ඉඳුනිල් කහටපිටිය-
කොළඹ පාරිභෝගික මිල දර්ශකය (CCPI, 2021=100) මත පදනම් වූ මතුපිට උද්ධමනය 2026 ජූනි මාසයේ දී සියයට 6.8 ක් දක්වා ඉහළ ගොස් තිබේ. 2026 මැයි මාසයේ දී මෙම අගය සටහන්ව තිබුණේ සියයට 5.5 ක් වශයෙනි. ශ්රී ලංකා මහ බැංකුව විසින් නිකුත් කරන ලද නවතම සතිපතා ආර්ථික දර්ශක වාර්තාවෙහි මේ බව සඳහන් වේ.
මහ බැංකු දත්ත වලට අනුව ජූනි මාසයේ දී ආහාර උද්ධමනය සියයට 3.6 ක් සහ ආහාර නොවන උද්ධමනය සියයට 8.4 ක් ලෙස වාර්තා වී ඇත. මේ අතර, මූලික උද්ධමනය (Core Inflation) 2026 මැයි මාසයේ පැවති සියයට 3.9 ක අගයේ සිට 2026 ජූනි මාසයේ දී සියයට 4.0 ක් දක්වා සුළු වශයෙන් ඉහළ ගොස් තිබේ.
රැකියා සහ නිෂ්පාදන අංශය සමස්ත ක්රියාකාරකම් දර්ශකය මඟින් පිළිබිඹු වන පරිදි, 2026 මැයි මාසයේ දී ඉදිකිරීම් කර්මාන්තය සඳහා වූ ගැනුම් කළමනාකරුවන්ගේ දර්ශකය (PMI) මාසික පදනමින් වර්ධනයක් පෙන්නුම් කර ඇත.
රැකියා නියුක්ති තත්ත්වය 2025 වසරේ පළමු කාර්තුව තුළ සියයට 3.8 ක් ලෙස වාර්තා වූ මෙරට විරැකියා අනුපාතිකය, 2026 වසරේ පළමු කාර්තුව වන විට සියයට 3.7 දක්වා පහත වැටී තිබේ. කෙසේ වෙතත්, ශ්රම බලකා සහභාගිත්ව අනුපාතය 2025 පළමු කාර්තුවේ පැවති සියයට 49.7 ක අගයේ සිට 2026 පළමු කාර්තුව වන විට සියයට 49.2 දක්වා පහත වැටී ඇති බව දත්ත පෙන්වා දෙයි.
මූල්ය හා රුපියලේ අගය 2026 ජූලි 03 දිනෙන් අවසන් වූ සතිය සඳහා ප්රධාන පෙළේ ණය ලබාදීමේ පොලී අනුපාතිකය (AWPR) පදනම් ප්රසාද අංක 23 කින් ඉහළ ගොස් සියයට 10.62 ක් වී ඇත. එහෙත් බැංකු අතර ණය මුදල් අනුපාතිකය (AWCMR) සියයට 9.20 දක්වා සුළු වශයෙන් පහත වැටී තිබේ.
සංචිත මුදල් ප්රමාණය සංසරණයේ පවතින මුදල් ප්රමාණය අඩුවීම හේතුවෙන් සංචිත මුදල් ප්රමාණය ද පෙර සතියට සාපේක්ෂව පහත වැටී ඇති අතර, වෙළඳපොළ ද්රවශීලතාව රුපියල් බිලියන 128.47 ක අතිරික්තයක් ලෙස සටහන් වේ.
කොටස් වෙළඳපොළ කොටස් වෙළඳපොළ දෙස බැලීමේ දී, පෙර සතියට සාපේක්ෂව සියලු කොටස් මිල දර්ශකය (ASPI) සියයට 1.03 කින් සහ S&P SL 20 දර්ශකය සියයට 0.85 කින් පහත වැටී ඇත.
දේශීය විදේශ විනිමය 2026 ජූලි 03 වනදා වන විට ඇමෙරිකානු ඩොලරයට සාපේක්ෂව ශ්රී ලංකා රුපියලේ වසරේ මේ දක්වා කාලය තුළ ක්ෂය වීම සියයට 7.7 ක් ලෙස වාර්තා වේ. ජූනි මාසය තුළ ශ්රී ලංකා මහ බැංකුව විසින් දේශීය විදේශ විනිමය වෙළඳපොළෙන් ඇමෙරිකානු ඩොලර් මිලියන 71 ක ශුද්ධ අවශෝෂණයක් සිදු කර ඇත.
රජයේ ණය සහ විදේශ සංචිත 2026 මාර්තු අවසානය වන විට මධ්යම රජයේ සමස්ත ණය ප්රමාණය රුපියල් බිලියන 30,193.18 ක් ලෙස සටහන් වී තිබේ. මෙයින් දේශීය ණය ප්රමාණය රුපියල් බිලියන 18,762.04 ක් වන අතර විදේශීය ණයවල රුපියල් වටිනාකම රුපියල් බිලියන 11,431.14 කි. 2026 මැයි අවසානය වන විට මෙරට නිල විදේශ සංචිත ප්රමාණය ඇමෙරිකානු ඩොලර් මිලියන 6,881 ක් ලෙස තාවකාලිකව ඇස්තමේන්තු කර ඇති අතර, මෙයට චීන මහජන බැංකුව (PBOC) සමඟ ඇති කරගත් හුවමාරු පහසුකම (Swap) ද ඇතුළත් වේ.
වෙළඳ හිඟය සහ සංචාරක ව්යාපාරය 2026 මැයි මාසයෙන් අවසන් වූ මාස පහක කාලය තුළ වෙළඳ හිඟය ඇමෙරිකානු ඩොලර් මිලියන 4,661 ක් දක්වා පුළුල් වී ඇත. 2025 වසරේ අදාළ කාල සීමාව තුළ එය සටහන්ව තිබුණේ ඇමෙරිකානු ඩොලර් මිලියන 2,730 ක් ලෙසිනි. මෙම කාලය තුළ අපනයන ආදායම සියයට 7.6 කින් ඉහළ ගොස් ඩොලර් මිලියන 5,759 ක් වූ අතර, ආනයන වියදම සියයට 29.0 කින් විශාල ලෙස ඉහළ ගොස් ඩොලර් මිලියන 10,420 ක් වී තිබේ. මේ අතර, සංචාරක පැමිණීම් සලකා බැලීමේ දී, 2026 ජූනි මාසයේ දී සංචාරකයින් 124,551 දෙනෙකු පැමිණ ඇති අතර, එය 2026 මැයි මාසයේ පැමිණි 145,745 කට සහ 2025 ජූනි මාසයේ පැමිණි 138,241 කට වඩා අඩුවීමකි.
ලෝක බොරතෙල් මිල ජූනි 30 සිට ජූලි 03 දක්වා කාලය තුළ ලෝක බොරතෙල් මිල උච්චාවචනයන් රැසකට ලක් විය. ඉරානය සහ ඇමෙරිකාව අතර සාම සාකච්ඡා බිඳ වැටීමේ අවදානම මත මුලින් මිල ඉහළ ගිය ද, පසුව සාකච්ඡාවල සාර්ථක ප්රගතියක් සමඟ මිල පහත වැටුණි. සතිය අවසානයේ මැදපෙරදිග සාමය පිළිබඳ ආයෝජකයින්ගේ සුබවාදී බලාපොරොත්තු හේතුවෙන් මිල සුළු වශයෙන් වෙනස් වූ අතර, සමස්තයක් ලෙස සතියකට පෙර පැවති මිලට සාපේක්ෂව බ්රෙන්ට් (Brent) බොරතෙල් බැරලයක මිල ඩොලර් 2.31 කින් සහ ඩබ්ලිව්.ටී.අයි (WTI) බොරතෙල් බැරලයක මිල ඩොලර් 2.21 කින් පහත වැටී තිබේ.
