සපුගස්කන්ද තෙල් පිරිපහදුව අද සිට දින 50 ක කාලයකට වසා දැමීමට තීරණය කළ බවත්, බොරතෙල් ආනයනය අත්හිටුවීමෙන් ඉතිරි වන විදේශ විනිමය අත්යවශ්ය භාණ්ඩවන පෙට්ට්රල් ඩීසල්, ඖෂධ, අත්යවශ්ය ආහාර, ගෑස් ආනයනය සඳහා යොදවන බවත් බලශක්ති ඇමති උදය ගම්මන්පිල අද මාධ්ය හමුවකදී නිල වශයෙන් නිවේදනය කළේය..
ඇමතිවරයා කීවේ තෙල් පිරිපහදුව වසා දැමීම ඉන්ධන සැපයුමට කිසිදු බාධාවක් නොවන බවය. මේ රටේ සීමිත විදේශ සංචිත ඵලදායී ලෙස කළමනාකරණය කරගැනීමට ගනු ලැබූ තීන්දුවක් බවය.
සපුගස් කන්ද වසා දැමීම හේතුවෙන් මෙරට කිසිම ඉන්ධන හිඟයක් ඇති වීමේ කිසිදු අවදානමක් නැතැයිද ඔහු තව දුරටත් එහිදී කියා සිටියේය.
ඔහු මෙසේද ප්රකාශ කළේය.
“පසුගිය සැප්තැම්බර 29 මාධ්ය හමුවක් කැඳවලා මා අනතුරු ඇඟෙව්වා වගේම සපුගස්කන්ද තෙල් පිරිපහදුව වසා දමන්න තීරණය කළා. රටේ තියන සීමිත විදේශ විනිමය ප්රමාණය අත්යාවශ්ය භාණ්ඩ ආනයනයට පමණක් යොමු කරමින් නිසි ලෙස එය කළමනාකරණය කරගැනීම කළ යුතු නිසා තමයි අපට මේ තීන්දුව ගන්න වුනේ. “
“අපේ තෙල් පිරිපහදුව වසර 51 පරණයි. මේ තෙල් පිරිපහදුවේ සියයට 31 නිශ්පාදනය වන්නෙ දැවි තෙල් සහ නැප්තා. විදුලි නිශ්පාදනයේ දී මේ දෙකම භාවිත කරනවා. තවත් සියයට 19ක් නිශ්පාදනය වන්නෙ ගුවන්යානා ඉන්ධන හා භූමිතෙල්.
පෙට්රල් සහ ඩීලස් නිශ්පාදනය වන්නේ සියයට 43යි.
මේ දිනවල අධික වැස්ස නිසා විදුලි නිශ්පාදනයෙන් සියයට 50ක් නිශ්පාදනය වන්නෙ ජලයෙන්. ඒ නිසා දැවිතෙල් අවශ්යතාවයක් නැති බව අපට විදුලිබල මණ්ඩලය පැත්තෙන් දැනුම් දීලා තියනවා.
ගුවන් යානා පැත්තෙන් බැලුවොත් කෙටි දුර ගමන් යන ගුවන් යානාවලට ගමන ආරම්භ කරන ස්ථානයෙන් ඉන්ධන අරන් එන්න පුලුවන්. දුර ගුවන්යානාවලට තමයි කොළඹින් තෙල් සැපයීම අවශය වන්නේ. ඒ නිසා මේ දිනවල අධික ඉල්ලුමක් නැති දැවි තෙල් හා ගුවන් යානා ඉන්ධන සියයට 56ක් නිශ්පාදනය කරන බොරතෙල් ආනයනය නතර කරලා ඒ වෙනුවෙන් වැයවන සීමිත විදේශ විනිමය පෙට්රල්, ඩීසල්, ඖෂධ අත්යාවශ්ය ආහාර ගෑස් වැනි අත්යාවශ්ය භාණ්ඩවලට යොමු කරන්න තීරණය කළා.
සපුගස්කන්ද තෙල් පිරිපහදුවෙන් සපයන්නෙ පෙට්රල් අවශ්යතාවයෙන් සියයට 14යි. සමස්ථ ඩීසල් අවශ්යතාවයෙන් සියයට 29යි. මේ ප්රමාණයත් පෙට්රල් ඩීසල් ලෙස ආනයනය කිරීම විදේශ විනිමය කළමනාකරණයේ දී වැදගත් වෙනවා.
මේ විදේශ විනිමය අර්බුදය විසඳාගත් වහාම අපි බොරතෙල් ආනයනය ආරම්භ කරනවා. උපරිම වශයෙන් දින 50ක් පිරිහපදුව වසා දැමීමට අප බලාපොරොත්තු වෙනවා.
මේ තත්වය අපි සැප්තැම්බර් 29 දා මාධ්ය හමුවක් තබා පැහැදිලි කළා. මෙය නැවුම් ප්රවෘත්තියක් නොවෙයි.
