මනම්පිටිය නිමල් ජයරත්න –
ලෝකය දියුණු බව සැබෑය. එහෙත් දිඹුලාගල තවමත් හද්ද වන්නිය ය. වන්නියේ දරුවන්ට ඉංග්රීසිය හීනයකි. ඉංග්රීසි ගුරු පුරප්පාඩු රැසක් දිඹුලාගල කලාපයේ හැමදාම තිබුණේය. වන්නියට ඇවිත් දරුවන්ට ඉංග්රීසි ටික උගන්වා දීම වෙනුවෙන් කැපකිරීමක් කළ හැකි අපේ ඇත්තන් ද අල්පය. එවැනි මහා බරසාර මානුෂික අදහස් මිනිස්සුන්ගේ හිත්වල ඉස්සර පැලපදියම් වී තිබුණාට දැන් ඒවා ක්රමයෙන් හායනය වෙමින්ය.
එවැනි වටපිටාවක ඉංග්රීසි ඉගැන්වීමේ ව්යාපෘතියක් අරගෙන සුරංගනාවියන් තිදෙනෙක් දිඹුලාගලට ඇවිත් තිබිණි. ඔවුන් අපේ රටෙන් බොහෝම දුර බැරහැර රටවල තරුණියන්ය. සරසවි තරුණියන්ය. තරුණියන් දෙදෙනෙක් ඉතාලියේ ය. අනෙක් තරුණිය නේපාලයේ ය. මාස දෙකක නොමිලේ ස්වේච්ඡාවෙන් ඉංග්රී ඉගැන්වීමේ ව්යාපෘතියත් අරගෙන මේ සුරංගනාවියන් තුන් දෙනා පැමිණ තිබුණේ දිඹුලාගල අධ්යාපන කලාපයේ දිඹුලාගල කාශ්යප මහා විද්යාලයටය.
මේ ව්යාපෘතිය සංවිධානය කර තිබුනේ ලෝක සරසවි සිසු ප්රජාව නියෝජනය කරන අන්තර්ජාතික සංවිධානයක්වන අයිසෙක් සංවිධානය විසිනි. කැලණිය විශ්වවිද්යාලයේ අයිසෙක් සංවිධානයේ උප සභාපති හිමාසි කෝශිලාගේ සම්බන්ධීකරණයෙන් ඉංග්රීසි ව්යාපෘතිය දිඹුලාගල කාශ්යප මහා විද්යාලයට එන්නේ එහි නියෝජ්ය විදුහල්පති ජී. මනෝජ් චානකගේ විශේෂ ඉල්ලීමකට අනුවය.
අයිසෙක් සංවිධානය යනු ලෝකයේ රටවල් 120 ක විශ්ව විද්යාලයන්හි සිසුන් අතර පවතින විශාලම ශිෂ්ය සංවිධානයකි.
එහි වර්තමානයේ සිසුන් හතළිස් දාහකට ආසන්න පිරිසක් සාමාජිකත්වය දරති.
ඉංග්රීසි ව්යාපෘතිය අරන් දිඹුළාගලට පැමිණ සිටියේ ඉතාලියේ අරෝරා මාරියා (21), හා ග්ලුලියා ආකිඩියාකොනෝ (21), සහ නේපාලයේ බර්ෂා ගිමිහීර් (23) ය. මේ තරුණියන් තිදෙනාගේ ස්වරූපය මෙන්ම ඔවුන්ගේ අසීමිත කරුණාව සහිත ආදරය පාසලේ දරුවන්ට ලැබී තිබිණි. පාසලේ 1 වසරේ සිට 13 වසර දක්වා ඉංග්රීසි අධ්යයන ව්යාපෘතියක් ඔවුහු දියත් කර තිබුණහ. සතියේ දින පහම ඉංග්රීසි අධ්යාපනය ලබා දෙන මේ තරුණ ස්වේච්ඡා ගුරුවරියන් තිදෙනා සවස 2 සිට 4 දක්වා අමතර ඉගැන්විම් ද සිදුකරනු ලබන්නේය.
ඔවුන් නේවාසිකව රැඳී සිටින්නේ පාසලේමය. මේ පරිසරයේ දුර්භෝග වළඳමින් ගමේ ගොඩෙන් ලැබෙන ආහාර අනුභව කරමින් ඔවුන් සිදුකරන කැපකිරීම් සහිත ජීවිතයට ගම්මුන් තුළ ඉපදී ඇත්තේ විශාල ගෞරවයකි. විශේෂත්වය වන්නේ මේ තරුණ ස්වේචඡා ගරුවරුන් තිදෙනා මේ වනවිට ගමේ දරුවන්ගෙන් සිංහල ඉගෙනගෙන තිබීමය.
දිඹුලාගල කලාප අධ්යාපන අධ්යක්ෂ එම්. මුස්ලිමීන්, දිඹුලාගල කොට්ඨාශ අධ්යාපන අධ්යක්ෂ, එච්.ඩබ්ලිව්.සී.එන්. කුලසිංහ, සහකාර අධ්යාපන අධ්යක්ෂ, [ පාලන ] පී.ජී.එස්.අනිල් කුමාර, විදුහල්පති රුවන් ඉරේෂන් පෙරේරා, පල්ලේබෝවිල විනීතාලංකාර,
පැළෑටියාවේ ශාන්තාලංකාර, පැළෑටියාවේ අතුලඤාණාලංකාර, සියලු ගුරුභවතුන් මෙන්ම සද්කාර්යයට පූර්ණ සහාය ලබා දී තිබිණි.
“මේ වනවිටත් දිඹුලාගල කාශ්යප මහා විද්යාලයේ දරුවන් රැසකට ඉංග්රීසි භාෂාවේ මූලික කථන හැකියාව ලැබී තියනවා. ඉංග්රීසියට දරුවන්ගේ තියන බය නැතිවෙලා…” නියෝජ්ය විදුහල්පති මනෝජ් චානක පැවසීය.
ලෝකය මනුෂ්යත්වයේ සත්කාර සඳහා දෑත් දිගු කරන අවස්ථා බොහෝය. ඒවා කළමනාකරණය කරගැනීමට හැඟීමක් සහිත පරිපාලනයක් අවශ්යය. අප මගහැර දැමූ අපේ දරු කැකුළු පුබුදුවන්නට ලෝකය සූදානමින් ඇත. මෙවන් ව්යාපෘති අප දකින්නේ ඒ අසීමිත මානුෂීය ධාරාවේ තරු ලකුණු ලෙසය.
