යුක්රේන යුද්ධයත් සමග නිවාඩු ගතකිරීමට ශ්රී ලංකාවට පැමිණ සිටින 4000ක පමණ යුක්රේන ජාතිකයන් දැඩි අසීරුතාවයකට පත් වී සිටිති.
ගුවන් ගමන් ඇනසිටීම සහ සිය වීසා කාලසීමාව ඉක්ම යෑම නිසා මෙම තත්වය ඇති වී තිබේ.
සංචාරක හෝටල්වල නැවතී සිටින සංචාරකයන් පිළිබඳව රජය යම් වැඩපිළිවෙළක් ආරම්භ කළ යුතු බව එම හෝටල් හිමියෝ මේ වනවිට ප්රකාශ කරමින් සිටිති.
“ අපට නින්ද යන්නෙ නෑ. අපේ සහෝදර සාහෝදරියන්ට, ඥාතීන්ට අසල්වැසින්ට සිද්ධ වෙච්චි දේ ගැන අපිට තොරතුරක් නෑ. මෙහෙ තව මොහොතක්වත් රැඳෙන්න බෑ. ඒත් අපේ ගුවන් ගමන් නැවතිලා. “
“අපි කෙනෙක්ව සම්බන්ධ කරගෙන තොරතුරු ගන්න උත්සාහ කළා. කිසිම කෙනෙක් අපට උදවු කළේ නෑ. ඒ නිසා අපි කොළඹ සිටින අපේ සංචාරක සමාගමට කතා කළා. නමුත් මේ සමාගමේ කාන්තාව කිව්වෙ විද්යුත් තැපෑල පරීක්ෂා කළ යුතුයි කියලා. ඇය තවම කිසිම තොතරුක් යොමු කළේ නෑ. “ එක් කාන්තාවක් රූපවාහිනී නාලිකාවකට කියා තිබිණි.
තවත් යුක්රේන සංචාරකයෙක් මේසේ පැවසුවේය.
කොහොමත් යුද්ධය හොඳ දෙයක් නෙමෙයි. මම යුක්රේනයේ. මගෙ බිරිය රුසියානු ජාතික කාන්තාවක්. අපි මේ දෙගොල්ලම මේ දෙස බලන්නෙ මැද ඉඳන්. මේ විනාශය යහපතක් ඇති කරන්නෙ නෑ. මම විශ්වාස කරනවා ඉදිරියේදි යහපත් තත්ත්වයක් ඇති වේවි කියලා.
මේ අතර ඊයේ රුසියානු තානාපති කාර්යාලය ඉදිරිපිට ලංකාවේ සිටින යුක්රේන ජාතික සංචාරකයන් විරෝදධතාවයක නිරත වූහ. සමහරු හඬා වැටුනහ.
මේ තමයි ඔයාටලට අපිට උදව් කරන්න පුලුවන් හොඳම වෙලාව. ඔවුන් කීවේ එසේය.
“මේක අපේ පුද්ගලික ප්රශ්නයක් නෙමෙයි. මේක දේශපාලන සෙල්ලමකුත් නෙමෙයි. ඔබට පුලුවන් ලෝකයේ අනාගතය වෙනස් කරන්න. නිහඬව ඉන්න එපා. අපට සාමය ලබා දෙන්න උදව් කරන්න.“ තවත් තරුණියක් කීවාය.
“රුසියානු ජනතාවට යුද්ධයක් අවශ්ය නෑ. ඒ අය අපේ නෑදෑයො. රුසියානු හමුදාව දැන් බෝම්බ දාන්නේ යුක්රේනයේ සාමාන්ය ගෙවල්වලට. සාමාන්ය මිනිස්සු මැරෙනවා. යුක්රේනය වෙනුවෙන් නැගී සිටින්න. “ ඔවුහු ඉල්ලා සිටියහ.
මේ වනවිට ශ්රී ලාංකිකයන් 40 දෙනෙක් පමණ යුක්රේනයේ කොටු වී සිටින බව ද ඔවුහු ප්රකාශ කළහ.
ඊයේ පැවති විරෝධතාවය..
