සිය පුද්ගලික වාහනයට ඉන්ධන පිරවුම්හල්වලින් බලහත්කාරයෙන් ඉන්ධන ලබා ගැනීම, ප්රදේශයේ තරු හෝටල්වලින් නොමිලේ ආහාර පාන ගෙන්වා ගැනීම, ප්රදේශයේ මත්පැන් අලෙවිහල්වලින් සුපිරි මත්පැන් බෝතල් බලහත්කාරයෙන් ගෙන්වා ගැනීම සිදුකරමින් ප්රදේශයේ ව්යාපාරිකයින්ට බරපතල ගැටලු ඇතිකරමින් සිටි කොළඹට නුදුරු ගම්පහ දිස්ත්රික්කයේ ප්රධාන පොලිස් ස්ථානයක ස්ථානාධිපතිකම කළ ප්රධාන පොලිස් පරීක්ෂකවරයෙක් සාමාන්ය රාජකාරි සඳහා යෙදවීමට පොලිස්පතිවරයා කටයුතු කර තිබේ.
මෙම පොලිස් නිලධාරියා මෙම පොලිස් ස්ථානාධිපති ධූරය ලබාගෙන ඇත්තේ ඇතිමලේ පොලිස් ස්ථානාධිපතිවරයා වී සිටිය දී සැමියා නැති කාන්තාවකගේ නිවසට රිංගන්නට ගොස් ගම්වැසියන් විසින් ගස් බැඳ පහර දී පොලිසියටම භාර දීමෙන් අනතුරුව වැඩ තහනමකට ලක්වී සිටිය දී බව වාර්තා වේ.
උක්ත පොලිස් නිලධාරියාගේ සොයුරෙක් හිටපු ජනාධිපතිවරයාගේ සමීපතම හිතවතෙක් වීම හේතුවෙන් එම දේශපාලන බලය යොදාගෙන කලින් ඔහුට එල්ල වී තිබුණු චෝදනා සම්බන්ධව චෝදනා පත්රත් ඉවත් කරගෙන යළි ප්රධාන පාලිසියක පොලිස් ස්ථානාධිපති ධූරයකට පත් කරගෙන ඇතැයි පොලිස් දෙපාර්තමේන්තු ආරංචි මාර්ග පවසයි.
මෙම නිලධාරියා එම පොලිස් ස්ථානයේ ස්ථානාධිපති ධූරය භාරගත් දා සිට සිය නිල බලය පාවිච්චි කරමින් සිදුකළ අවකල් ක්රියා ඉවසා ගැනීමට නොහැකි වූ තැන ඒ සම්බන්ධව ප්රදේශයේ ව්යාපාරික ප්රජාව පොලිස් මූලස්ථානයට පැමිණිල්ලක් කර තිබේ.
ඒ අනුව බස්නාහිර උතුරු දිසාව භාර නියෝජ්ය පොලිස්පති රොහාන් ප්රේමරතන්ගේ නියෝගය මත මෙම තැනැත්තා සම්බන්ධව විශේෂ විමර්ශනයක් සිදුකරතිබිණි.
හිස් අතින් පැමිණි මේ තැනැත්තා පොලිස් ස්ථානාධිපති ධූරයෙන් ඉවත් වී යන විට ලොරි ගණනක බඩු රැගෙන ගිය බව අදාල පොලිස් ස්ථානයේ පොලිස් පොඩ්ඩෝ ලංකාසර කළ විමසීමක දී පැවසූහ.
කෙසේ වෙතත් නව පොලිස් පරීක්ෂකවරුන් 11 දෙනෙක් වෙත පොලිස් ස්ථානාධිපති රාජකාරි පවරමින්, වත්ත පොලිසියේ හිටපු ස්ථානාධිපති වූ පොලිස් පරීක්ෂක ආර්.ඒ.ඩී.අයි රාජපක්ෂ පොලිස් ස්ථානාධිපති ධූරයෙන් පහ කර ගම්පහ කොට්ඨාසයේ සාමාන්ය පොලිස් රාජකාරියේ යොදවමින් පොලිස්පති ඩී.සී. වික්රමරත්නගේ අත්සනින් යුතුව විශේෂ නියෝගයක් පෙරේදා (02) නිකුත් වී තිබිණි.
පොලිස් ක්ෂේත්ර බලකා මූලස්ථානයේ සේවය කළ ප්රධාන පොලිස් පරීක්ෂක එච්.එම්.කේ.හෙරත් අම්පාර මූලස්ථාන පොලිස් ස්ථානාධිපති ලෙසත්, අනුරාධපරු කොට්ඨාසයේ සේවය කළ ප්රධාන පොලිස් පරීක්ෂක ඩබ්ලියු.එම්.ඩබ්ලියු.බී විජේකෝන් පුල්මුඩේ පොලිස් ස්ථානාධිපති ලෙසත්, බණ්ඩාරවෙල පොලිස් කොට්ඨාසයේ සේවය කළ ප්රධාන පොලිස් පරීක්ෂක ආර්.එම්.අබේසිංහ ඇතිමලේ පොලිස් ස්ථානාධිපති ලෙසත්, රත්නපුර පොලිස් කොට්ඨාසයේ සේවය කළ ප්රධාන පොලිස් පරීක්ෂක ඒ.එම්.යූ.ආර්.ජයතිස්ස සමනලවැව පොලිස් ස්ථානාධිපති ලෙසත්, කුරුණෑගල කොට්ඨාසයේ සේවය කළ ප්රධාන පොලිස් පරීක්ෂක ඩී.ඩී.එම්.එච්.අයි දැල්කඳුර බෝගමුව පොලිස් ස්ථානාධිපති ලෙසත්, නිකවැරටිය පොලිස් කොට්ඨාසයේ සේවය කළ ප්රධාන පොලිස් පරීක්ෂක යූ.එස්.බී ධර්මරත්න තලමලගම පොලිස් ස්ථානාධිපති ලෙසත්, පොලිස් අභ්යාස විද්යාලයේ සේවය කළ ප්රධාන පොලිස් පරීක්ෂක ඩබ්ලියු.ඒ.ඩී.සී රොහාන් මිද්දෙණිය පොලිස් ස්ථානාධිපති ලෙසත්, ගම්පහ කොට්ඨාසයේ සේවය කළ ප්රධාන පොලිස් පරීක්ෂක කේ.හේරත් වලස්මුල්ල පොලිස් ස්ථානාධිපති ලෙසත්, පර්යේෂණ හා සංවර්ධන කොට්ඨාසයේ සේවය කළ ප්රධාන පොලිස් පරීක්ෂක එච්.එල්.සී හිරියාදෙණිය දිවුලපිටිය පොලිස් ස්ථානාධිපති ලෙසත්, මඩකලපුව පොලිස් කොට්ඨාසයේ සේවය කළ ප්රධාන පොලිස් පරීක්ෂක ඊ.එම්.ජෙට් කටුනායක පොලිස් ස්ථානාධිපති ලෙසත් මෙසේ පත් කර තිබේ.
නව පොලිස් ස්ථානාධිපතිවරුන් පත් කළ පොලිස් ස්ථානවල මෙතෙක් සේවය කර තිබුණේ වැඩ බලන පොලිස් ස්ථානාධිපතිවරුන්ය. කටුනායක පොලිසියෙන් බූරුමූණා පැන ගිය පසු එහි පොලිස් ස්ථානාධිපතිවරයා වැඩ තහනමකට ලක්වීම නිසා ඔහු වෙනුවට නව පොලිස් ස්ථානාධිපතිවරයෙක් පත් කර තිබිණි.
මෙම ස්ථාන මාරු පොලිස් කොමිෂන් සභාවේ ආවරණ අනුමැතියට යටත්වන පරිදි හදිසි සේවා අවශ්යතා මත පදනම් පොලිස්පති ඩී.සී.වික්රමසිංහ විසින් සිදුකර ඇත.
