ව්යාපාර නායක දිනේෂ් ෂාෆ්ටර් බොරැල්ල පොදු සුසාන භූමිය තුළ ඝාතනයට වූ බවට සැක කරන අවස්ථාවේ දී එම ස්ථානයේ සිට ඉක්මනින් ඉවත් වී ගිය බව කියන පුද්ගලයා සොයා අපරාධ පරීක්ෂණ දෙපාර්තමේන්තුවේ මිනිස් ඝාතන හා සංවිධානාත්මක අපරාධ විමර්ශන කොට්ඨාසයේ නිලධාරීන් මේ වනවිට විමර්ශන ආරම්භ කර තිබේ.
මෙම පුද්ගලයා කෙට්ටු උස පුද්ගලයෙක් බවත් මෝටර් රථය අසල සිට සුසාන භූමියේ ආදාහනාගාරය දෙසට ගිය බව තමා දුටු බවත්, සුසාන භූමි සේවකයෙක් විසින් මුල් අවස්ථාවේ දීම ප්රකාශයක් ලබා දී තිබිණි. ඔහු අපරාධ පරීක්ෂණ දෙපාර්තමේන්තු නිලධාරීන්ට ප්රකාශ කර තිබුණේ කලිසමක් සහ කමිසයක් ඇඳන් සිටි එම පුද්ගලයා යළි දුටුවහොත් හඳුනාගත හැකි බවය.ෙඑම පුද්ගලයා හඳනා ගැනීමෙන් ෂාෆ්ටර් ඝාතන සිද්ධිය සම්බන්ධව විශාල තොරතුරු ප්රමාණයක් හෙළිදරව් කරගත හැකි වනු ඇතැයි විමර්ශකයෝ විශ්වාසය පලකරති.
දිනේෂ් ෂාෆ්ටර් බොරැල්ල සුසාන භූමියේ අනාථ පෙදෙසෙ ලෙස හඳුන්වන ප්රදේශය තුළ අපරාධයට ලක් වී සිටි ආකාරය දැක ඇත්තේ පුද්ගලයින් තුන් දෙනෙක් පමණි.
ඒ ෂාෆ්ටර්ගේ සමීපතමයෙක් බව කියන ක්රිෂ් පෙරේරා සහ සුසාන භූමි සේවකයින් දෙදෙනෙකි.
ඔවුන්ගෙන් ලබා ගත් ප්රකාශවලින් විමර්ශකයින්ට පෙනී ගොස් ඇත්තේ දිනේෂ් ෂාෆ්ටර්ගේ ඇඟ වටා වයරයක් ඔතා දෑත් කේබල් පටිවලින් සිර කර තිබුණු බවය.
ඒවා ගැලවීමට උත්සාහ කළත් නොහැකි වූ තැන ඇඟ වටා තිබුණු වයරය පමණක් ඉවත් කර දෑත් එසේම බැඳ තිබියි දී රියදුරු අසුනට යාබද අසුනට ෂාෆ්ටර් දමාගෙන කොළම ජාතික රෝහලට ඔහු රැගෙන ගිය බවය.
අපරාධ පරීක්ෂණ දෙපාර්තමේන්තුවේ මිනිස් ඝාතන සහ සංවිධානාත්මක අපරාධ විමර්ශන කොට්ඨාසයේ නිලධාරීන් විසින් විවිධ මත ඔස්සේ වැඩිදුරටත් මෙම හෙළි නොවූ මරණය සම්බන්ධව වෙහෙසකර විමර්ශන පවත්වාගෙන යන බව සඳහන්ය.
එහිදී දිනේෂ් ෂාෆ්ටර් ගේ නිවසින් හමුවූ “කේබල් ටයි“ සහ ඔහුගේ සිරුර වටා ඔතා තිබූ වයරයට සමාන ඇන්ටනා වයරය පිළිබඳව ද විශේෂඥ සාක්ෂි මත විමර්ශනය මෙහෙයවමින් ඇති බව අපරාධ පරීක්ෂණ දෙපාර්තමේන්තු තොරතුරු අනාවරණය කර ඇත.
විමර්ශනයේ දී දිනේෂ් ෂාෆ්ටර්ගේ ගේ ජංගම දුරකථනයෙන් හුවරමාරු වූ දුරකථන පණිවිඩ, වට්ස්ඇප් ඇතුළු සමාජ මාධ්ය ජාලා ඔස්සේ සංසරණය වූ පණිවිඩ, ඔහුගේ බිරියගේ සහ නැන්දනියගේ දුරකථනවලින් හුවමාරු වූ පණිවිඩ සහ දුරකථන ඇමතුම් ගැන ද විශේෂ අවධානයක් විමර්ශකයින් යොමු කර ඇතැයි ද විමර්ශන ආරංචි මාර්ග හෙළි කරයි.
