැසියෝ සිය ගණනක් අද විරෝධතාවයක නිරතවූහ.

කියේව් අගනුවර සිට කිලෝමීටර් 100 ක් පමණ උතුරින් පිහිටි චර්නිහිව්   නගරයේ භූ ලකුණක් වන ප්‍රකට    යුක්රේන  හෝටලය  එක රැයකින් විනාශ වී ඇත.

“මම දැන් මෙහි ඉන්නවා. මෙතන තවදුරටත් හෝටලයක් නෑ..,” චර්නිහිව් කලාපයේ පරිපාලන ප්‍රධානී  විචෙස්ලාව් චවුස්   අද උදේ සී.එන්.එන්. වෙත පැවසීය.

රුසියානු හමුදා චර්නිහිව් නගරයට ගුවන් සහ මිසයිල ප්‍රහාර දිගටම එල්ල කරමින් ඉන්නවා. සිවිල් වැසියන් මිය යමින් ඉන්නේ.  බොහෝ දෙනෙක් තුවාල ලබලා. හමුදාවක් නොමැති සිවිල් යටිතල පහසුකම්වලට ඔවුන් ෂෙල් වෙඩි ප්‍රහාර එල්ල කරනවා. ” පරිපාලන ප්‍රධානියා කීවේ එසේය.

චර්නිහිව් සතියකට වැඩි කාලයක් රුසියානු හමුදා විසින් වට කරගෙන සිටියේය.   නගරයේ සිට නිකුත්වන  වීඩියෝ දර්ශවලින්  මිසයිල සහ ගුවන් ප්‍රහාර නිසා සිදුවී ඇති විශාල හානි පෙන්නුම් කරයි.

නගරයට “විදුලිය නෑ. ජලය, ගෑස් සහ තාපය නැති තරම්”, සිකුරාදා විදුලිය යථා තත්ත්වයට පත් කිරීමට ගත් උත්සාහයන් සාර්ථක වුනා.   “සතුරා නැවතත් විදුලි සැපයුම් පද්ධතියකට පහර දුන්නා”   චාවුස් පැවසීය.

කියේව් හි දකුණේ වසිල්කිව් හි සිට නිකුත් වූ සමාජ මාධ්‍ය වීඩියෝවක අද අලුයම ඉන්ධන ගබඩාවක් ගිනි ගැනීමෙන් ඇතිවූ  මහා ගින්නක දර්ශන හුවමාරු වුනේය.  රුසියානු ගුවන් ප්‍රහාරවලින්    එහි හමුදා ගුවන් තොටුපළට දැඩි ලෙස හානි වී තිබිණි..

නගරයේ නගරාධිපති නතාලීයා බැලසිනොවිච්  සිය සමාජ මාධ්‍ය ගිනුමේ මෙසේ පල කර තිබිණි.

“අද උදේ 7 ට පමණ සතුරු හමුදා වැසිල්කිව් නගරයට ෂෙල් වෙඩි ප්‍රහාර එල්ල කළා. මිසයිල 8 ක්   ගුවන් තොටුපළට  එල්ල කළා. මිසයිල ප්‍රහාර හේතුවෙන් ගුවන් තොටුපළ සම්පූර්ණයෙන්ම විනාශ වුනා. ධාවන පථය සම්පූර්ණයෙන්ම විනාශයි.”

” ඔවුන් පතොරම් ගබඩාවක් ද පුපුරුවා හැරියා. එක් මිසයිලයක් පතොරම් ගබඩාවේ වැදීම නිසා තවමත් පතොරම් පුපුරුනවා.. “  ඇය පැවසුවාය.

ඉන්ධන සහ ලිහිසි තෙල් ගබඩාව ද විනාශ වී ඇත. මේ නිසා අපේ ගුවන් මුලුමනින්ම විනාශයි.”

රුසියානු ආරක්ෂක අමාත්‍යාංශය මීට පෙර ප්‍රකාශ කර තිබුණේ අධි නිරවද්‍ය දිගු දුර ආයුධයකින් වැසිල්කිව් හි හමුදා ගුවන් තොටුපළට පහර දුන් බවය.

එහෙත් සටන අත් නොහැර යුක්රේන හමුදා මව් බිම බේරාගන්නා අරගලයක. පහත දැක්වෙන්නේ සන් පුවත් සේවය කියෙව් අසල සටන් වදිනා යුක්රේන හමුදා සම්බන්ධයෙන් පල කළ වීඩියෝවකි.

( සී.එන්.එන් සහ අල් ජසීරා ඇසුරිනි)