අසේල කුරුළුවංශ –
තම අනියම් බිරිඳ ඝාතනය කර මළ සිරුර නිවස ආසන්නයේ මඩ වගුරක සඟවා ප්රදේශයෙන් පළාගොස් සිටි සැකකරු ඊයේ (03) රංගල පොලීසිය විසින් අත්අඩංගුවට ගනු ලැබ තිබේ.
ප්රදේශයෙන් පළාගොස් සිට ඊයේ (03) යළි නිවසට පැමිණි සැකකරු, ඔහුගේ ගෙවත්තේ සැඟව සිටියදී පොලීසිය විසින් මෙලෙස අත්අඩංගුවට ගෙන ඇත.
අත්අඩංගුවට ගන්නා අවස්ථාවේදී සැකකරු වෙතින් කිසියම් ගඳක් වහනය වීම හේතුවෙන් ඔහු වස පානය කරන්නට ඇතැයි යන සැකය මත, තෙල්දෙණිය රෝහලට ඇතුළත් කිරීමට පොලීසිය පියවර ගෙන තිබේ.
මෙම තරුණියගේ අතුරුදන් වීම සම්බන්ධයෙන් සැකකරු විසින්ම පොලීසියට කරන ලද පැමිණිල්ලක් පිළිබඳව පොලීසියට සැක සිතුණු අතර, ඒ සම්බන්ධයෙන් ඔහුගේ මවගෙන් ප්රශ්න කර ඇත. එහිදී පහරදී තරුණිය ඝාතනය කර නිවස ආසන්නයේ වගුරු බිමක වළ දැමූ බව අනාවරණය වී තිබේ.
ඒ අනුව රංගල පොලීසිය අධිකරණ නියෝගයක් ලබා ගනිමින් අදාළ වගුරු බිම හැරූ අවස්ථාවේදී, තරුණියගේ මළ සිරුර අඩි තුනක් පමණ ගැඹුරට කැපූ වළක තිබී සොයා ගැනීමට හැකි විය.
මෙලෙස ඝාතනයට ලක්ව ඇත්තේ 22 හැවිරිදි වාසනා සඳමාලි වීරසේකර නැමැති ඇඟළුම් ආයතනයක රැකියාව කළ තරුණියකි.
ඇගේ මළ සිරුර පශ්චාත් මරණ පරීක්ෂණය සඳහා මහේස්ත්රාත් කමල් එස්.ජයතිලික විසින් තෙල්දෙණිය රෝහලේ අධිකරණ වෛද්යවරයා වෙත යොමු කරනු ලැබීය.
විවාහකයෙකු වන සැකකරු, සිය බිරිඳ අත්හැර වසර හතරක පමණ කාලයක් මෙම තරුණිය සමඟ ජීවත්ව ඇති බව පොලිස් පරීක්ෂණ මගින් වැඩිදුරටත් හෙළි වී තිබේ
