මෙය දේශපාලන ගේම් ගසන වේලාවක් නොවන බවත් ජනතාව හා පක්ෂ නායකයින් එකඟ වූ තීරණයට අනුකූලව වැඩ බලන ජනාධිපති රනිල් වික්රමසිංහ සිය තනතුරින් ඉල්ලා අස්වී සර්වපාක්ෂික රජයකට ඉඩදිය යුතු බවත් පාර්ලිමේන්තු මන්ත්රී ආචාර්ය හර්ෂ ද සිල්වා පවසයි.
මේ වන විට ලංකාව මහ මුහුද මැද කුණාටුවකට හසු වූ නැවක් බවත් එය ගිලී ගියහොත් ලංකාව යන සන්නාමය සදහටම නැති වී යන බවත් ඔහු අනතුරු ඇඟවීය. මේ මොහොතේ රට වැටී සිටින ආර්ථික අර්බුදයෙන් ගොඩ ගැනීම සඳහා විදේශ රටවල්, ජාත්යන්තර මූල්ය අරමුදල හා ණය හිමියන් සමඟ තීරණාත්මක සාකච්ඡා කරන අවස්ථාවක ප්රජාතන්ත්රවාදයට පයින් ගසන අය ලෙස සලකා අපිව කොන් කළහොත් තවත් රට අර්බුදයට යන බව ඔහු පෙන්වා දුන්නේය.
“මිලිටරිය බලය තුවක්කු පාවිච්චි කර ජනතාවගේ ඉල්ලීම් අභිලාෂයන් යටත් පත් කරන්නට රනිල් වික්රමසිංහ කටයුතු කරන්නේ නම් මේ පැය කීපයේදී හා ඉදිරි දින කීපයේදී මහා විනාශයකට රට ගමන් කරාවි.. අපි යුද හමුදාවෙන් ඉල්ලා සිටිනවා තුවක්කු ඔසවන්න එපා වෙඩි තියන්න එපා දරුවන්ට.. ඔබලාට අයිතියක් නෑ එහෙම කරන්න.. රනිල් වික්රමසිංහ මේ රට තව දුරටත් අරාජික තැනකට පත් කරන්නේ නැතුව ඔබේ ඉල්ලා අස්වීමත් බාර දෙන්න.. දේශපාලන ගේම් ගහන්නේ නැතුව ලංකාව කියලා හිතන්න..”
ඔහු වැඩිදුරටත් පැවසීය.
