විස්සයි විස්ස ලෝක කුසලාන තරගාවලියේ ඉන්දියාව සහ එංගලන්තය අතර ඇඩිලේඩ්හිදී පැවැත්වෙන දෙවැනි අවසන් පූර්ව වටයේ තරගයේ දී කාසියේ වාසිය දිනූ එංගලන්ත කණ්ඩායම ප්රථමයෙන් පන්දු රැකීමට තීරණය කර ඇත.
මෙවර තරගාවලියේ සුපිරි 12 දෙනාගේ වටයේ දෙවන කාණ්ඩයෙන් ඉන්දියාව තරග වැදුනේය. එහිදී ඔවුන් පරාජය වූයේ දකුණු අප්රිකාව හමුවේ පමණි. සහභාගී වූ තරග 5න් 4ක් ජයගැනීමට ඉන්දියාව සමත් විය.
ඉන්දියාව මේ තරගයත් සමග මේ දක්වා පැවති 20යි 20 ලෝක කුසලාන තරගාවලිවලදී සිව් වරක් අවසන් පූර්ව වටයකට සුදුසුකම් ලැබුවේය.
මෙම ලෝකශූරතාවය 2007 දී ඉන්දියාව විසින් දිනාගත්තේය. 2014 දී ඔවුහු අනුශූරයින් බවට පත් වූහ.
එංගලන්තය මෙවර තරගාවලියේ සුපිරි 12 දෙනාගේ වටයේ පළමු කාණ්ඩයෙන් තරගවැදුනු අතර එහිදී සහභාගී වූ තරග 5න් 3ක් ජයගනිමින් අවසන් පූර්ව වටයට සුදුසුකම් ලබාගත්තේය.
2010 වසරේ 20යි 20 ලෝක ශූරයින් වූ එංගලන්තය වර්ෂ 2016 වසරේ අනුශූරතාවය දිනා ගත්තේය.
මේ දක්වා අවස්ථා 3කදී 20යි 20 ලෝක කුසලාන අවසන් පූර්ව වටයට සුදුසුකම් ලබා තිබේ.
අද තරගයෙන් ජයගන්නා කණ්ඩායම පාකිස්තානය සමගින් එළඹෙන ඉරිදා මෙවර ලෝක කුසලානයේ අවසන් මහා තරගයට ක්රීඩා කිරීමට නියමිතය.
