පාස්කු ඉරිදා ත්රස්ත ප්රහාරයේ සැකකරුවකු වන සුරේෂ් සලේගේ ලැප්ටොප් පරිගණකයේ සහ ජංගම දුරකථනයේ මුරපද (Passwords) අපරාධ පරීක්ෂණ දෙපාර්තමේන්තුවේ විමර්ශන අංශ වෙත ලබා දීමට අධිකරණය ලබා දුන් නියෝගය අභියෝගයට ලක් කරමින් ඉහළ අධිකරණයට අභියාචනාවක් ඉදිරිපත් කිරීමට සලේ ගේ නීතිඥවරු සූදානම් වේ.
අධිකරණය තීන්දුවට ගරු කරමින් එම නියෝගය පිළිබඳ සුරේෂ් සලේ ගේ නීතිඥවරු තවදුරටත් නීතිමය පියවර ගන්නා බව පිවිතුරු හෙළ උරුමයේ නායක උදය ගම්මන්පිල අද මාධ්ය හමුවක් කැඳවා දැනුම් දුන්නේය.
තමන්ගේ මුරපද පොලිසියට ලබා නොදීම සඳහා සුරේෂ් සලේට සාධාරණ හේතු හතරක් පවතින බව පෙන්වා දෙන උදය ගම්මන්පිල, ඒවා මෙසේ පැහැදිලි කළේය.
-
නීතිමය ප්රතිපාදන: අපරාධ නඩු විධාන සංග්රහය අනුව තමන්ට එරෙහිව කෙරෙන විමර්ශනයකට සහාය දීමට සැකකරුවකු බැඳී නොමැති අතර, ඊට බල කිරීමක් කළ නොහැක.
-
බලපෑම් කිරීමේ නොහැකියාව: මුරපදය ලබා දෙන ලෙස සුරේෂ් සලේට කිසිදු පාර්ශ්වයකට බලපෑමක්, බලහත්කාරයක් හෝ පෙළඹවීමක් කිරීමට නීතිමය ඉඩක් නැත.
-
තොරතුරුකරුවන්ගේ ආරක්ෂාව: අදාළ ජංගම දුරකථනයේ සහ පරිගණකයේ බුද්ධි තොරතුරු සැපයූ සංවේදී තොරතුරුකරුවන් පිළිබඳ විස්තර ඇතුළත් වේ. වසර 38ක සේවය තුළ ගොඩනඟා ගත් මෙම දැවැන්ත තොරතුරු ජාලයේ සිටින පුද්ගලයන් තමන්ගේ ජීවිත පරදුවට තබා පෞද්ගලික විශ්වාසය මත තොරතුරු ලබා දී ඇත. සමහර විටෙක සැමියා පිළිබඳ බිරිය හෝ තාත්තා පිළිබඳ දියණිය තොරතුරු ලබා දී ඇති බැවින්, මෙම රහස්යභාවය හෙළිදරව් වීම අතිශය භයානක සහ සංවේදී වේ.
-
පූර්ව අත්දැකීම්: මීට පෙරද බුද්ධි තොරතුරු අපරාධ පරීක්ෂණ දෙපාර්තමේන්තුව (CID) අතට පත්වීම නිසා විශාල විනාශයන් සිදු වූ බව උදය ගම්මන්පිල වැඩිදුරටත් අවධාරණය කළේය.
