2014 වසරේදී අනුරාධපුර දිස්ත්රික්කයේ දිළිඳු ගොවීන් වෙනුවෙන් රජයේ වියදමින් ගෙන්වන ලද බීජ බඩඉරිඟු කිලෝග්රෑම් 36,000ක ප්රමාණයක්, නිලධාරීන්ට බලපෑම් කරමින් සිය හිතවතුන් අතර බෙදා හැරීමේ දූෂණ චෝදනාව සම්බන්ධයෙන් හිටපු ආර්ථික නියෝජ්ය අමාත්ය සහ විශේෂ ව්යාපෘති අමාත්ය එස්.එම්. චන්ද්රසේන වෙත අද (02) කොළඹ මහාධිකරණය හමුවේ දී අධි චෝදනා භාර දෙනු ලැබුවේය.
අධි චෝදනා භාර දීමෙන් පසු විත්තිකරු රුපියල් පනස් දහසක මුදල් ඇපයක් සහ ලක්ෂ දහය බැගින් වූ ශරීර ඇප දෙකක් මත මුදා හැරීමට මහාධිකරණ විනිසුරු රවින්ද්ර ප්රේමරත්න නියෝග කළේය.
2014 ජනවාරි 01 වැනිදා සිට 2014 දෙසැම්බර් 31 දක්වා කාලය තුළ අනුරාධපුර දිස්ත්රික් ලේකම් කාර්යාලයේ ක්රම සම්පාදන අධ්යක්ෂ ඇතුළු නිලධාරීන්ට බලපෑම් කරමින් මෙම බීජ බඩඉරිඟු තොගය බෙදා දීම තුළින් අල්ලස් පනතේ 70 වැනි වගන්තිය යටතේ දඬුවම් ලැබිය යුතු වරදක් සිදු කර ඇති බවට චෝදනා කරමින් අල්ලස් හෝ දූෂණ විමර්ශන කොමිෂන් සභාව පසුගිය ජූනි 12 වැනිදා කොළඹ මහාධිකරණය හමුවේ මෙම නඩුව ගොනු කර තිබුණි. විත්තිකරුට එරෙහිව අධි චෝදනා දෙකක් යටතේ මෙම නඩුව පැවරීමට කටයුතු කර ඇත.
මෙම සිද්ධිය සම්බන්ධයෙන් හිටපු අමාත්යවරයා පසුගිය වසරේ ජූලි 04 වැනිදා අල්ලස් කොමිසම විසින් අත්අඩංගුවට ගනු ලැබූ අතර, කොළඹ මහේස්ත්රාත් අධිකරණය වෙත ඉදිරිපත් කිරීමෙන් පසු බන්ධනාගාරගත කෙරිණි. පසුව එම වසරේ අගෝස්තු 01 වැනිදා ඔහු ඇප මත මුදා හැරුණු අතර, මෙම නඩුව නැවත ජූලි 22 වැනිදා කැඳවීමට නියමිතය.
සම බරව ඇත්ත කියන ලංකාසර පුවත් ඔබට සෑම විටෙක දැකීමට ඕනෑ නම් පහත අපේ වට්ස්ඇප් / ටෙලිග්රෑම් සමූහයන්ට එක්වෙන්න.
