මනම්පිටිය නිමල් ජයරත්න –
හබරණ, ත්රීකුණාමලය මාර්ගයේ හබරණ තලපත් කන්ද ප්රදේශයේදී විදේශීය සංචාරකයින් ගමන් ගත් ජීප් රථයකට වන අලියෙකු පහරදීමෙන් එම ජීප් රථය පෙරළී ජීප් රථයේ ගමන් ගත් විදේශිකයන් දෙදෙනෙකු තුවාල ලබා ඇති බවත්, ජීප් රථයට හානිවී ඇති බවත් හබරණ පොලිසිය කියයි.
හබරණ හුරුළු පාරිසරික උද්යානයේ වන අලින් නරඹා ආපසු හබරණ නගරය දෙසට ගමන් කරමින් සිටි අවස්ථාවේ හුරුළු පාරිසරික වන උද්යානයේ සැරිසරන කබරයා නම් අන්වර්ත නාමයෙන් හඳුන්වන අලියා විසින් මෙම ජීප් රථයට පහරදී ඇති බව සෆාරි ජීප් රථ රියදුරෝ පවසා සිටිති.
මෙම වන අලියා සංචාරකයින් ගමන් ගත් ජිප් රථයට පහර දී පෙරලා දමා ඇති අතර එහි ගමන් ගත් සංචාරකයින් දෙදෙනා දිව ගොස් වෙනත් ජීප් රථයකට නැගී තම දිවි බේරාගෙන ඇත.
අනතුරින් විදේශිකයන් සුළු තුවාල ලබා ඇති අතර ඔවුන් හබරණ දිසා රෝහලට ඇතුළත් කිරීමෙන් පසු ප්රතිකාර ලබා පිටව ගොස් ඇති බව හබරණ පොලිසිය සඳහන් කරයි.
වන අලියා මෙම ජීප් රථයට පහරදී දිගු වේලාවක් එම ස්ථානයේ රැඳී සිටීම හේතුවෙන් අනතුරට ලක්වූ ජීප් රථය එම ස්ථානයෙන් ඉවත් කිරීමට දිගු වේලාවක් රැදී සිටීමට අනෙකුත් සෆාරි ජීප් රථ හිමියන්ට සිදුවී ඇත.
වන අලියා පහරදීමෙන් පෙරලී අනතුරට පත්ව තිබූ ජීප් රථය අනෙකුත් සෆාරි ජීප් රථ හිමියන් එක්ව මාර්ගයට ගැනීමට කටයුතු කර ඇත.
මෙම අනතුර සම්බන්ධයෙන් හබරණ පොලීසිය හා හුරුළු පාරිසරික වන උද්යානයේ වනජීවී නිලධාරීන් එක්ව පරීක්ෂණ සිදුකරයි.
