රජය විසින් පාර්ලිමේන්තුවට ඉදිරිපත් කර තිබෙන විශ්රාමික ජනාධිපතිවරුන්ගේ හිමිකම් අවලංගු කිරීමේ පනත් කෙටුම්පතේ වගන්ති ආණ්ඩුක්රම ව්යවස්ථාවට පටහැනි බව දන්වා එම වගන්ති අභියෝගයට ලක් කරමින් ශ්රේෂ්ඨාධිකරණයට තවත් පෙත්සම් 3ක් ඉදිරිපත් වී තිබේ.
2025/අගොස්තු 19 දිනැති තමන්ගේ නිවේදනයේ සඳහන් පෙත්සම් තුනට අමතරව ආණ්ඩුක්රම ව්යවස්ථාවේ 121/1 ව්යවස්ථා ප්රකාරව ජනාධිපතිවරයින්ගේ හිමිකම් ඉවත් කිරිම නැමැති පනත් කෙටුම්පත සම්බන්ධයෙන් ශ්රේෂ්ඨාධිකරණය වෙත ඉදිරිපත් කරන ලද තවත් පෙත්සම් තුනක පිටපත් තමන්ට ලැබී ඇතැයි අද උදෑසන කකථානායකවරයා පාර්ලිමේන්තුවත් දැනුම්වත් කළේය.
සබරගමුව විශ්වවිද්යාලයේ කථිකාචාර්ය මහින්ද පතිරණ, හිටපු ජනාධිපති මහින්ද රාජපක්ෂගේ මාධ්ය ප්රකාශක නීතිඥ මනෝජ් ගමගේ, නාවික හමුදාවේ හිටපු මාණ්ඩලික ප්රධානී එස්. එම්. විජේවික්රම යන අය විසින් මෙම පෙත්සම් ඉදිරිපත් කර ඇත.
එහි වගඋත්තරකරු ලෙස නීතිපතිවරයා නම් කර තිබේ.
පෙත්සම්කරුවන් කියා සිටින්නේ යෝජිත පනත් කෙටුම්පතේ 01 සිට 04 දක්වා වගන්තිවලින් ආණ්ඩුක්රම ව්යවස්ථාව මගින් සහතික කර තිබෙන බලය බෙදීමේ සිද්ධාන්තය උල්ලංඝනය වීමක් සිදුවන බවය.
ඊට අමතරව අදාළ පනත් කෙටුම්පතේ අන්තර්ගත වගන්ති එකකින් හෝ කීපයකින් රටේ ආණ්ඩුක්රම ව්යවස්ථාව මගින් සහතික කර ඇති ස්වෛරී භාවය සහ ජනතා පරමාධිපත්යය උල්ලංඝනය කිරීමක් සිදුවන බවත් පෙත්සමෙන් චෝදනා කර තිබේ.
සමස්තයක් වශයෙන් ගත් කළ යෝජිත පනත් කෙටුම්පතේ වගන්තිවලින් සමස්ථ ආණ්ඩුක්රම ව්යවස්ථාවේ සඳහන් මූලික හරයන් උල්ලංඝනය වීමක් සිදුවන බව සඳහන් කළ පෙත්සම්කරුවන් ඒ තුළින් ආණ්ඩුක්රම ව්යවස්ථාව මගින් සහතික කර තිබෙන 1, 3, 4 වන ව්යවස්ථාවන් සහ 12(1) ව්යවස්ථාවේ සඳහන් මූලික මිනිස් අයිතිවාසිකම් උල්ලංඝනය වන බවත් සඳහන් කරයි.
ඒ අනුව අදාළ පනත් කෙටුම්පතේ ප්රශ්නගත වගන්ති සම්මත කිරීමට නම් පාර්ලිමේන්තුවේ තුනෙන් දෙකක විශේෂ බහුතර ඡන්දයකින් අනුමත වී එය ජනමත විචාරණයකින්ද අනුමත විය යුතු බවට නියෝගයක් නිකුත් කරන ලෙසත් පෙත්සම්කරුවන් ශ්රේෂ්ඨාධිකරණයෙන් ඉල්ලා ඇත.
අදාළ පනත් කෙටුම්පත අභියෝගයට ලක් කරමින් ශ්රී ලංකා පොදුජන පෙරමුණේ පාලක ලේකම් රේණුක පෙරේරා සහ තවත් පුද්ගලයන් දෙදෙනෙකු විසින් ද පෙත්සම් තුනක් ඉදිරිපත් කර තිබුණි. ( අද දෙරණ)
