ජනතාවට සමෘද්ධිය ලඟා කිරිමටත් ජනතාවගේ ජීවන තත්ත්වය වැඩිදියුණු කිරීමටත් ලබා දුන් පොරොන්දු ඉටු කිරීමට රජය අපොහොසත් වීම පිළිබඳව විපක්ෂ නායක සජිත් ප්රේමදාස අද (01) සිය කලකිරීම පළ කළේය.
ඔහු මේ අදහස් ප්රකාශ කරන්නේ අද තලවාකැලේ නාගරික ක්රීඩාංගනයේ දී සංවිධානය කර තිබූ සමගි ජන බලවේගයේ මැයි දින රැළිය අමතමිනි.
එහිදී විපක්ෂ නායක ප්රේමදාස පෙන්වා දුන්නේ විදුලි බිල්පත් අඩු කරන බවට පොරොන්දු වුවද, මැතිවරණයෙන් පසු ජනාධිපති අනුර කුමාර දිසානායක විදුලි බල වැඩි කිරීමට සැලසුම් කරමින් සටින බවය. ජාත්යාන්තර මූල්ය අරමුදල සමඟ සාකච්ඡා මගින් දීර්ඝ අරමුදල් පහසුකම් සඳහා විදුලි බිල්පත් ඉහළ නැංවීමට එකඟ වී ඇති ආකාරය විපක්ෂ නායකවරයා අද හෙළි කළේය.
“රු. 9,000 ක බිල්පත් රුපියල් 6,000 දක්වා අඩු කරන බවත්, රු. 3,000 ක බිල්පත් රුපියල් 2,000 දක්වා අඩු කරන බවත් පවසමින් අනුර කුමාර දිසානායක මහතා විදුලි බිල්පත් 33% කින් අඩු කරන බවට පොරොන්දු වුනා. ජනාධිපති අනුර කුමාර දිසානායක මහතා මෙම බොරු පොරොන්දු දෙන්නේ මන්දැයි අපි අහනවා,” ප්රේමදාස පැවසීය.
පොරොන්දු වූ පරිදි වරාය මිලට ඉන්ධන ලබා දීමට අපොහොසත් වීම සහ සහල්, පොල් සහ කිරිපිටි මිල ගණන් අහස උසට ඉහළ යාම සම්බන්ධයෙන් ද ඔහු රජය විවේචනය කළේය. “රජයට ජනතාවට ලුණු දෙන්නවත් බැහැ. මේක ලැජ්ජා සහගතයි,” ඔහු තවදුරටත් පැවසීය.
රටේ පිරිහෙන නීතිය හා සාමය පිළිබඳ තත්ත්වය ගැන ද සජිත් ප්රේමදාස කතා කළේය. මිනීමරුවන්, පාතාල කල්ලි සහ මැරයන් නීතිය අතට ගනිමින් සිටින බව විපක්ෂ නායකවරයා පෙන්වා දුන්නේය. “ඔවුන් ගෙවල්වල, නිදන කාමරවල, මිදුල්වල, වීදිවල, සේවා ස්ථානවල – සෑම තැනකම මනී මරණවා. අධිකරණ කාමරවල සහ විනිසුරුවන් ඉදිරිපිට පවා මිනිස්සු මරලා දානවා. අපේ රටේ නීතිය හා සාමය මිනීමරුවන් විසින් පාලනය කරන්නේ. කැලෑ නීතියයි ක්රියාත්මක වෙන්නේ ,” ඔහු පැවසීය.
මෙම ගැටලුවට එරෙහිව සටන් කිරීම සඳහා, සෑම ගමකම සහ නගරයකම පළාත් පාලන ආයතන හරහා ආරක්ෂක කමිටු පිහිටුවීමට සැලසුම් කරන බව සජිත් ප්රේමදාස සහතික වුනේය. “නීතිය හා සාමය යථා තත්ත්වයට පත් කිරීම සඳහා මෙම කමිටු පොලිසිය, ආරක්ෂක හමුදා, රජයේ ආයතන සහ නීතිය ක්රියාත්මක කරන අංශ සමඟ එක්ව කටයුතු කරනවා. විපක්ෂය ලෙස මේ තත්ත්වය සාක්ෂාත් කර ගැනීම සඳහා අපි ඔබ සමඟ අත්වැල් බැඳගෙන කටයුතු කිරීමට පොරොන්දු වෙනවා,” ඔහු අවධාරණය කළේය.
විපක්ෂ නායක සජිත් ප්රේමදාස මහතාගේ කතාවෙන් පසු පිරිස විසිර යාමට පටන් ගත් විට සමගි ජන බලවේගය මැයි දින රැලිය අනපේක්ෂිත ලෙස අවසන් විය.
පිරිස රඳවා ගැනීමට සංවිධායකයින් දැරූ උත්සාහයන් නොතකා, රැලිය නියමිත වෙලාවට පෙර අත් හැර දැමීමට සංවිධායකයින්ට සිදුවූයේය.
හිටපු පාර්ලිමේන්තු මන්ත්රී තුෂාර ඉදුනිල් මහතා රැස්ව සිටි පිරිස අමතමින්, නායකයාට හදිසි කටයුතු කිරීමට ඇති බවත්, එම නිසා ඔහු පිටව යාමට සිදු වූ බවත් පැහැදිලි කළේය.
රංජිත් මද්දුම බණ්ඩාර සහ හර්ෂ ද සිල්වා ඇතුළු අනෙකුත් ප්රමුඛ කථිකයන් තවමත් එහි සිටින බවත්, ඔවුන් තවදුරටත් රැස්ව සිටින බවත් ඔහු රැස්ව සිටි පිරිසට සහතික විය. උත්සවය තවමත් අවසන් වී නැති බව අවධාරණය කරමින් ඔහු රැස්ව සිටින ලෙස ඉල්ලා සිටියේය.
කෙසේ වෙතත්, මෙම සහතික කිරීම් නොතකා, බහුතරයක් ජනතාව පිටව යාම නිසා රැලිය අවසන් කිරීමට සිදුවිය.
