සූරියවැව නුවන් ජයසේකර-
සූරියවැව වැවේගම ප්රදේශයේදි නීති විරෝධී ලෙස ගිනි අවි නිශ්පාදනය කර අලෙවි කරන ස්ථානයක් වටකර එම ජාවාරමේ නිරත වු අයියා මලෝ දෙදෙනෙකු තංගල්ල කොට්ඨාස අපරාධ විමර්ෂණ ඒකකයේ නිළධාරින් විසින් ඊයේ ( 15 ) සවස අත්අඩංගුවට ගෙන තිබේ.
මෙලෙස අත්අඩංගුවට ගෙන ඇත්තේ සූරියවැව වැවේගම හා සූරියවැව වැලිආර පදිංචි අවුරුදු 35ත් 40 අතර වන අයියා මලෝ දෙදෙනෙකි.
සැකකරුවන් සම්බන්ධයෙන් තංගල්ල කොට්ඨාස අපරාධ විමර්ශන ඒකකයේ නිළධාරින්ට ලද තොරතුරකට අනුව මෙම වැටලිම සිදුකර තිබේ.
සැකකරුවන් කම්මලක් පවත්වාගෙන යන අතරතුර කලක් තිස්සේ මෙලෙස විවිධ වර්ගයේ ගිනි අවි නිශ්පාදනය කර අලෙවි කිරීමේ ජාවාරමේ නිරතව සිට තිබේ. වැටලීමේදී අයිස් මත් ද්රව්ය මිලි ග්රෑම් 3400ක්, මෙරට නිශ්පාදිත බෝර 12 වර්ගයේ ජීව උණ්ඩ යෙදිය හැකි ගිනි අවි දෙකක් හා ගිනි අවි නිශ්පාදනයට ගන්නා කොටස් කිහිපයක් සමග සැකකරුවන් දෙදෙනා අත්අඩංගුවට ගෙන තිබේ.
සැකකරුවන් දෙදෙනාගෙන් සිදුකල මුලික ප්රශ්න කිරිමේදි අනාවරණය වී ඇත්තේ ගිනි අවි 04ක් මීට පෙර නිශ්පාදනය කර අලෙවි කල බවය.
සැකකරුවන්ගෙන් ලද තොරතුරු ඔස්සේ ගිනි අවි මිළදි ගත් පුද්ගලයන් සම්බන්ධයෙන්ද විමර්ශන ආරම්භ කර තිබේ.
සැකකරුවන් වැඩිදුර විමර්ශන කටයුතු සදහා සූරියවැව පොලිස් ස්ථානයට ඉදිරිපත් කර ඇති අතර සැකකරුවන් හම්බන්තොට මහේස්ත්රාත් අධිකරණයට ඉදිරිපත් කිරිමට නියමිතය.
තංගල්ල කොට්ඨාශභාර ජ්යෙෂ්ඨ පොලිස් අධිකාරී නිපුන දෙහිගම , තංගල්ල කොට්ඨාස අපරාධ විමර්ශන ඒකකයේ ස්ථානාධිපති පොලිස් පරික්ෂක වසන්ත කුමාර යන නිළධාරීන්ගේ උපදෙස් පරිදි පොලිස් සැරයන් (44974) මංජුල නිළධාරියා ඇතුළු පිරිසක් විසින් වැටලීම සිදුකර සැකකරුවන් අත්අඩංගුවට ගෙන තිබේ.
