පරීක්ෂණ කටයුතු සඳහා කැඳවන ඕනෑම අවස්ථාවක පෙනී සිටීමට සූදානම් බවත්, තමන්ගේ නිර්දෝෂීභාවය ඔප්පු කළ හැකි හොඳම ක්රමය පරීක්ෂණවලට සහයෝගය දැක්වීම බවත් ශ්රී ලංකා පොදුජන පෙරමුණේ ජාතික සංවිධායක, පාර්ලිමේන්තු මන්ත්රී නාමල් රාජපක්ෂ ප්රකාශ කළේය.
ඔහු මේ බව පැවසුවේ අද දින (2026.05.11) නෙළුම් මාවතේ පිහිටි පක්ෂ මූලස්ථානයේදී මාධ්යවේදීන් නැඟූ ප්රශ්නවලට පිළිතුරු ලබා දෙමිනි. හිටපු ජනාධිපති මහින්ද රාජපක්ෂ හෙට දින අල්ලස් හෝ දූෂණ විමර්ශන කොමිසම හමුවට පැමිණෙන්නේදැයි මාධ්යවේදීන් මෙහිදී ප්රශ්න කර සිටියේය.
එහිදී වැඩිදුරටත් අදහස් දැක්වූ මන්ත්රීවරයා කියා සිටියේ බලපෑම් කිරීම් හෝ බිය වැද්දීම් හරහා දේශපාලන ගමනක් යා නොහැකි බව රජය තේරුම් ගත යුතු බවයි. පරීක්ෂණ කටයුතු ස්වාධීනව සිදුවිය යුතු අතර, දේශපාලන න්යාය පත්ර අනුව බලහත්කාරයෙන් ප්රකාශ ලබා ගැනීමට උත්සාහ කරන්නේ නම් ඉන් සාධාරණයක් ඉටු නොවන බවත් ඔහු අවධාරණය කළේය. එවැනි ක්රියාවන් මගින් අවසානයේ ජනතාව රැවටීමට ලක්වන බවත්, එහි පාඩුව විඳීමට සිදුවන්නේ රටේ ජනතාවට බවත් ඔහු පෙන්වා දුන්නේය.
රජය බොහෝ කරුණු යට ගැසීමට උත්සාහ කරන බවට චෝදනා කළ නාමල් රාජපක්ෂ, මුදල් අමාත්යාංශයේ සිදුවූ රුපියල් කෝටි 80ක මුදල් වංචාවක් හා සම්බන්ධ මරණයක් සියදිවි හානිකර ගැනීමක් ලෙස හුවා දක්වා යට ගැසීමට කටයුතු කළ ආකාරය උදාහරණයක් ලෙස පෙන්වා දුන්නේය. පවතින රජය ප්රශ්න මගහරිමින් සිටින බවත්, එලෙස ලිස්සා යාමට උත්සාහ නොකර සියලු කරුණු සම්බන්ධයෙන් සාධාරණ පරීක්ෂණ පවත්වන ලෙසත් මන්ත්රීවරයා වැඩිදුරටත් ඉල්ලා සිටියේය.
