ශ්රී ලංකා රේගු දෙපාර්තමේන්තුව මෙවසරේ (2026) ජූනි 30 වැනිදායින් අවසන් වූ මුල් මාස හයක කාලසීමාව සඳහා තබා තිබූ ආදායම් ඉලක්කය විශාල ලෙස ඉක්මවා යමින් රුපියල් ට්රිලියන 1.3737 ක (රුපියල් බිලියන 1,373.7 ක) වාර්තාගත ආදායමක් උපයා ගැනීමට සමත්ව තිබේ.
මේ පිළිබඳව කරුණු දක්වමින් රේගු මාධ්ය ප්රකාශක සහ ජ්යෙෂ්ඨ අධ්යක්ෂ චන්දන පුංචිහේවා ප්රකාශ කළේ, ජූනි 30 වැනිදායින් අවසන් වූ වසරේ පළමු භාගය සඳහා රේගුව වෙත පවරා තිබූ මූල්ය ඉලක්කයන් සාර්ථකව අභිබවා යාමට රේගු දෙපාර්තමේන්තුවට හැකි වූ බවය.
වසරේ මුල් මාස හය සඳහා ශ්රී ලංකා රේගුව වෙත රජය විසින් ලබා දී තිබූ නිල ආදායම් ඉලක්කය රුපියල් ට්රිලියන 1.0605 කි. කෙසේ වෙතත්, රේගු නිලධාරීන්ගේ සුවිශේෂී කාර්යක්ෂමතාව සහ බදු එකතු කිරීමේ විධිමත් ක්රියාවලිය හේතුවෙන් නියමිත ඉලක්කයට වඩා තවත් රුපියල් බිලියන 313 ක අතිරික්ත ආදායමක් උපයා ගැනීමට රේගුවට හැකි වී තිබේ.
මුළු 2026 වසර සඳහාම ශ්රී ලංකා රේගුව වෙත පවරා ඇති සමස්ත ආදායම් ඉලක්කය රුපියල් ට්රිලියන 2.206 කි. දැනට පවතින මෙම ඉහළ ආදායම් ප්රවණතාව ඉදිරියටත් පැවතුණහොත්, පසුගිය වසරේ (2025) රේගුව වාර්තා කළ රුපියල් ට්රිලියන 2.5 ක සර්වකාලීන ඉහළම සමස්ත ආදායම් එකතුව පවා මෙවර බිඳ හෙලීමට හැකි වනු ඇතැයි පුංචිහේවා දැඩි විශ්වාසය පළ කළේය.
මේ අතර, එළඹි ජූලි මාසය සඳහා රේගුව වෙත රුපියල් බිලියන 192.4 ක ආදායම් ඉලක්කයක් ලබා දී ඇති අතර, ඉන් රුපියල් බිලියන 31 ක මුදලක් ජූලි මාසයේ මුල් දින දෙක (02) තුළදීම උපයා ගැනීමට රේගු දෙපාර්තමේන්තුව සමත්ව ඇත. කෙසේ වෙතත්, මෝටර් රථ ආනයන සීමාවන් තවදුරටත් ක්රියාත්මක වීම හේතුවෙන් වාහන ආනයනය ආශ්රිතව ලැබෙන බදු ආදායමේ යම් අඩුවීමක් පවතින බව ද මාධ්ය ප්රකාශකවරයා වැඩිදුරටත් පෙන්වා දුන්නේය.
සම බරව ඇත්ත කියන ලංකාසර පුවත් ඔබට සෑම විටෙක දැකීමට ඕනෑ නම් පහත අපේ වට්ස්ඇප් / ටෙලිග්රෑම් සමූහයන්ට එක්වෙන්න.
