ඇමරිකානු සහ ඊශ්රායල ඒකාබද්ධ ගුවන් ප්රහාරයකින් ඝාතනයට ලක් වූ ඉරාන ඉස්ලාමීය විප්ලවයේ උත්තරීතර නායක අයතුල්ලා සෙයියද් අලි ඛමේනි වෙනුවෙන් පැවැත්වෙන අවසන් ගෞරව දැක්වීමේ නිල අවමංගල්ය උත්සව මාලාව ඉරානයේ ටෙහෙරාන් අගනුවරදී ආරම්භ වී තිබේ.
ඉරාන රජයේ නිල පුවත් සේවාවන් මෙන්ම රොයිටර් සහ සීඑන්එන් ඇතුළු ජාත්යන්තර මාධ්ය වාර්තා කරන්නේ, මෙම ඓතිහාසික අවමංගල්ය උත්සවයේ පළමු දිනයේදීම ඉරානයේ නන්දෙසින් පැමිණි මිලියන සංඛ්යාත ජනතාවක් ටෙහෙරාන් අගනුවර පිහිටි ඉමාම් ඛොමේනි ග්රෑන්ඩ් මොසල්ලා (Imam Khomeini Grand Mosalla) පූජනීය භූමිය සහ ඒ අවට වීදි සම්පූර්ණයෙන්ම අවහිර කරමින් තම නායකයාට අවසන් ගෞරව දැක්වීම සඳහා රැස්ව සිටි බවය.
පසුගිය පෙබරවාරි 28 වැනිදා ඇමරිකාව සහ ඊශ්රායලය විසින් ඉරානයට එල්ල කරන ලද දැවැන්ත ආක්රමණශීලී ගුවන් ප්රහාර මාලාවකදී අයතුල්ලා ඛමේනි ඝාතනයට ලක් විය. එදිනම ඉරානය සහ ඇමරිකා-ඊශ්රායල බලවේග අතර දැඩි යුදමය තත්ත්වයක් හටගත් අතර, එම දරුණු ගැටුම් හේතුවෙන් මාස හතරකට ආසන්න කාලයක් පුරා ඔහුගේ දේහය පිළිබඳ අවසන් කටයුතු කල් දැමීමට ඉරාන බලධාරීන්ට සිදු විය.
ජාත්යන්තර මාධ්ය වාර්තාවලට අනුව, ඉස්ලාමීය නීතියට අනුව දේහයන් කඩිනමින් මිහිදන් කළ යුතු වුවද, යුදමය වටපිටාව තුළ ආරක්ෂක හේතුන් මත දේහය රසායනික ද්රව්ය භාවිතයෙන් තොරව විශේෂිත ශීතාගාර පද්ධතියක සුරක්ෂිතව තැන්පත් කර තැබීමට කටයුතු කර තිබුණි. පසුගියදා ඇති කරගත් තාවකාලික සටන් නැවැත්වීමේ එකඟතාවත් සමඟ මෙම අවමංගල්ය උත්සවය සංවිධානය කිරීමට වත්මන් ඉරාන රජයට අවස්ථාව හිමිව ඇත.
රොයිටර් පුවත් සේවය සඳහන් කරන්නේ, අයතුල්ලා ඛමේනි සමඟ එකම ප්රහාරයකින් ජීවිතක්ෂයට පත් වූ ඔහුගේ දියණිය, ලේලිය සහ කුඩා මිනිබිරිය ඇතුළු පවුලේ සාමාජිකයන් කිහිපදෙනෙකුගේ දේහයන් ද මෙලෙස මහජන ගෞරවය සඳහා තැන්පත් කර ඇති බවය. කළු පැහැති වස්ත්රවලින් සැරසුණු මිලියන සංඛ්යාත ඉරාන වැසියන් විලාප නගමින් සහ පපුවට අතබා ගනිමින් තම නායකයාගේ දේහය රැගත් දෙන වෙත මල්දම් දමමින් දැඩි සංවේගයෙන් පසුවන අයුරු විදෙස් මාධ්ය කැමරාවල සටහන්ව තිබුණි.
කෙසේ වෙතත්, මෙම ප්රහාරයෙන් තුවාල ලැබූ බව කියන ඔහුගේ පුත් සහ නව උත්තරීතර නායකයා ලෙස ප්රකාශයට පත් කර ඇති අලි මොජ්තබා ඛමේනි ආරක්ෂක හේතුන් මත මෙතෙක් මහජනතාව හමුවට පැමිණ නොමැති බව ද සීඑන්එන් පුවත් සේවය පවසයි.
නිල අවමංගල්ය සංවිධායක කමිටුවේ කාලසටහනට අනුව, ටෙහෙරාන් අගනුවර පැවැත්වෙන මහජන අවසන් ගෞරව දැක්වීමේ සහ ආගමික වතාවත්වලින් අනතුරුව, දේහය රැගත් පෙරහැර ඉරානයේ ප්රධාන පූජනීය නගරයක් වන කොම් (Qom) වෙත රැගෙන යාමට නියමිතය. ඉන් අනතුරුව, ඉරාකයේ ෂියා මුස්ලිම්වරුන්ගේ අතිශය පූජනීය නගර ලෙස සැලකෙන නජාෆ් (Najaf) සහ කර්බාලා (Karbala) යන නගර වෙත ද දේහය රැගෙන ගොස් ආගමික වතාවත් සිදු කිරීමට නියමිතව ඇත.
සම බරව ඇත්ත කියන ලංකාසර පුවත් ඔබට සෑම විටෙක දැකීමට ඕනෑ නම් පහත අපේ වට්ස්ඇප් / ටෙලිග්රෑම් සමූහයන්ට එක්වෙන්න.
දින හයකට අධික කාලයක් පුරා ඉරානය සහ ඉරාකය පුරා සංවිධානය කර ඇති මෙම දීර්ඝ ආගමික අවමංගල්ය වත්පිළිවෙත් මාලාව අවසානයේ, අයතුල්ලා සෙයියද් අලි ඛමේනිගේ දේහය පිළිබඳ අවසන් භූමදාන කටයුතු ඉරානයේ දෙවැනි විශාලතම නගරය මෙන්ම අතිපූජනීය භූමියක් ද වන මෂාද් (Mashhad) නගරයේ පිහිටි ඉමාම් රීසා (Imam Reza) සිද්ධස්ථාන සංකීර්ණයේදී සිදු කිරීමට සියලු කටයුතු සූදානම් කර තිබේ.
