ෆීල්ඩ් මාර්ෂල් සරත් ෆොන්සේකා ඊයෙ රියර් අද්මිරාල් සරත් වීරසේකර එල්ලකරගෙන කළ කතාවේත්, අද රියර් අද්මිරාල් සරත් වීරසේකර විසින් ෆීල්ඩ් මාර්ෂල් සරත් ෆොන්සේකා එල්ලකරගෙන කළ කතාවේත් අනවශ්ය කොටස් සියල්ල ඉවත් කිරීමට ලේකම්වරයා වෙත උපදෙස් දී ඇතැයි කතා නායකවරයා අද පාර්ලිමේන්තුවේ දී ප්රකාශ කළේය.
කතානායකවරයා ඒ ප්රකාශ කළේ දශක ගණනාවක සිට පැවිත විත් දැන් පාර්ලිමේන්තුවේ දී දිගහැරෙන සරත් වීරසේකර හා සරත් ෆොන්සේකා ගැටුම ඉදිරියට ගෙන යමින් මහජන ආරක්ෂාව පිළිබඳ ඇමති සරත් වීරසේකර විසින් අද (10) පාර්ලිමේන්තුවේ දී කළ කතාව අවසන් වීමත් සමගය.
ඊයේ සමගි ජනබලවේගයේ මන්ත්රී සරත් ෆොන්සේකා සරත් වීරසේකර සම්බන්ධකරගෙන සිදුකළ ආවේගශීලී ප්රකාශන සහිත කතාවට අද මහජන ආරක්ෂාව පිළිබඳ ඇමති සරත් වීරසේකර එවැනිම පිලිතුරක් ලබා දුනනේය.
ඔහු පැවසුවේ සරත් ෆොන්සේකා හැසිරෙන්නේ මත්ද්රව්ය බී බෝක්කුවක් උඩ ඉන්නා අයිආර්සී කාරයෙක් ලෙස බවය. තමාට ලැබී ඇති ෆීල්ඩ් මාර්ෂල් තනතුරු වෙල් විදානේ තනතුරකටත් වඩා පහළින් තබා හැසිරෙන බවය.
“සන්ෂයින් සුද්දා මරපු නිසා ටිංකරින් ලසන්ත මැරුවා කියලා මා කිව්වෙ නෑ. ඒක අමූලික බොරුවක්. ඒක හැන්සාඩ් එකෙන් බලන්න පුලුවන්.“
‘ටිංකරින් ලසන්ත මැරුනෙ පොලිස් වෙඩි පරහරින්. ඒකට දොස් කියන ෆොන්සේකා මන්ත්රීවරයා ඒ සන්ෂයින් සුද්දා මරපු මංකොල්ල 11කට සම්බන්ධ දාමරිකයා අත්අඩංගුවට ගත්තෙ නැත්තෙ ඇයි කියලා අපෙන් ඇහුවෙ නෑ.“
“ඒ මරණයට මහේස්ත්රාත් පරීක්ෂණයක් තියනවා. අධිකරණ වෛද්ය පරීක්ෂණයක් තියනවා. දැන් ඒ නඩුව අධිකරණයේ විභාග වෙනවා.“
“ජනතාවගේ ආරක්ෂාව උදෙසා දිවි පරදුවට තබලා පාතාලය මර්ධනය කරන පොලිසියට නිවට පොලිසියක් කියන්න එක්කො පාතාලයෙ හිතවතෙක්. එහෙත් නැතිනම් මානසික විකෘතියක් තියන කෙනෙක්.“
“පොලිසිය මගේ තමයි. මගෙ අරමුණ බියෙන් සැකෙන් තොර සමාජයක් හදන්න. කාන්තාවන්ට වුනත් බියෙන් සැකෙන් තොරව රටේ ඕන තැනක යන්න පුලුවන් වාතාවරණයක් හදන්න පුලුවන්නම් ඒක තමයි මගේ අරමුණ. ඒක මම හොඳින් හෝ නරකින් කරනවා කියලා මම මේ සභාවෙ බය නැතිව කියනවා.“
“මා කායවර්ධන මධ්යස්ථානයක් විවෘත කළා. ඒකත් පාතාල අයට සම්බන්ධයි කියලා ඊයෙ කිව්වා. ඒක තරුණ කණ්ඩායමක් ණය මුදල් අරගෙන හොඳ උපකරණ අරගෙන ඉතාම හොඳින් තමයි ඒ කායවර්ධන මධ්යස්ථානය විවෘත කළේ.“
“මට ඒකට ආරාධනා කළේ කඩුවෙල උප නගරාධිපති. මම පොල්තෙල් පහන පත්තුකරලා එයාට සුභ පැතුවා. ඒ විදිහේ තරුණයො මෙහෙම දේවල්වලට පෙළඹෙන්නෙ නෑ. අපි ඒවා දිරිමත් කළ යුතුයි.“
“ෆොන්සේකා හිතනවා නම් මේක පාතාලයට සම්බන්ධයි කියලා වරප්රසාද වලට මුවාවෙලා නිවට ලෙස කතා කරන්නෙ නැතිව සී.අයි.ඩී එකට ඇවිත් පැමිණිලි කරන්න.“
අනතුරුව ලෝකයේ ආදර්ශමත් ෆීල්ඩ් මාර්ෂල්වරු ගැන කතා කළ මහජන ආරක්ෂාව පිළිබඳ ඇමති රියර් අද්මිරාල් සරත් වීරසේකර මින් ඉදිරියට අදාල මාතෘකා ඔස්සේ කතා නොකර, මන්ත්රීවරු අපහාස උපහාසවලට ලක් කරන මහජන නියෝජියන් නම් කර සභාගර්භයෙන් ඉවත් කරන ලෙසත් කතානායකගෙන් ඉල්ලා සිටියේය.
කතාව අවසන් වූ පසු කතානායකවරයා කීවේ මේ දෙපාර්ශවයේම අනවශ්ය කතා කපා දැමීමට තමන් ලේකම්වරයාට නියෝග කළ බවය.
