දේශපාලන සහ ආර්ථික කරුණු සම්බන්ධයෙන් විවාද මතු කර ගත හැකි නමුත් විෂ මත්ද්රව්ය උවදුර රටින් තුරන් කර දැමීමේ ජාතික වගකීම ඉටු කිරීමේදී තවදුරටත් කිසිදු විවාදයකට ඉඩක් නොමැති බවත්, විෂ මත්ද්රව්ය උවදුර මුලිනුපුටා දැමීමේ කඩිනම් වැඩපිළිවෙළක් වෙනුවෙන් රටම එකට එක් විය යුතු බවත් ජනාධිපති අනුර කුමාර දිසානායක අවධාරණය කළේය.
ජනාධිපතිවරයා මේ බව සඳහන් කළේ විෂ මත්ද්රව්ය මුලිනුපුටා දැමීම සඳහාවන ‘රටම එකට ජාතික මෙහෙයුම’ පිළිබඳ මාධ්ය ආයතන ප්රධානීන් දැනුවත් කිරීම වෙනුවෙන් අද (23) පස්වරුවේ ජනාධිපති කාර්යාලයේ පැවති හමුවට එක් වෙමිනි.
මේ වන විට ජාතික ව්යසනයක් බවට පත්ව තරුණ ප්රජාවගේ මෙන්ම පාසල් දරුවන්ගේ ජීවිත ද අවදානමට ලක් කර ඇති විෂ මත්ද්රව්ය ජාවාරම ජාතික මට්ටමේ වැඩසටහනක් ඔස්සේ මුලිනුපුටා දැමීම වෙනුවෙන් ක්රියාත්මක කෙරෙන ‘රටම එකට ජාතික මෙහෙයුම’ පිළිබඳව පුළුල් ප්රචාරණයක් ලබා දී සමාජය දැනුම්වත් කිරීම සඳහා විද්යුත් සහ මුද්රිත මාධ්ය මගින් ලබාගත හැකි දායකත්වය පිළිබඳ මෙහිදී පුළුල් ලෙස සාකච්ඡා කෙරිණි.
මෙහිදී අදහස් දැක්වූ ජනාධිපති අනුර කුමාර දිසානායක වැඩිදුරටත් සඳහන් කළේ විෂ මත්ද්රව්ය ජාවාරම සහ ඒ හා බැදුණු අපරාධ කල්ලිවල මූල්ය බලය විසින් ආර්ථිකය, සමාජ දේහය, රාජ්ය යාන්ත්රණය සහ නීතියේ විධානයේ ආධිපත්ය පවා බිඳ වට්ටමින් රටත්, සමාජයත් විනාශ කරමින් තිබෙන බවය. මෙම උවදුරට තවදුරටත් ඉඩ නොතැබීමට වත්මන් රජය තීරණය කර තිබෙන බව පැවසු ජනාධිපතිවරයා ඒ වෙනුවෙන් සියලු දෙනාගේ දායකත්වය අපේක්ෂා කරන බවද පැවසීය.
එමෙන්ම පසුගිය සමයේ දේශපාලන රශ්මි කදම්භය තුළ නිදැල්ලේ වර්ධනය වූ මෙම අපරාධ අද රටත් සමාජයත් දැඩිව වෙළාගෙන තිබෙන අන්දම සහ ඊට පොලිසිය, රේගුව, මෝටර් රථ ප්රවාහන දෙපාරත්මේන්තුව, ආගමන විගමන දෙපාර්තමේන්තුව ඇතුළු රජයේ වගකිවයුතු ආයතනවලින් ලැබී ඇති සහාය පිළිබඳවද ජනාධිපතිවරයා සිහිපත් කළේය.
නැවත එවැනි තත්ත්වයකට ඉඩ නොතබා අනාගත දරු පරපුර වෙනුවෙන් මෙම ජාතික ව්යසනය පරාජය කිරීමට සියලු දෙනා වෙත පැවරි ඇති අත්හළ නොහැකි වගකීම ජනාධිපතිවරයා මෙහිදී වැඩිදුරටත් අවධාරණය කළේය.
රටම එකට ජාතික මෙහෙයුම සමාරම්භය ඔක්තෝබර් 30 වන දින පෙ.ව 10.00ට ජනාධිපති අනුර කුමාර දිසානායක මහතාගේ ප්රධානත්වයෙන් කොළඹ සුගතදාස ගෘහස්ථ ක්රීඩාංගණයේදී පැවැත් වේ.
