ඉඳුනිල් කහටපිටිය –
පසුගිය 08 වෙනිදා මිය ගිය ශ්රී ලංකන් ගුවන් සේවයේ හිටපු ප්රධාන විධායක නිලධාරී කපිල චන්ද්රසේනගේ අභිරහස් මරණය සම්බන්ධයෙන් කොළඹ අපරාධ කොට්ඨාසය (CCD) මගින් පවත්වනු ලබන විමර්ශන මේ වන විට තීව්ර කර තිබේ.
මියයන විට සිය මස්සිනා වූ හිටපු ශ්රි ලංකා ක්රිකට් නායක අරවින්ද ද සිල්වාගේ නිවසේ රැඳී සිටි කපිල චන්ද්රසේන ගෙල වැලලා ගැනීම සඳහා යොදාගත් පටිය (Belt) සේවකයෙකු මාර්ගයෙන් සිය නිවසේ සිට ගෙන්වා ගෙන ඇති බවට මූලික විමර්ශනවලදී අනාවරණය වී ඇත.
මරණය සිදුවීමට පෙර දින ඔහු සිය නීතිඥවරුන් හමුවී සාකච්ඡා කර ඇති අතර, ඊට පසු දින මොහුව අත්අඩංගුවට ගැනීම සඳහා අධිකරණය විසින් වරෙන්තුවක් ද නිකුත් කර තිබුණි. ඒ, 2013 වසරේදී ශ්රී ලංකන් ගුවන් සේවයට එයාර්බස් යානා මිලදී ගැනීමේ ගනුදෙනුවේදී අමෙරිකානු ඩොලර් මිලියන 2ක අල්ලසක් ලබාගත් බවට එල්ල වූ චෝදනාවට අදාළව ඇප කොන්දේසි උල්ලංඝනය කිරීම හේතුවෙනි.
විමර්ශනවල වර්තමාන තත්ත්වය
කොළඹ අපරාධ කොට්ඨාසය විසින් මේ වන විට අරවින්ද ද සිල්වා ඇතුළු පුද්ගලයන් 15 දෙනෙකුගෙන් පමණ ප්රකාශ සටහන් කරගෙන තිබේ. විශේෂඥ අධිකරණ වෛද්යවරුන් පස් දෙනෙකුගෙන් යුත් කණ්ඩායමක් විසින් පශ්චාත් මරණ පරීක්ෂණය පවත්වා ඇති අතර, සිරුර පිළිබඳ වැඩිදුර විමර්ශන සඳහා රජයේ රස පරීක්ෂකවරයා වෙත ද යොමු කර ඇත.
ඔහුගේ සිරුර සොයා ගන්නා කොල්ලුපටිය 5වන පටුමගේ නිවස ආශ්රිතව සිසීටිවී පරීක්ෂාව මේ වනවිටත් කරගෙන යන බව විමර්ශන අංශ කියයි.
පොලිසිය පවසන්නේ මෙම මරණය සැක සහිත මරණයක් ලෙස සලකා විමර්ශන පවත්වන බවය. සීසීටීවී දර්ශන පරීක්ෂා කිරීමෙන් මතුවන සාක්ෂි ඇතුළු අනෙකුත් සාක්ෂි මත පදනම්ව විමර්ශන ක්රියාත්මක වන අතර, මේ පිළිබඳ සවිස්තරාත්මක වාර්තාවක් හෙට ( 12 ) අධිකරණයට ඉදිරිපත් කිරීමට නියමිතය.
